Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 39: Nhonga Ya Aroni Yi Hluka Swiluva

Dyondzo 39: Nhonga Ya Aroni Yi Hluka Swiluva

Vona swiluva ni tialmondi leti wupfeke leswi mileke enhongeni leyi. Nhonga leyi a yi ri ya Aroni. Swiluva ni mihandzu leyi wupfeke enhongeni ya Aroni swi hluke hi vusiku byin’we ntsena! A hi voneni leswaku ha yini.

Muxe a nyika Aroni nhonga leyi hlukeke swiluva

Se i khale Vaisrayele va ri emananga. Vanhu van’wana a va ehleketa leswaku Muxe a nga fanelanga a va murhangeri nileswaku Aroni a nga fanelanga a va muprista lonkulu. I Kora na Dathani, Abirama ni varhangeri va 250 va vanhu, lava ehleketaka hi ndlela leyi. Vanhu lava hinkwavo va te eka Muxe va ku: ‘Ha yini u titlakusa ehenhla ka hina?’

Muxe u byele Kora ni valandzeri vakwe a ku: ‘Mundzuku leri xaka tekani swo tamela ndzilo mi veka murhi wa risuna ehenhla ka swona. Kutani mi ta etabernakeleni ya Yehovha. Hi ta vona loyi Yehovha a nga ta n’wi hlawula.’

Hi xamundzuku wa kona Kora ni valandzeri vakwe va 250 va te etabernakeleni. Ku te ni vanhu vo tala va ta seketela vavanuna lava. Yehovha a a hlundzuke ngopfu. Muxe u te: ‘Fambelani ekule ni mitsonga ya vanhu lava vo biha. Mi nga khumbi nchumu lexi nga xa vona.’ Vanhu va yingisile kutani va fambela ekule ni mitsonga ya Kora, Dathani na Abirama.

Hiloko Muxe a ku: ‘Mi ta tiva loyi Yehovha a n’wi hlawuleke. Misava yi ta pfuleka kutani yi mita vanhu lava vo biha.’

Hi ku hatlisa loko Muxe a heta ku vulavula, misava yi pfulekile. Nxaxa wa Kora ni swilo swakwe na Dathani na Abirama ni hinkwavo lava a va ri na vona va nghene ehansi, kutani misava yi va funengeta. Loko vanhu va twa xirilo xa lava a va funengetiwa hi misava va huwelerile va ku: ‘Balekani! Misava yi ta hi mita na hina!

Kora ni valandzeri vakwe va 250 a va ha ri ekusuhi na tabernakela. Hiloko Yehovha a rhumela ndzilo kutani hinkwavo va tshwa. Kutani Yehovha u byele Eliyazara n’wana wa Aroni leswaku a teka swo tamela ndzilo swa vanhu lava feke kutani a endla xifunengeto xo vevuka xa alitari ha swona. Xifunengeto lexi xa alitari a xi ta va xitsundzuxo eka Vaisrayele xa leswaku a nga kona munhu la nga ta va muprista wa Yehovha handle ka Aroni ni vana vakwe.

Kambe Yehovha a a lava ku kombisa leswaku u hlawule Aroni ni vana vakwe ntsena leswaku va va vaprista. Kutani u byele Muxe a ku: ‘Byela murhangeri wa nyimba yin’wana ni yin’wana ya Israyele leswaku a tisa nhonga yakwe. Eka nyimba ya Levhi, byela Aroni a tisa nhonga yakwe. Veka tinhonga teto etabernakeleni emahlweni ka areka ya ntwanano. Nhonga ya wanuna loyi ndzi n’wi hlawuleke ku va muprista yi ta hluka swiluva.’

Loko Muxe a kambela hi mixo lowu landzelaka, waswivo, nhonga ya Aroni a yi ri ni swiluva ni tialmondi leti wupfeke! Xana wa swi vona leswaku ha yini Yehovha a endle leswaku nhonga ya Aroni yi hluka swiluva?

Tinhlayo 16:1-49; 17:1-11; 26:10.



Swivutiso

  • I vamani lava xandzukeleke vulawuri bya Muxe na Aroni, naswona va te yini eka Muxe?
  • Xana Muxe u byele Kora swin’we ni valandzeri vakwe va 250 leswaku va endla yini?
  • Xana Muxe u va byele yini vanhu, naswona ku humelele yini loko a heta ku vulavula?
  • Xana ku humelele yini hi Kora swin’we ni valandzeri vakwe va 250?
  • Xana Eliyazara lowa n’wana Aroni u endle yini hi tinhlambeto ta vanhu lava feke, naswona ha yini?
  • Ha yini Yehovha a endle leswaku nhonga ya Aroni yi hluka swiluva?

Swivutiso swo engetela

  • Hlaya Tinhlayo 16:1-49.

    I yini leswi Kora ni valandzeri vakwe va swi endleke, naswona ha yini xiendlo xexo a xi kombisa ku xandzukela Yehovha?

    Hi rihi langutelo leri hoxeke leri Kora ni “tindhuna ta ntshungu” ta 250 va veke na rona?

  • Hlaya Tinhlayo 17:1-11 na 26:10.

    Xana ku hluka ka nhonga ya Aroni a swi kombisa yini, naswona ha yini Yehovha a lerise leswaku yi tshama earekeni?

    Hi yihi dyondzo ya nkoka leyi hi nga yi kumaka eka xikombiso xa nhonga ya Aroni?

DYONDZA SWO TALA

Khadi Ra Bibele Ra Aroni

Ha yini a nga swi kotanga ku nghena eTikweni ra Xitshembiso?