Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 25: Ndyangu Wu Rhurhela Le Egipta

Dyondzo 25: Ndyangu Wu Rhurhela Le Egipta

Yosefa a a nga ha swi koti ku tikhoma. U lerise malandza yakwe hinkwawo leswaku ma humela handle. Loko a sele ni vamakwavo, Yosefa u sungule ku rila. Ehleketa ndlela leyi vamakwavo a va hlamale ha yona, hikuva a va nga swi tivi leswaku u rilela yini. Eku heteleleni u te: ‘Hi mina Yosefa. Xana tatana wa ha hanya?’

Vamakwavo a va hlamale ngopfu lerova a va tsandzeka ni ku vulavula. A va chuhile. Kambe Yosefa u te: ‘Ndzi kombela mi tshinela eka mina.’ Loko va tshinerile, u te: ‘Hi mina Yosefa makwenu loyi mi n’wi xaviseke aEgipta.’

Yosefa u hambete a vulavula hi tintswalo, a ku: ‘Mi nga tisoli hileswi mi ndzi xaviseke laha. Entiyisweni i Xikwembu lexi ndzi rhumeleke aEgipta leswaku xi ponisa vanhu. Faro u ndzi endle mufumi wa tiko hinkwaro. Kutani sweswi tsutsumelani ekaya mi ya byela tatana mahungu lawa. Naswona mi n’wi byela a ta haleno a ta tshama kona.’

Hiloko Yosefa a vukarha vamakwavo kutani a va ntswontswa hinkwavo. Loko Faro a twa leswaku vamakwavo wa Yosefa va tile, u byele Yosefa a ku: ‘Va nyike tigolonyi leswaku va ya teka tata wa vona ni mindyangu ya vona kutani va vuya laha. Ndzi ta va nyika ndhawu leyinene aEgipta.’

Va endle tano. Wa n’wi vona laha Yosefa a ri karhi a hlangaveta tata wakwe loko a ta aEgipta swin’we ni ndyangu wakwe hinkwawo.

Ndyangu wa Yakobe a wu ri wukulu swinene. Loko va rhurhele aEgipta a va ri 70, loko ku hlayiwa Yakobe ni vana vakwe ni vatukulu. Kambe a ku ri ni vavasati va vona, kumbexana ni malandza yo tala. Hinkwavo va tshame aEgipta. A va vuriwa Vaisrayele hikuva Xikwembu a xi cince vito ra Yakobe a va Israyele. Vaisrayele va ve vanhu vo hlawuleka swinene eka Xikwembu, hilaha hi nga ta swi vona hakona hi ku famba ka nkarhi.

Genesa 45:1-28; 46:1-27.

Yosefa ni ndyangu wa yena


Swivutiso

  • Ku humelele yini loko Yosefa a byela vamakwavo leswaku hi yena mani?
  • Xana Yosefa u va hlamusele yini vamakwavo hi tintswalo?
  • Xana Faro u te yini loko a twa hi ta vamakwavo wa Yosefa?
  • Xana ndyangu wa Yakobe a wu kule ku fikela kwihi loko va rhurhela aEgipta?
  • Xana vandyangu wa Yakobe a va vuriwa vamani naswona ha yini?

Swivutiso swo engetela

  • Hlaya Genesa 45:1-28.

    Xana mhaka ya Yosefa leyi tsariweke eBibeleni yi swi kombisa njhani leswaku Yehovha a nga hundzula nchumu lowu vonakaka wu vava eka malandza ya yena wu va nchumu lowu tsakisaka?

  • Hlaya Genesa 46:1-27.

    Hi xihi xitiyisekiso lexi Yehovha a xi nyikeke Yakobe loko a ri endleleni yo ya aEgipta?