Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 31: Muxe Na Aroni Va Ri Eka Faro

Dyondzo 31: Muxe Na Aroni Va Ri Eka Faro

Loko Muxe a tlhelele aEgipta, u byele makwavo Aroni hi ta masingita lawa hinkwawo. Kutani loko Muxe na Aroni va kombe Vaisrayele masingita lawa, vanhu hinkwavo va khorwile leswaku Yehovha u na vona.

Hiloko Muxe na Aroni va ya eka Faro. Va n’wi byele va ku: ‘Yehovha Xikwembu xa Israyele u ri, “Tshika vanhu va mina va famba ku ringana masiku manharhu leswaku va ta ndzi gandzela emananga.”’ Kambe Faro u hlamule a ku: ‘Yehovha a ndzi n’wi tivi. Naswona a ndzi nge n’wi ntshunxi Israyele.’

Faro a a hlundzuke ngopfu hikuva vanhu a va lava ku xwa entirhweni leswaku va ya gandzela Yehovha. Kutani u va sindzise ku tirha hi matimba ku tlula eku sunguleni. Vaisrayele a va sola Muxe hikwalaho ka leswi a va xanisiwa, naswona Muxe u twe ku vava. Kambe Yehovha u n’wi byele leswaku a nga vileli. Yehovha u te: ‘Ndzi ta endla leswaku Faro a ntshunxa vanhu va mina.’

Muxe na Aroni va ri emahlweni ka Faro

Muxe na Aroni va tlhelele eka Faro. Enkarhini lowu va endle singita. Aroni u lahlele nhonga yakwe ehansi, kutani yi hundzuka nyoka leyikulu. Kambe vangoma va Faro na vona va lahlele tinhonga ta vona ehansi kutani ti hundzuka tinyoka. Kambe languta! Nyoka ya Aroni yi mita tinyoka ta vangoma. Hambiswiritano, Faro a nga va ntshunxanga Vaisrayele.

Kutani ku fike nkarhi wa leswaku Yehovha a dyondzisa Faro leswaku hi yena mani. Xana wa swi tiva leswaku u endle yini? U tise makhombo kumbe mintungu ya 10 aEgipta.

Endzhaku ka makhombo yo tala, Faro u rhumele rito eka Muxe a ku: ‘Yimisa ntungu lowu, ndzi ta ntshunxa Vaisrayele.’ Kambe loko ntungu wu hela, Faro a a ala ku va ntshunxa. A a ala leswaku vanhu va famba. Kambe eku heteleleni, endzhaku ka khombo ra vukhume, Faro u ntshunxe Vaisrayele.

Xana wa ma tiva makhombo lawa ya 10? A hi dyondzeni hi ta makhombo lawa.

Eksoda 4:27-31; 5:1-23; 6:1-13, 26-30; 7:1-13.



Swivutiso

  • Xana masingita lama endliweke hi Muxe na Aroni ma va khumbe njhani Vaisrayele?
  • Xana Muxe na Aroni va n’wi byele yini Faro, naswona Faro u hlamule a ku yini?
  • Hilaha swi kombisiweke hakona exifanisweni lexi, ku humelele yini loko Aroni a hoxe nhonga yakwe ehansi?
  • Xana Yehovha u n’wi dyondzise njhani Faro, naswona Faro u angurise ku yini?
  • Ku humelele yini endzhaku ka khombo ra vukhume?

Swivutiso swo engetela

  • Hlaya Eksoda 4:27-31 na 5:1-23.

    Xana Faro a a vula yini loko a ku: “A ndzi n’wi tivi Yehovha nikatsongo”?

  • Hlaya Eksoda 6:1-13, 26-30.

    Xana Yehovha a nga titivisanga eka Abrahama, Isaka na Yakobe hi ndlela yihi?

    Xana swi hi endla hi titwa njhani ku tiva leswaku Yehovha u n’wi tirhisile Muxe, hambileswi Muxe a a titwa a nga faneleki eka ntirho lowu a nyikiweke wona?

  • Hlaya Eksoda 7:1-13.

    Loko Muxe na Aroni hi xivindzi va byele Faro hi ta vuavanyisi bya Yehovha, xana hi xihi xikombiso lexi va xi vekeleke malandza ya Xikwembu namuntlha?

    Xana Yehovha u ma kombise njhani matimba yakwe lamakulu eka swikwembu swa le Egipta?

DYONDZA SWO TALA

Xikwembu Xi Rhuma Muxe aEgipta

Ha yini Faro a nga yingisanga Muxe na Aroni? Xana ku ve ni vuyelo byihi lebyi chavisaka?