Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 42: Mbhongolo Yi Vulavula

Dyondzo 42: Mbhongolo Yi Vulavula

Xana u tshame u twa mbhongolo yi vulavula? U nga ha ku: ‘Doo! Swiharhi a swi vulavuli.’ Kambe Bibele yi vulavula hi mbhongolo leyi tshameke yi vulavula. A hi voneni leswaku swi endlekise ku yini.

Ntsumi

Vaisrayele se a va ri ekusuhi ni ku nghena etikweni ra Kanana. Balaka loyi a a ri hosi ya Vamowabu a a chava Vaisrayele. Kutani u rhumele wanuna wo tlhariha la vuriwaka Balama leswaku a ya rhukana Vaisrayele. Balaka u tshembise Balama mali yo tala, kutani Balama u khandziye mbhongolo yakwe a kongoma eka Balaka.

Yehovha a a nga swi lavi leswaku Balama a rhukana vanhu Vakwe. Kutani u rhumele ntsumi yi khome tlhari ro leha leswaku yi ya yima endleleni yi sivela Balama. Balama a a nga yi voni ntsumi kambe mbhongolo yakwe a yi yi vona. Xisweswo mbhongolo yi hambete yi ringeta ku hambuka laha ntsumi yi yimeke kona, naswona eku heteleleni yi etlele ehansi endleleni. Balama u hlundzuke ngopfu, kutani a ba mbhongolo yakwe hi nhonga.

Kutani Yehovha a endla leswaku Balama a twa mbhongolo yakwe yi vulavula na yena. Mbhongolo yi vutise yi ku: ‘Xana ndzi ku endle yini leswi u ndzi baka?’

Balama a khandziye mbhongolo

Balama u te: ‘U ndzi endle xiphukuphuku. Loko a ndzi ri ni banga, a ndzi ta va ndzi ku dlele!’

Mbhongolo yi n’wi vutise yi ku: ‘Xana ndzi tshame ndzi ku khoma hi ndlela leyi?’

Balama u hlamule a ku: ‘E-e!’

Hiloko Yehovha a endla leswaku Balama a vona ntsumi leyi khomeke tlhari leyi yimeke endleleni. Ntsumi yi ku: ‘A wu yi bela yini mbhongolo ya wena? Ndzi tele ku ta ku sivela, hikuva a wu fanelanga u ya rhukana Israyele. Loko mbhongolo ya wena a yi nga hambukanga, ingi ndzi ku dlele, kambe a ndzi nga ta yi endla nchumu mbhongolo ya wena.’

Hiloko Balama a ku: ‘Ndzi dyohile. A ndzi nga swi tivi leswaku u yime endleleni.’ Hiloko ntsumi yi tshika Balama a famba kutani Balama u tlhele a ya vona Balaka. U hambete a ringeta ku rhukana Israyele, kambe Yehovha u endle leswaku a katekisa Israyele kanharhu.

Tinhlayo 21:21-35; 22:1-40; 23:1-30; 24:1-25.



Swivutiso

  • I mani Balaka, naswona ha yini a rhume Balama?
  • Ha yini mbhongolo ya Balama yi pavalale endleleni?
  • Xana mbhongolo yi te yini eka Balama?
  • Xana ntsumi yi te yini eka Balama?
  • Ku humelele yini loko Balama a ringeta ku rhukana Vaisrayele?

Swivutiso swo engetela

  • Hlaya Tinhlayo 21:21-35.

    Ha yini Vaisrayele va hlule Hosi Sihoni ya Vaamori na Hosi Ogo ya Baxani?

  • Hlaya Tinhlayo 22:1-40.

    I yini lexi endleke leswaku Balama a ringeta ku rhukana Vaisrayele, naswona hi dyondza yini emhakeni leyi?

  • Hlaya Tinhlayo 23:1-30.

    Hambileswi Balama a a vulavula ku fana niloko a ri mugandzeri wa Yehovha, xana swiendlo swa yena swi kombise njhani leswaku a a nga ri yena?

  • Hlaya Tinhlayo 24:1-25.

    Xana rungula leri ra Bibele ri ri tiyisa njhani ripfumelo ra hina eku hetisiseni ka swikongomelo swa Yehovha?