Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 35: Yehovha U Va Nyika Milawu Yakwe

Dyondzo 35: Yehovha U Va Nyika Milawu Yakwe

Kwalomu ka tin’hweti timbirhi endzhaku ka loko va hume aEgipta, Vaisrayele va fike eNtshaveni ya Sinayi leyi nakambe a yi vuriwa Horebe. Leyi hi yona ndhawu leyi Yehovha a vulavuleke na Muxe eka yona exihlahleni lexi pfurhaka. Vanhu va dzime mixaxa kwalaho kutani va tshama swa xinkarhana.

Loko vanhu va ha rindzile, Muxe u khandziye ntshava. Le henhla ka ntshava, Yehovha u byele Muxe leswaku U lava leswaku Vaisrayele va N’wi yingisa nileswaku va va vanhu va Yena vo hlawuleka. Loko Muxe a xika entshaveni, u byele Vaisrayele leswi Yehovha a swi vuleke. Kutani va vule leswaku va ta n’wi yingisa Yehovha, hikuva va lava ku va vanhu va yena.

Hi nkarhi wolowo Yehovha u endle nchumu wo hlamarisa. U endle leswaku ntshava yi tuvika musi naswona ku va ni ku dzindza ka tilo. Nakambe u vulavule ni vanhu a ku: ‘Hi mina Yehovha Xikwembu xa n’wina, lexi mi humeseke etikweni ra Egipta.’ Hiloko a lerisa a ku: ‘Mi nga tshuki mi gandzela swikwembu swin’wana handle ka mina.’

Swiphepherhele swimbirhi swa maribye

Xikwembu xi nyike Vaisrayele swileriso kumbe milawu yin’wana ya kaye. Vanhu a va chuhe ngopfu. Va byele Muxe va ku: ‘Wena vulavula na hina, hikuva ha chava, loko Xikwembu xo vulavula na hina hi nga fa.’

Endzhakunyana Yehovha u byele Muxe a ku: ‘Tlhandlukela eka mina entshaveni. Ndzi ta ku nyika swiphepherhele swa maribye laha eka swona ndzi tsaleke swileriso leswi ndzi lavaka vanhu va mina va hanya ha swona.’ Hiloko Muxe a tlhandlukela entshaveni nakambe. U hete masiku ya 40 kwalaho.

Xikwembu xi nyike vanhu va xona swileriso swo tala swinene. Muxe u swi tsale ehansi swileriso leswi. Xikwembu xi tlhele xi nyika Muxe swiphepherhele swimbirhi swa maribye. Eka swona, Xikwembu hi xoxe a xi tsale swileriso swa khume leswi xi swi leriseke vanhu hinkwavo. Swi vuriwa Swileriso swa Khume.

Muxe eNtshaveni ya Sinayi

Swileriso swa Khume a swi ri milawu ya nkoka swinene. Kambe swi tano ni hi milawu yin’wana yo tala leyi Xikwembu xi yi nyikeke Vaisrayele. Wun’wana wa milawu leyi hi lowu nge: ‘U fanele u rhandza Yehovha Xikwembu xa wena hi mbilu ya wena hinkwayo ni hi mianakanyo ya wena hinkwayo ni hi moya-xiviri wa wena hinkwawo ni hi matimba ya wena hinkwawo.’ Wun’wana wu ri: ‘U fanele u rhandza warikwenu kukota loko u tirhandza.’ N’wana wa Xikwembu, Yesu Kreste u vule leswaku leyi hi yona milawu yimbirhi leyikulu eka hinkwayo leyi Yehovha a yi nyikeke vanhu va yena, ku nga Vaisrayele. Enkarhini lowu taka, hi ta dyondza swilo swo tala malunghana ni N’wana wa Xikwembu swin’we ni tidyondzo ta yena.

Eksoda 19:1-25; 20:1-21; 24:12-18; 31:18; Deteronoma 6:4-6; Levhitika 19:18; Matewu 22:36-40.



Swivutiso

  • Kwalomu ka tin’hweti timbirhi endzhaku ka loko Vaisrayele va suke aEgipta, xana va fike va tshama kwihi swa xinkarhana?
  • Xana Yehovha u vule leswaku a a lava leswaku vanhu va endla yini, naswona va hlamule njhani?
  • Ha yini Yehovha a nyike Muxe maribye mambirhi ya swiphepherhele?
  • Handle ka Swileriso swa Khume, hi swihi swileriso swin’wana leswi Yehovha a swi nyikeke Vaisrayele?
  • Hi yini milawu yimbirhi leyi Yesu Kreste a vuleke leswaku i yikulu eka hinkwayo?

Swivutiso swo engetela

  • Hlaya Eksoda 19:1-25; 20:1-21; 24:12-18; na 31:18.

    Xana marito lama rhekhodiweke eka Eksoda 19:8 ma hi pfuna njhani leswaku hi twisisa leswi katsekaka loko munhu a tinyiketela ku va Mukreste?

  • Hlaya Deteronoma 6:4-6; Levhitika 19:18; na Matewu 22:36-40.

    Xana Vakreste va swi kombisa njhani leswaku va rhandza Xikwembu ni vaakelani va vona?