Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 43: Yoxuwa A Va Murhangeri

Dyondzo 43: Yoxuwa A Va Murhangeri

Muxe a a lava ku nghena ni Vaisrayele eKanana. Hiloko a kombela a ku: ‘Yehovha, ndzi kombela ku pela Nambu wa Yordani leswaku ndzi ya vona tiko lerinene.’ Kambe Yehovha a ku: ‘Swi ringene! U nga ha pfuki u vulavule hi mhaka leyi!’ Xana wa swi tiva leswaku ha yini Yehovha a vule marito wolawo?

Hikwalaho ka leswi humeleleke loko Muxe a ba ribye. Tsundzuka leswaku yena na Aroni a va n’wi dzunisanga Yehovha. A va va byelanga vanhu leswaku i Yehovha a endleke leswaku ribye ri humesa mati. Hikwalaho ka sweswo Yehovha u vule leswaku a nge va pfumeleli ku nghena eKanana.

Endzhaku ka tin’hweti to hlayanyana Aroni a file, Yehovha u byele Muxe a ku: ‘Teka Yoxuwa u n’wi yimisa emahlweni ka Eliyazara lowa muprista ni le mahlweni ka vanhu. Kutani emahlweni ka vona hinkwavo, vula leswaku Yoxuwa hi yena murhangeri lontshwa.’ Muxe u endle hilaha Yehovha a vuleke hakona, hilaha u swi vonaka hakona laha exifanisweni.

Muxe a tivisa leswaku Yoxuwa u ta va murhangeri

Hiloko Yehovha a byela Yoxuwa a ku: ‘Vana ni xivindzi, u nga chavi. U ta rhangela Vaisrayele ku nghena etikweni ra Kanana leri ndzi va tshembiseke rona, naswona ndzi ta va na wena.’

Hi ku famba ka nkarhi Yehovha u byele Muxe leswaku a tlhandlukela eNtshaveni ya Nebo etikweni ra Mowabu. Loko a ri kwale henhla Muxe a a kota ku vona entsungeni wa Nambu wa Yordani ni ku vona tiko ro saseka ra Kanana. Yehovha u te: ‘Leri i tiko leri ndzi ri tshembiseke vana va Abrahama, Isaka na Yakobe. Ndzi ku pfumelele leswaku u ri vona, kambe a ndzi nge ku pfumeleli u nghena eka rona.’

Muxe u fele kwale henhla ka Ntshava ya Nebo. A a ri ni malembe ya 120 hi vukhale. A ha tiyile naswona a ha vona kahle. Vanhu va ve ni gome lerikulu hikwalaho ka leswi Muxe a feke. Kambe a va tsakile hileswi Yoxuwa a a ri murhangeri wa vona lontshwa.

Tinhlayo 27:12-23; Deteronoma 3:23-29; 31:1-8, 14-23; 32:45-52; 34:1-12.



Swivutiso

  • Exifanisweni lexi, i vamani vavanuna vambirhi lava yimeke na Muxe?
  • Xana Yehovha u te yini eka Yoxuwa?
  • Ha yini Muxe a khandziye enhlohlorhini ya Ntshava ya Nebo, naswona Yehovha u te yini eka yena?
  • Muxe a a ri ni malembe mangani loko a fa?
  • Ha yini vanhu va twa ku vava, kambe hi xihi xivangelo lexi endlaka leswaku va tsaka?

Swivutiso swo engetela

  • Hlaya Tinhlayo 27:12-23.

    Hi xihi xiavelo xo tika lexi Yoxuwa a nyikiweke xona hi Yehovha, naswona Yehovha u swi kombisa njhani namuntlha leswaku wa va khathalela vanhu Vakwe?

  • Hlaya Deteronoma 3:23-29.

    Ha yini Yehovha a nga va pfumelelanga Muxe na Aroni ku nghena etikweni leri tshembisiweke, naswona hi dyondza yini emhakeni leyi?

  • Hlaya Deteronoma 31:1-8, 14-23.

    Xana marito man’wana ya Muxe lama a ma byeleke tiko ra Israyele ma swi kombisa njhani leswaku u swi amukele hi mbilu hinkwayo ku xupuriwa hi Yehovha?

  • Hlaya Deteronoma 32:45-52.

    Xana Rito ra Xikwembu ri fanele ri byi khumba njhani vutomi bya hina?

  • Hlaya Deteronoma 34:1-12.

    Hambileswi Muxe a nga si tshamaka a vona Yehovha hi ku kongoma, xana Deteronoma 34:10 yi kombisa yini malunghana ni vuxaka bya yena na Yehovha?

DYONDZA SWO TALA

Khadi Ra Bibele Ra Yoxuwa

Xana Yoxuwa ni mavuthu yakwe va ma wise njhani marhangu ya muti wa Yeriko? Printa khadi leri ra Bibele naswona u dyondza leswi engetelekeke hi wanuna loyi wa le Bibeleni la nga ni xivindzi.