Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 38: Ta Vakamberi Va 12

Dyondzo 38: Ta Vakamberi Va 12
Vakamberi va Vaisrayele va rhwale mihandzu

Vona mihandzu leyi khomiweke hi vavanuna lava. Wa nga vona ndlela leyi xichocho lexa madiriva xi nga xikulu ha yona. A swi lava vavanuna vambirhi leswaku va xi rhwala hi mhandzi. Wa nga vona makuwa ni magrenada. Xana mihandzu leyi yo saseka a yi huma kwihi? A yi huma etikweni ra Kanana. Tsundzuka leswaku eKanana hi laha a ku tshama Abrahama, Isaka na Yakobe. Kambe hikwalaho ka leswi a ku ri ni dyandza etikweni rero, Yakobe ni ndyangu wakwe va rhurhele aEgipta. Kambe, endzhaku ka malembe ya 216, Muxe u rhangele Vaisrayele ku tlhelela eKanana. Va fike endhawini leyi vuriwaka Kadexi emananga.

EKanana a ku tshama vanhu vo biha. Kutani Muxe u rhumele tinhlori ta 12 naswona u ti byele a ku: ‘Fambani mi ya kambela leswaku ku tshama vanhu vangani kwalaho nileswaku va ni matimba ku fikela kwihi. Mi kambela niloko tiko ri nonile. Naswona mi tiyiseka leswaku mi vuya ni mihandzu yin’wana.’

Loko tinhlori ti vuya eKadexi, ti byele Muxe ti ku: ‘Hakunene i tiko lerinene.’ Leswaku ti tiyisekisa leswi ti swi vulaka, ti kombe Muxe mihandzu yin’wana. Kambe tinhlori ta khume ti te: ‘Vanhu lava tshamaka kona i swihontlovila. Va ta hi dlaya loko ho ringeta ku va tekela tiko.’

Vaisrayele va chuhe ngopfu loko va twa mhaka leyi. Va ku: ‘A swi ta antswa loko a hi lo fela etikweni ra Egipta kumbe loko a hi lo fela emananga. Hi ta dlayiwa enyimpini naswona vasati va hina ni vana va hina va ta tekiwa. A hi hlawuleni murhangeri la nga ta siva Muxe, kutani hi tlhelela aEgipta!’

Kambe tinhlori timbirhi ti tshembele eka Yehovha, ti ringeta ku khongotela vanhu. Mavito ya tona i Yoxuwa na Kalebe. Ti te: ‘Mi nga chavi. Yehovha u na hina. Tiko leri hi ta ri teka hi ku olova.’ Kambe vanhu a va yingisanga. A va lava ni ku dlaya Yoxuwa na Kalebe.

Mhaka leyi yi n’wi hlundzukise ngopfu Yehovha lerova u byele Muxe a ku: ‘Vanhu hinkwavo lava nga ni malembe ya 20 ku ya ehenhla a va nge ngheni etikweni ra Kanana. Va ma vonile masingita lawa ndzi ma endleke aEgipta ni le mananga, kambe a va ndzi tshembi ni sweswi. Kutani va ta tsendzeleka emananga ku ringana malembe ya 40 kukondza va fa hinkwavo. I Yoxuwa na Kalebe ntsena lava nga ta nghena etikweni ra Kanana.’

Tinhlayo 13:1-33; 14:1-38.



Swivutiso

  • I yini lexi u xi xiyaka hi xichocho xa madiriva lexi nga laha xifanisweni lexi, naswona xi huma kwihi?
  • Ha yini Muxe a rhume vakamberi va 12 etikweni ra Kanana?
  • Xana vakamberi va khume va te yini loko va tlhelela eka Muxe?
  • Xana vakamberi vambirhi va swi kombise njhani leswaku va tshemba Yehovha, naswona i vamani mavito ya vona?
  • Ha yini Yehovha a hlundzukile, naswona u byele Muxe a ku yini?

Swivutiso swo engetela

  • Hlaya Tinhlayo 13:1-33.

    I vamani lava hlawuriweke ku ya kambela tiko, naswona hi rihi lunghelo lerikulu leri a va ri na rona?

    Ha yini langutelo ra Yoxuwa ni ra Kalebe a ri hambanile ni ra vakamberi lavan’wana, naswona hi dyondza yini emhakeni leyi?

  • Hlaya Tinhlayo 14:1-38.

    Hi xihi xitsundzuxo lexi hi faneleke hi xi yingisa malunghana ni ku gungulela vanhu lava yimelaka Yehovha laha misaveni?

    Xana Tinhlayo 14:24 yi swi kombisa njhani leswaku Yehovha u tsakela malandza ya yena hinkwawo?

DYONDZA SWO TALA

Khadi Ra Bibele Ra Yoxuwa

Xana Yoxuwa ni mavuthu yakwe va ma wise njhani marhangu ya muti wa Yeriko? Printa khadi leri ra Bibele naswona u dyondza leswi engetelekeke hi wanuna loyi wa le Bibeleni la nga ni xivindzi.