Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 33: Ku Pela Lwandle Ro Tshwuka

Dyondzo 33: Ku Pela Lwandle Ro Tshwuka

Vona leswi humelelaka! Luya i Muxe la tshambuluteke nhonga yakwe ehenhla ka Lwandle ro Tshwuka. Vanhu lava nga na yena lava poneke etlhelo lerin’wana i Vaisrayele. Kambe Faro swin’we ni vuthu rakwe hinkwaro va nwele elwandle. A hi voneni leswaku swi tise ku yini.

Vuthu ra Vaegipta ri ri karhi ri nwela

Hilaha hi dyondzeke hakona, Faro u byele Vaisrayele leswaku va huma aEgipta endzhaku ka loko Xikwembu xi tisele Vaegipta khombo ra vukhume. Vaisrayele va kwalomu ka 600 000 va humile swin’we ni vavasati ni vana. Nakambe, ntshungu lowukulu wa vanhu van’wana lava hundzukeke vagandzeri va Yehovha wu fambe ni Vaisrayele. Hinkwavo va fambe ni tinyimpfu, timbuti ni tihomu ta vona.

Loko va nga si suka, Vaisrayele va kombele swiambalo ni swilo leswi endliweke hi nsuku ni silivhere eka Vaegipta. Vaegipta a va chuhe ngopfu hikwalaho ka khombo ro hetelela leri va weleke. Hikwalaho va nyike Vaisrayele swilo hinkwaswo leswi va swi kombeleke.

Endzhaku ka masiku yo hlayanyana, Vaisrayele va fike eLwandle ro Tshwuka. Va fike va wisa kwalaho. Enkarhini wolowo, Faro ni vavanuna vakwe va sungule ku tisola hileswi va tshikeke Vaisrayele va famba. Va te: ‘Hi tshike mahlonga ya hina ma famba!’

Kutani Faro u tlhele a cinca mianakanyo yakwe. Hi ku hatlisa u lunghiselele tigolonyi takwe ta nyimpi swin’we ni vuthu rakwe. Hiloko a sungula ku hlongorisa Vaisrayele hi tigolonyi to hlawuleka ta 600 swin’we ni hi tigolonyi hinkwato ta le Egipta.

Loko Vaisrayele va vona Faro ni vuthu rakwe va ta hi le ndzhaku, a va chuhe ngopfu. A ku nga ri na ko balekela kona. Etlhelo ka vona a ku ri ni Lwandle ro Tshwuka kasi Vaegipta a va ta hi tlhelo lerin’wanyana. Kambe Yehovha a veka papa exikarhi ka vanhu vakwe ni Vaegipta. Kutani Vaegipta a va nga swi koti ku vona Vaisrayele leswaku va va hlasela.

Hiloko Yehovha a byela Muxe leswaku a tshambuluta nhonga yakwe ehenhla ka Lwandle ro Tshwuka. Loko a endle tano, Yehovha u vange leswaku ku hunga xidzedze lexikulu xa le vuxeni. Mati ya lwandle ma pandzeka hi le xikarhi, ma yima ematlhelweni mambirhi.

Kutani Vaisrayele va sungula ku famba va tsemakanya lwandle hi le ndhawini leyi omeke. Ku hele tiawara leswaku vanhu va timiliyoni swin’we ni swifuwo swa vona va tsemakanya lwandle va hlayisekile. Eku heteleleni Vaegipta a va kota ku vona Vaisrayele nakambe. Mahlonga ya vona se a ma baleka! A va ha yima-yimanga, va lo nghena elwandle va va sala ndzhaku.

Loko va nghenile, Xikwembu xi endle leswaku mavhilwa ya tigolonyi ta vona ma tshoveka. Vaegipta va sungule ku chava ngopfu kutani va huwelela va ku: ‘Yehovha u yima ni Vaisrayele, u lwa na hina. A hi humeni laha!’ Kambe nkarhi a wu nga ha ri kona.

Hi wona nkarhi lowu Yehovha a byeleke Muxe leswaku a tshambuluta nhonga yakwe ehenhla ka Lwandle ro Tshwuka, hilaha u swi vonaka hakona exifanisweni lexi. Loko Muxe a yi tshambuluta, makhumbi ya mati ma sungule ku wa kutani mati ma funengeta Vaegipta swin’we ni tigolonyi ta vona ta nyimpi. Vuthu hinkwaro a ri landzele Vaisrayele elwandle. Naswona a nga kona Muegipta la poneke kwalaho!

Vanhu va Xikwembu a va tsake ngopfu hi ku va va ponile! Vavanuna va yimbelele risimu ro nkhensa Yehovha va ku: ‘Yehovha u hlule nyimpi leyikulu. U hoxe tihanci ni vagadi va tona elwandle.’ Meriyamu, sesi wa Muxe u teke xingomana kutani vavasati hinkwavo va n’wi landzela hi swingomana swa vona. Loko va ri karhi va cina va tsakile, a va yimbelela risimu swin’we ni vavanuna, va ku: ‘Yehovha u hlule nyimpi leyikulu. U hoxe tihanci ni vagadi va tona elwandle.’

Eksoda tindzima 12 ku ya eka 15.



Swivutiso

  • I vangani vavanuna, vavasati ni vana lava nga Vaisrayele lava rhurheke aEgipta, naswona i vamani lava va rhurheke na vona?
  • Xana Faro u titwe njhani endzhaku ka loko a ntshunxe Vaisrayele va famba, naswona u endle yini?
  • Xana Yehovha u endle yini leswaku a yimisa Vaegipta leswaku va nga hlaseli vanhu vakwe?
  • Ku humelele yini loko Muxe a tshambulute nhonga yakwe ehenhla ka Lwandle ro Tshwuka, naswona Vaisrayele va endle yini?
  • Ku humelele yini loko Vaegipta va nghene elwandle va hlongorisa Vaisrayele?
  • Vaisrayele va endle yini ku kombisa leswaku a va tsakile naswona a va nkhensa Yehovha leswi va poneke?

Swivutiso swo engetela

  • Hlaya Eksoda 12:33-36.

    Xana Yehovha u tiyiseke njhani leswaku vanhu va yena va hakeriwa hikwalaho ka malembe hinkwawo lawa va ma heteke va ri mahlonga ehansi ka Vaegipta?

  • Hlaya Eksoda 14:1-31.

    Xana marito ya Muxe lama rhekhodiweke eka Eksoda 14:13, 14 ma wa khumba njhani malandza ya Yehovha namuntlha tanihi leswi ma langutaneke ni nyimpi leyi taka ya Armagedoni?

  • Hlaya Eksoda 15:1-8, 20, 21.

    Ha yini malandza ya Yehovha ma fanele ma n’wi yimbelelela swidzuniso?

    Loko va ri eLwandle ro Tshwuka, xana Meriyamu ni vavasati van’wana va va vekele xikombiso xihi vavasati lava nga Vakreste namuntlha?

DYONDZA SWO TALA

Yehovha A Ponisa Vaisrayele

Ha yini Muxe a a nga ri chavi vuthu ra Vaegipta hambileswi Vaisrayele vo tala a va chava?