Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 26: Yobo A A Tshembekile Eka Xikwembu

Dyondzo 26: Yobo A A Tshembekile Eka Xikwembu

Xana u n’wi twela vusiwana wanuna loyi la vabyaka? Vito ra yena i Yobo naswona wansati loyi i nsati wakwe. Xana wa swi tiva leswi a swi byelaka Yobo? U ri: ‘Rhukana Xikwembu u fa.’ A hi voneni leswi n’wi susumeteleke ku vula marito yo biha hi ndlela leyi ni xivangelo lexi endleke leswaku Yobo a xanisekisa xileswi.

Yobo a ri ni marhumba

Yobo a a ri wanuna wo tshembeka loyi a a yingisa Yehovha. A a tshama etikweni ra Uzha ekusuhi ni le Kanana. Yehovha a a n’wi rhandza swinene Yobo kambe a ku ri ni munhu un’wana loyi a a n’wi venga. Xana wa n’wi tiva munhu wa kona?

A ku ri Sathana Diyavulosi. Tsundzuka, Sathana i ntsumi yo biha leyi vengaka Yehovha. U swi kotile ku endla leswaku Adamu na Evha va nga n’wi yingisi Yehovha naswona a a anakanya leswaku a nga hambukisa vanhu hinkwavo leswaku na vona va nga n’wi yingisi Yehovha. Xana u swi kotile? Doo! Ehleketa hi vavanuna ni vavasati vo tala vo tshembeka lava hi dyondzeke ha vona. Xana u tsundzuka vangani?

Endzhaku ka loko Yakobe na Yosefa va file aEgipta, Yobo hi yena munhu loyi a a tshembekile eka Yehovha ku tlula vanhu hinkwavo emisaveni. Yehovha a a lava ku komba Sathana leswaku a hi vanhu hinkwavo lava a nga va hambukisaka, kutani u te: ‘Languta Yobo. Vona ndlela leyi a tshembekeke ha yona eka mina.’

Sathana u te: ‘U tshembekile hileswi u n’wi katekiseke naswona u ni swilo leswinene swo tala. Kambe loko wo n’wi tekela swilo leswi, u ta ku rhukana.’

Kutani Yehovha u te: ‘Yana emahlweni. N’wi tekele swona. Endla swilo hinkwaswo swo biha leswi u lavaka ku swi endla eka Yobo. Hi ta vona loko a ta ndzi rhukana. Kambe u nga n’wi dlayi.’

Xo sungula, Sathana u endle leswaku vanhu va yiva tihomu ni tikamela ta Yobo naswona tinyimpfu ta yena ti dlayiwile. Kutani u dlaye vana va Yobo va vafana ni va vanhwanyana va khume hi xidzedze. Endzhaku ka sweswo, Sathana u be Yobo hi vuvabyi lebyi chavisaka. Yobo u xaniseke ngopfu. Hi yona mhaka leyi nsati wa Yobo a n’wi byeleke a ku: ‘Rhukana Xikwembu u fa.’ Kambe Yobo a nga swi endlanga sweswo. Nakambe, vanakulobye vanharhu lava nga ni mavunwa va tile va n’wi hehla hileswaku u tikhome ku biha. Kambe Yobo u tshame a tshembekile.

Sweswo swi n’wi tsakise ngopfu Yehovha, kutani endzhaku ka swona u katekise Yobo, hilaha u swi vonaka hakona exifanisweni lexi. U n’wi tshungurile. Yobo u ve ni vana van’wana vo saseka va khume naswona tihomu, tinyimpfu ni tikamela swi phindheke kambirhi eka leswi a a ri na swona eku sunguleni.

Xana u ta tshama u tshembekile eka Yehovha ku fana na Yobo? Loko wo tshama u tshembekile, Xikwembu xi ta ku katekisa. U ta kota ku hanya hilaha ku nga heriki loko misava hinkwayo yi ta va yi saseke ku fana ni ntanga wa Edeni.

Yobo 1:1-22; 2:1-13; 42:10-17.

Yobo ni ndyangu wakwe


Swivutiso

  • Yobo a ku ri mani?
  • Xana Sathana a a lava ku endla yini, xana u swi kotile?
  • Xana Yehovha u nyike Sathana mpfumelelo wo endla yini, naswona ha yini?
  • Ha yini nsati wa Yobo a te eka yena, “rhukana Xikwembu u fa”? (Languta xifaniso)
  • Hilaha u swi vonaka hakona eka xifaniso xa vumbirhi, Yehovha u n’wi katekise njhani Yobo naswona ha yini?
  • Loko na hina hi tshembeka eka Yehovha ku fana na Yobo, hi yihi mikateko leyi hi nga ta yi kuma?

Swivutiso swo engetela

  • Hlaya Yobo 1:1-22.

    Xana namuntlha Vakreste va nga n’wi tekelela njhani Yobo?

  • Hlaya Yobo 2:1-13.

    Xana ndlela leyi Yobo a anguleke ha yona loko a xanisiwa hi Sathana yi hambane njhani ni ya nsati wakwe?

  • Hlaya Yobo 42:10-17.

    Hi kwihi ku yelana loku nga kona exikarhi ka vuyelo lebyi kumiweke hi Yobo ni lebyi kumiweke hi Yesu hikwalaho ko tshembeka ka vona?

    Xana yi hi khutaza njhani mikateko leyi kumiweke hi Yobo hikwalaho ko tshama a tshembekile eka Xikwembu?

DYONDZA SWO TALA

Khadi Ra Bibele Ra Yobo

Xikombiso xa Yobo xa hi khutaza leswaku hi tiyisela ndzingo wun’wana ni wun’wana lowu hi langutanaka na wona. Kopa khadi leri ra Bibele leswaku u dyondza leswi engetelekeke.