Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 30: Xihlahla Lexi Pfurhaka

Dyondzo 30: Xihlahla Lexi Pfurhaka

Muxe u fambe a ya fika entshaveni ya Horebe leswaku a lavela tinyimpfu takwe byanyi. Kwalaho u vone langavi lerikulu exihlahleni, kambe xona a xi nga tshwi!

Muxe a ri emahlweni ka xihlahla lexi pfurhaka

Muxe u te: ‘Leswi swa hlamarisa. Inge ndzi tshinela leswaku ndzi ta vona kahle.’ Loko a ri ekusuhi, ku twakale rito ri huma exihlahleni ri ku: ‘U nga tshineli ngopfu. Hluvula maphaxani ya wena hikuva ndhawu leyi u yimeke eka yona ya kwetsima.’ A ku ri Xikwembu lexi a xi vulavula hi ku tirhisa ntsumi, kutani Muxe u tipfale xikandza.

Kutani Xikwembu xi ku: ‘Ndzi vone ku xaniseka ka vanhu va mina aEgipta. Kutani ndzi ya eku va ntshunxeni naswona ndzi ta rhuma wena leswaku u ya humesa vanhu va mina aEgipta.’ Yehovha a a lava ku yisa vanhu vakwe etikweni ro saseka ra Kanana.

Kambe Muxe u te: ‘Ndzo va mani mina. Ndzi ta swi endlisa ku yini sweswo? A hi nge ndza ya. Vaisrayele va ta ndzi vutisa va ku, “U rhumiwe hi mani?” Kutani ndzi ta ku yini eka vona?’

Xikwembu xi hlamule xi ku: ‘U ta va byela u ku, “YEHOVHA Xikwembu xa Abrahama, Xikwembu xa Isaka ni Xikwembu xa Yakobe u ndzi rhume eka n’wina.”’ Kutani Yehovha u engetele a ku: ‘Leri i vito ra mina ra hilaha ku nga riki na makumu.’

Muxe u hlamule a ku: ‘A hi nge a va ndzi kholwi loko ndzi va byela leswaku u ndzi rhumile.’

Xikwembu xi n’wi vutise xi ku: ‘U khome yini?’

Muxe u hlamule a ku: ‘I nhonga.’

Xikwembu xi ku: ‘Yi lahlele ehansi.’ Kutani loko Muxe a endla tano, nhonga yi hundzuke nyoka. Hiloko Yehovha a komba Muxe singita rin’wana. U te: ‘Nghenisa voko ra wena endzeni ka nguvu ya wena.’ Muxe u endle tano, kutani loko a humesa voko ra yena, a ri base ku fana ni gamboko! Voko a ri vonaka onge ri biwe hi vuvabyi byo chavisa lebyi vuriwaka nhlokonho. Yehovha u tlhele a nyika Muxe matimba yo endla singita ra vunharhu. Eku heteleleni u te: ‘Loko u endla masingita lawa, Vaisrayele va ta kholwa leswaku u rhumiwe hi mina.’

Endzhaku ka sweswo Muxe u mukile kutani a byela Yetro a ku: ‘Ndzi kombela ku tlhelela eka varikwerhu aEgipta ndzi ya va pfuxela.’ Hiloko Yetro a lelana na Muxe, kutani Muxe a teka riendzo ro tlhelela aEgipta.

Eksoda 3:1-22; 4:1-20.



Swivutiso

  • I mani vito ra ntshava leyi nga laha xifanisweni?
  • Hlamusela nchumu lowu nga tolovelekangiki lowu Muxe a wu voneke loko a ya entshaveni ni tinyimpfu ta yena.
  • Xana rito leri humaka exihlahleni lexi pfurhaka ri te yini naswona a ku ri rito ra mani?
  • Xana Muxe u te yini loko Xikwembu xi n’wi byele leswaku u ta rhangela vanhu va xona ku huma le Egipta?
  • Xana Xikwembu xi byele Muxe leswaku a ku yini loko vo n’wi vutisa leswaku u rhumiwe hi mani?
  • Xana Muxe a a ta swi tiyisekisa njhani leswaku u rhumiwe hi Xikwembu?

Swivutiso swo engetela

  • Hlaya Eksoda 3:1-22.

    Xana mhaka ya Muxe yi hi tiyisekisa njhani leswaku hambiloko hi vona onge a hi faneleki ku endla xiavelo xo karhi lexi humaka eka Xikwembu, Yehovha u ta hi seketela?

  • Hlaya Eksoda 4:1-20.

    Xana langutelo ra Muxe ri cince hi ndlela yihi eka malembe ya 40 lawa a ma heteke a ri eMidiyani, naswona i dyondzo yihi leyi kumiwaka hi lava va lavaka ku kuma malunghelo yo karhi evandlheni?

    Hambiloko Yehovha o hi tshinya hi ku tirhisa nhlengeletano ya yena, xana xikombiso xa Muxe xi hi nyika ntshembo wihi?