Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 27: Hosi Ya Nsele Yi Fuma Egipta

Dyondzo 27: Hosi Ya Nsele Yi Fuma Egipta

Vavanuna lava nga laha va sindzisa vanhu leswaku va tirha. Languta wanuna loyi a baka mutirhi un’wana hi nkhavi! Vatirhi lava a va ri swirho swa ndyangu wa Yakobe naswona a va vuriwa Vaisrayele. Naswona vavanuna lava va va sindzisaka ku tirha i Vaegipta. Vaisrayele va hundzuke mahlonga ya Vaegipta. Xana swi endlekise ku yini?

Vaegipta va ri karhi va xanisa Vaisrayele

Ku hele malembe yo tala ndyangu lowukulu wa Yakobe wu ri karhi wu hanya hi ku rhula aEgipta. Yosefa, loyi a a ri munhu wo duma aEgipta, loyi a a tlhandlama Faro lowa hosi hi xikhundlha, a a va khathalela. Kambe hi nkarhi wolowo Yosefa a a file. Naswona Faro lontshwa loyi a a venga Vaisrayele, u ve hosi aEgipta.

Kutani Faro loyi wo biha u endle Vaisrayele mahlonga. Naswona u veke vavanuna va tihanyi leswaku va va rindza. Va sindzise Vaisrayele ku tirha hi matimba va akela Faro madoroba. Hambiswiritano, Vaisrayele va hambete va andza. Endzhaku ka nkarhi Vaegipta va sungule ku chava leswaku Vaisrayele va ta tala ngopfu ni ku va ni matimba swinene.

Vaegipta va ri karhi va xanisa Vaisrayele

Xana wa swi tiva leswaku Faro u endle yini? U vulavule ni vavasati lava pfunaka vamanana va Vaisrayele ku veleka, a ku: ‘Mi fanele ku dlaya n’wana un’wana ni un’wana wa mufana loyi a velekiwaka.’ Kambe vavasati lava a va ri vanene naswona a va nga va dlayi vana.

Kutani Faro u lerise vanhu vakwe hinkwavo, a ku: ‘Dlayani vana va vafana va Vaisrayele. Kambe tshikani vana va vanhwanyana ntsena.’ Munhu la humeseke xileriso xo tano a a ri ni tihanyi! A hi voneni ndlela leyi n’wana un’wana wa mufana a poneke ha yona.

Eksoda 1:6-22.



Swivutiso

  • Exifanisweni lexi, i mani wanuna loyi a khomeke ximoko naswona i vamani lava a va baka?
  • Endzhaku ka loko Yosefa a file, ku humelele yini hi Vaisrayele?
  • Hikwalaho ka yini Vaegipta va sungule ku chava Vaisrayele?
  • Hi wihi nawu lowu Faro a wu nyikeke vavasati lava a va pfuna vamanana va Vaisrayele ku veleka?

Swivutiso swo engetela

  • Hlaya Eksoda 1:6-22.

    Xana Yehovha u sungule ku hetisisa xitshembiso xa yena eka Abrahama hi ndlela yihi?

    Xana vavasati Vaheveru lava a va pfuna vamanana ku veleka va swi kombise njhani leswaku va xixima vutomi?

    Xana vavasati volavo a va pfuna van’wana ku veleka va hakeriwe hi ndlela yihi hikwalaho ko tshembeka ka tona eka Yehovha?

    Xana Sathana u ringete njhani ku kavanyeta xikongomelo xa Yehovha malunghana ni Mbewu ya Abrahama leyi tshembisiweke?