Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 32: Makhombo Ya 10

Dyondzo 32: Makhombo Ya 10

Languta swifaniso leswi. Xin’wana ni xin’wana xi kombisa khombo leri Yehovha a ri tiseke aEgipta. Exifanisweni xo sungula i Aroni loyi a a ba Nambu wa Nayili hi nhonga yakwe. Loko a heta ku endla tano, mati ya nambu wolowo ma hundzuke ngati. Tinhlampfi ti file kutani nambu wu sungule ku nun’hwa.

Makhombo lama hlaseleke Vaegipta

Endzhaku ka sweswo Yehovha u endle leswaku ku huma machela eNambyeni wa Nayili. A ma tele hinkwako—eswitikweni, emapotweni, emibedweni ya vanhu—kun’wana ni kun’wana. Loko machela ma fa, Vaegipta va ma hlengelete ma va tinhulu letikulu naswona tiko a ri nun’hwa hikwalaho ka wona.

Kutani Aroni a ba ntshuri hi nhonga, hiloko ntshuri wu hundzuka tinyonyorhi. Tinyonyorhi i switsotswana leswi lumaka. Tinyonyorhi a ti ri khombo ra vunharhu leri weleke tiko ra Egipta.

Makhombo laman’wana hinkwawo a ma vavisa Vaegipta ntsena, ku nga ri Vaisrayele. Khombo ra vumune a ku ri ra mabawa lama ngheneke tindlwini ta Vaegipta hinkwavo. Khombo ra vuntlhanu ri wele swifuwo. Ku fe tihomu, tinyimpfu ni timbuti to tala ta Vaegipta.

Endzhaku ka sweswo, Muxe na Aroni va teke nkuma va wu haxa emoyeni. Wu endle leswaku swiharhi ni vanhu va huma marhumba yo chavisa. Leri a ku ri khombo ra vutsevu.

Endzhaku ka rona Muxe u tlakusele voko rakwe ehenhla, kutani Yehovha a rhumela tilo ni xihangu. Xexo a ku ri xihangu lexikulu swinene lexi nga si tshamaka xi voniwa aEgipta.

Khombo ra vunhungu a ku ri tinjiya to tala. A ku nga si tshama ku va ni tinjiya to tala hi ndlela yoleyo naswona a ta ha tlhelanga ti va kona. Ti dye hinkwaswo leswi xihangu xi nga swi onhangiki.

Khombo ra vukaye a ku ri munyama. Munyama wu funengete tiko ku ringana masiku manharhu kambe laha a ku tshama Vaisrayele a ku ri ni ku vonakala.

Eku heteleleni, Xikwembu xi byele vanhu va xona leswaku va xuva hi ngati ya ximbutana kumbe xinyimpfana emarimbeni ya tinyangwa ta vona. Hiloko ntsumi ya Xikwembu yi hundza hi le Egipta. Loko ntsumi yi vona ngati, a yi nga dlayi munhu endlwini yoleyo. Kambe etindlwini hinkwato laha ku nga kumekangiki ngati emarimbeni, ntsumi ya Xikwembu yi dlaye mativula hinkwawo ya vanhu ni ya swiharhi. Leri a ku ri khombo ra vukhume.

Endzhaku ka khombo leri ra vukhume, Faro u ntshunxe Vaisrayele. Vanhu va Xikwembu a va lunghekele ku famba, kutani hi vusiku byebyo va sungule ku gwirima va huma aEgipta.

Eksoda tindzima 7 ku ya eka 12.



Swivutiso

  • Hi ku tirhisa swifaniso leswi nga laha, hlamusela makhombo manharhu yo sungula lama Yehovha a ma tiseke aEgipta.
  • Xana makhombo manharhu layo sungula a ma hambane njhani ni laman’wana?
  • Xana a ku ri rihi khombo ra vumune, ra vuntlhanu ni ra vutsevu?
  • Hlamusela khombo ra vunkombo, ra vunhungu ni ra vukaye.
  • Xana Yehovha u byele Vaisrayele leswaku va endla yini loko ku nga si tisiwa khombo ra vu-10?
  • Xana khombo ra vu-10 a ku ri rihi, naswona ku endleke yini endzhaku ka rona?

Swivutiso swo engetela

  • Hlaya Eksoda 7:19-8:23.

    Hambileswi vaprista va le Egipta lava endlaka masalamusi va koteke ku endla makhombo mambirhi yo sungula lama endliweke hi Yehovha, i yini leswi va bohekeke ku swi pfumela endzhaku ka khombo ra vunharhu?

    Xana khombo ra vumune ri byi kombise njhani vuswikoti bya Yehovha byo sirhelela vanhu vakwe, naswona ku tiva leswi swi endla leswaku vanhu va Xikwembu va titwa njhani leswi va langutaneke ni “nhlomulo lowukulu” lowu profetiweke?

  • Hlaya Eksoda 8:24; 9:3, 6, 10, 11, 14, 16, 23-24; na 10:13-15, 21-23.

    Hi yihi mintlawa yimbirhi leyi paluxiweke hi Makhombo ya Khume, naswona sweswo swi ri khumba njhani langutelo ra hina hi mintlawa yoleyo namuntlha?

    Xana Eksoda 9:16 yi hi pfuna njhani leswaku hi twisisa xivangelo lexi endleke leswaku Yehovha a pfumelela Sathana a hambeta a hanya ku fikela namuntlha?

  • Hlaya Eksoda 12:21-32.

    Xana Paseka yi endle leswaku vo tala va ponisiwa hi ndlela yihi, naswona Paseka a yi fanekisela yini?

DYONDZA SWO TALA

Xikwembu Xi Rhuma Muxe aEgipta

Muxe na Aroni va kombise xivindzi loko va vulavula na Faro loyi a ri ni matimba. Kopani tidyondzo leti ivi mi burisana hi tona tanihi ndyangu.