Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 34: Swakudya Leswintshwa

Dyondzo 34: Swakudya Leswintshwa

Xana wa swi tiva swilo leswi vanhu lava a va swi rhwalela laha hansi? Swi fana ni gamboko. A swi ri swo basa, swa xiphepherhele naswona a swi olova. Kambe a ku nga ri gamboko; a ku ri swakudya.

Vaisrayele va ri karhi va rhwalela manna

N’hweti a ya ha ku hela ku sukela loko Vaisrayele va humile aEgipta. A va ri emananga. Swakudya a swi nga nyawuli kwalaho, xisweswo vanhu a va gungula, va ku: ‘Loko Yehovha a a lo hi dlaya aEgipta. Laha a hi tshama kona a hi ri ni swakudya hinkwaswo leswi hi swi lavaka.’

Kutani Yehovha a ku: ‘Ndzi ta nisa swakudya swi huma etilweni.’ Naswona hileswi Yehovha a swi endleke. Hi xamundzuku wa kona loko Vaisrayele va vona swilo swo basa ehansi, va vutisana va ku: ‘I yini swilo leswi?’

Muxe a ku: ‘Leswi i swakudya leswi Yehovha a mi nyikeke swona.’ Vanhu va swi vitana MANNA. A swi nandziha ku fana ni makhekhe lama endliweke hi vulombe.

Muxe u byele vanhu a ku: ‘Rhwalelani ntsena leswi mi nga ta swi dya.’ A va hamba va swi rholela mixo wun’wana ni wun’wana. Kutani, loko dyambu ri hisa, manna leyi seleke ehansi a yi n’oka.

Nakambe Muxe u te: ‘A ku na munhu la nga ta siya manna a yi vekela mundzuku.’ Kambe van’wana a va yingisanga. Xana wa swi tiva leswi humeleleke? Hi xamundzuku wa kona manna leyi va yi siyeke a yi pfuka yi ri ni swivungwana naswona a yi sungula ku nun’hwa!

Hambiswiritano, a ku ri ni siku rin’we evhikini leri Yehovha a a va byela leswaku va rholela manna hi mpimo lowu phindhiweke kambirhi. Rero a ku ri siku ra vutsevu. Naswona Yehovha u va byele leswaku va dya va siyela ni siku leri landzelaka, hikuva a nge yi nisi hi siku ra vunkombo. Loko va veka manna ku fikela siku ra vunkombo, a yi nga boli naswona a yi nga nun’hwi! Leri a ku ri singita rin’wana!

Malembe hinkwawo lawa Vaisrayele va ma heteke emananga, Yehovha a a va wundla hi manna.

Eksoda 16:1-36; Tinhlayo 11:7-9; Yoxuwa 5:10-12.



Swivutiso

  • Exifanisweni, i yini leswi vanhu va swi rholelaka ehansi, naswona swi vuriwa yini?
  • Hi swihi swiletelo leswi Muxe a swi nyikeke vanhu malunghana ni ku rholela manna?
  • Xana Yehovha u byele vanhu leswaku va endla yini hi siku ra vutsevu, naswona ha yini?
  • Hi rihi singita leri endliweke hi Yehovha loko manna yi hlayiseriwa siku ra vunkombo?
  • Xana Yehovha u phamele vanhu manna nkarhi wo tanihi kwihi?

Swivutiso swo engetela

  • Hlaya Eksoda 16:1-36 na Tinhlayo 11:7-9.

    Xana Eksoda 16:8 yi hi dyondzisa yini malunghana ni ku xixima lava hlawuriweke hi moya leswaku va rhangela evandlheni ra Vukreste?

    Xana Vaisrayele a va hamba va tsundzuxiwa njhani siku ni siku leswaku va titshega hi Yehovha loko va ri emananga?

    Hi yihi nhlamuselo yo fanekisela leyi nyikeriweke hi Yesu malunghana ni manna, naswona hi vuyeriwa njhani hi “xinkwa [lexi] xo huma etilweni”?

  • Hlaya Yoxuwa 5:10-12.

    Xana Vaisrayele va yi dye malembe mangani manna, sweswo swi va ringe njhani, naswona hi dyondza yini emhakeni leyi?