Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 37: Tende Ro Gandzelela Eka Rona

Dyondzo 37: Tende Ro Gandzelela Eka Rona

Xana wa swi tiva leswaku muako lowu a ku ri wa yini? A ku ri tende ro hlawuleka leri a ku gandzeriwa Yehovha eka rona. Nakambe a ri vuriwa tabernakela. Vanhu va hete ku ri aka endzhaku ka lembe va humile aEgipta. Xana wa swi tiva leswaku i mani la teke ni makungu yo ri aka?

Tabernakela

A ku ri makungu ya Yehovha. Loko Muxe a tlhandlukele eNtshaveni ya Sinayi, Yehovha u n’wi byele leswaku a ri aka. U vule leswaku ri akiwa hi ndlela leyi swi nga ta olova ku ri hahlula. Hi ndlela yoleyo, swiphemu swa rona a swi kota ku yisiwa endhawini yin’wana kutani swi tlhela swi hlanganisiwa kona. Hikwalaho loko Vaisrayele va rhurha-rhurha emananga, a va rhwala tende leri va famba na rona.

Loko u languta endzeni ka xikamarana lexi nga emakumu ka tende, ku ni bokisi. Bokisi leri ri vuriwa areka ya ntwanano. A ri ri ni tintsumi timbirhi kumbe makerubu lama endliweke hi nsuku, ti yime ematlhelo hamambirhi. Xikwembu xi tlhele xi tsala Swileriso swa Khume eka swiphepherhele swimbirhi swa maribye hikuva Muxe u faye layo sungula. Naswona maribye lawa a ma vekiwe endzeni ka areka ya ntwanano. A ku vekiwe ni khuwana ra manna endzeni ka yona. Xana wa tsundzuka leswaku i yini manna?

Yehovha u hlawule Aroni, makwavo wa Muxe, leswaku a va muprista lonkulu. A a rhangela vanhu eku gandzeleni Yehovha. Vana vakwe na vona a va ri vaprista.

Sweswi languta endzeni ka kamara lerikulu ra tende. Rona a ri tlula xikamarana kambirhi hi vukulu. Xana wa ri vona bokisi ni musi lowu tuvikaka eka rona? Bokisi leri a ku ri alitari leyi vaprista a va hisela murhi wa risuna lowu nun’hwelaka eka rona. Kutani a ku ri ni xitlhoma-rivoni lexi nga ni timboni ta nkombo. Naswona nchumu wa vunharhu ekamareni leri i tafula. Eka rona a ku ri ni swinkwa swa 12.

Ejaritini ra tabernakela a ku ri ni nkambana lowukulu kumbe xibya lexi teleke hi mati. Vaprista a va hlambela eka xona. Nakambe a ku ni alitari leyikulu. Kwalaho a ku hisiwa swifuwo leswi dlayiweke leswaku swi va xitlhavelo eka Yehovha. Tende a ri vekiwe exikarhi ka nxaxa, naswona Vaisrayele a va dzime mintsonga ya vona yi rhendzela tende leri

Eksoda 25:8-40; 26:1-37; 27:1-8; 28:1; 30:1-10, 17-21; 34:1, 2; Vaheveru 9:1-5.



Swivutiso

  • Xana muako lowu nga exifanisweni lexi wu vuriwa yini, naswona a wu tirhiseriwa yini?
  • Ha yini Yehovha a byele Muxe ku aka tende leswaku ri ta kota ku hahluriwa hi ku olova?
  • I yini bokisi leri nga exikamaranini emakumu ka ntsonga, naswona ku na yini endzeni ka bokisi leri?
  • I mani loyi Yehovha a n’wi hlawuleke ku va muprista lonkulu, naswona muprista lonkulu a a endla yini?
  • Boxa swilo swinharhu leswi nga ekamareni lerikulu ra ntsoga.
  • Hi swihi swilo swimbirhi leswi nga erivaleni ra tabernakela, naswona swi tirhisiwa ku endla yini?

Swivutiso swo engetela

  • Hlaya Eksoda 25:8-40; 26:1-37; 27:1-8; na 28:1.

    Xana makerubu lama nga ehenhla “ka areka ya vumbhoni” a ma yimela yini?

  • Hlaya Eksoda 30:1-10, 17-21; 34:1, 2; na Vaheveru 9:1-5.

    Ha yini Yehovha a kombise leswaku i swa nkoka leswaku vaprista lava tirhaka etabernakeleni va tshama va basile, naswona mhaka leyi yi fanele yi hi khumba njhani namuntlha?

    Xana muapostola Pawulo u swi kombise njhani leswaku tabernakele ni Nawu wa ntwanano a wu nga ha tirhi enkarhini lowu a tsaleleke Vakreste va Vaheveru papila ha wona?