Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 41: Nyoka Ya Koporo

Dyondzo 41: Nyoka Ya Koporo
Muxe na nyoka ya koporo

Xana nyoka leyi tsondzeleke mhandzi liya yi vonaka yi ri ya xiviri? A hi ya xiviri. Nyoka leyi yi endliwe hi koporo. Yehovha u byele Muxe leswaku a yi veka emhandzini leswaku loko vanhu va yi languta, va hanya. Kambe tinyoka leti nga ehansi i ta xiviri. Ti lumetele vanhu ti tlhela ti va vabyisa. Wa swi tiva leswaku ha yini?

Hileswi Vaisrayele va pfukeleke Xikwembu na Muxe. A va gungula va ku: ‘Ha yini mi hi humese aEgipta leswaku hi ta fela emananga? A ku na swakudya kumbe mati laha. Naswona manna leyi se yi hi phirhwile.’

Kambe manna a yi ri swakudya leswinene. Yehovha a a va nyike yona hi ndlela ya singita. Naswona u va nyike mati hi ndlela ya singita. Kambe vanhu a va yi nkhensi ndlela leyi Xikwembu xi va khathaleleke ha yona. Kutani Yehovha u rhumele tinyoka ta vuxungu leswaku ti lumetela Vaisrayele. Tinyoka leti ti va lumeterile, naswona vo tala va vona va file.

Vaisrayele va lumiwe hi tinyoka

Eku heteleleni vanhu va byele Muxe va ku: ‘Hi dyohile, hikuva hi pfukele Yehovha na wena. Hi kombela u khongela eka Yehovha leswaku a susa tinyoka leti.’

Hiloko Muxe a va khongelela. Kutani Yehovha u byele Muxe leswaku a endla nyoka leyi ya koporo. U vule leswaku a yi tsondzela emhandzini, nileswaku un’wana ni un’wana loyi a lumiweke u fanele a yi languta. Muxe u endle hilaha Xikwembu xi vuleke hakona. Kutani vanhu lava lumiweke va langute nyoka ya koporo hiloko va hola.

Hi dyondza swo karhi emhakeni leyi. Hi ndlela yo karhi, hinkwerhu hi fana ni Vaisrayele lava lumiweke hi tinyoka leti. Hinkwerhu ha fa. Rhala-rhala, u ta vona leswaku vanhu va dyuhala, va vabya ni ku fa. Sweswo swi vangiwe hileswi wanuna ni wansati wo sungula, Adamu na Evha, va xandzukeleke Yehovha naswona hinkwerhu ka hina hi vana va vona. Kambe Yehovha u endle lunghiselelo ra leswaku hi hanya hilaha ku nga heriki.

Yehovha u rhumele N’wana wakwe, Yesu Kreste, emisaveni. Yesu u hayekiwe emhandzini, hikuva vanhu vo tala a va ehleketa leswaku i mudyohi. Kambe Yehovha u nyikele hi Yesu leswaku a hi ponisa. Loko hi n’wi languta, loko hi n’wi landzela, hi nga kuma vutomi lebyi nga heriki. Kambe hi ta dyondza hi mhaka leyi hi ku famba ka nkarhi.

Tinhlayo 21:4-9; Yohane 3:14, 15.



Swivutiso

  • Exifanisweni, i yini lexi tsondzeleke emhandzini naswona ha yini Yehovha a byele Muxe leswaku a xi veka kwalaho?
  • Xana vanhu va swi kombise njhani leswaku a va na wona moya wo nkhensa hinkwaswo leswi Xikwembu xi va endleleke swona?
  • I yini leswi vanhu va kombeleke Muxe leswaku a swi endla endzhaku ka loko Yehovha a rhumele tinyoka ta vuxungu leswaku ti va luma?
  • Ha yini Yehovha a byele Muxe leswaku a endla nyoka ya koporo?
  • Hi dyondza yini emhakeni leyi?

Swivutiso swo engetela

  • Hlaya Tinhlayo 21:4-9.

    Hi xihi xitsundzuxo lexi hi nyikiweke xona hi ku gungula ka Vaisrayele malunghana ni malunghiselelo ya Yehovha?

    Eka malembe-xidzana lama hundzeke, xana Vaisrayele va yi tirhise njhani nyoka ya koporo naswona hi rihi goza leri tekiweke hi Hosi Hezekiya?

  • Hlaya Yohane 3:14, 15.

    Xana ku vekiwa ka nyoka ya koporo emhandzini ku ku fanekisela hi ndlela yihi ku beleriwa ka Yesu Kreste emhandzini?