Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 24: Yosefa A Ringa Vamakwavo

Dyondzo 24: Yosefa A Ringa Vamakwavo

Yosefa u lava ku vona loko vamakwavo lava khume va ha ri ni mavondzo ni tihanyi. Kutani u ri eka vona: ‘Mi tinhlori. Mi tele ku ta vona laha tiko ra hina ri tsaneke kona.’

Hiloko va ku: ‘E-e, a hi tinhlori. Hi vavanuna vo tshembeka. Hi vana va munhu hinkwerhu. A hi ri 12. Kambe makwerhu un’wana a nga ha ri kona naswona lontsongo u sele na tatana.’

Yosefa u tiendle onge a nga va tshembi. U pfalele makwavo la vuriwaka Simiyoni ekhotsweni kutani a nyika lavan’wana swakudya va muka na swona. Kambe u va byele leswi: ‘Loko mi vuya, mi fanele mi ta ni ndzisana ya n’wina.’

Loko va tlhelele ekaya le Kanana, vamakwavo va byele tata wa vona Yakobe hinkwaswo leswi humeleleke. Yakobe u twe ku vava swinene. U ririle a ku: ‘Yosefa a nga ha ri kona naswona sweswi Simiyoni a nga ha ri kona. A ndzi nge mi pfumeleli mi teka rikotse ra mina Benjamini.’ Kambe loko va sungula ku heleriwa hi swakudya, Yakobe a a fanele a va pfumelela leswaku va famba na Benjamini aEgipta leswaku va ta kota ku vuya ni swakudya swin’wana.

Hiloko Yosefa a vona vamakwavo va ri karhi va ta. A a tsake ngopfu loko a vona ndzisana yakwe Benjamini. Kambe, a nga kona eka vona loyi a a tiva leswaku wanuna loyi wo hlawuleka i Yosefa. Kutani Yosefa a endla swo karhi leswaku a ringa vamakwavo va khume hi tatana.

U lerise malandza yakwe leswaku ma chela swakudya eminkwameni ya vamakwavo. Nakambe u lerise leswaku xinwelo xakwe xa silivhere xi cheriwa enkwameni wa Benjamini va nga swi tivi. Endzhaku ka loko hinkwavo va humile naswona se va fambe mpfhukanyana, Yosefa u rhumele malandza yakwe ma va landza. Loko ma va kuma, malandza ma te: ‘Ha yini mi yive xinwelo xa n’wini wa hina xa silivhere?’

Hinkwavo va te: ‘A hi yivanga xinwelo xa yena. Loko mo kuma xinwelo lexi eka un’wana wa hina, a a dlayiwe munhu yoloye.’

Hiloko malandza ma kambela eminkwameni hinkwayo kutani ma kuma xinwelo enkwameni wa Benjamini, hilaha u swi vonaka hakona laha. Kutani malandza ma ku: ‘N’wina van’wana mi nga famba kambe Benjamini u fanele a tlhela na hina.’ Xana vamakwavo lava khume a va ta endla yini hi nkarhi wolowo?

Hinkwavo va tlhelele endlwini ya Yosefa va ri na Benjamini. Yosefa u byele vamakwavo a ku: ‘Hinkwenu mi nga tlhelela ekaya, kambe Benjamini u fanele a sala laha a va hlonga ra mina.’

Hiloko Yuda a ku: ‘Loko ndzo tlhelela ekaya ndzi nga ri na rona jaha leri, tatana u ta fa hikuva u ri rhandza ngopfu. Hikwalaho, ndzi kombela u pfalela mina ndzi va hlonga ra wena kambe u tshika jaha leri ri tlhelela ekaya.’

Yosefa a a swi vona leswaku vamakwavo va hundzukile. A va nga ha ri na wona mavondzo ni tihanyi. A hi voneni leswi Yosefa a swi endleke endzhaku ka sweswo.

Genesa 42:9-38; 43:1-34; 44:1-34.

Vamakwavo wa Yosefa va ri karhi va hehliwa


Swivutiso

  • Ha yini Yosefa a hehle vamakwavo hi ku vula leswaku i vakamberi?
  • Ha yini Yakobe a pfumelele Benjamini n’wana wakwe lontsongo leswaku a ya aEgipta?
  • Xana xinwelo xa Yosefa xa silivhere xi nghenise ku yini enkwameni wa Benjamini?
  • Xana Yuda u tinyiketele ku endla yini leswaku Benjamini a ntshunxiwa?
  • Xana vamakwavo wa Yosefa va cince njhani?

Swivutiso swo engetela

  • Hlaya Genesa 42:9-38.

    Xana marito ya Yosefa lama nga eka Genesa 42:18 ma nga va pfuna njhani lava nga ni vutihlamuleri enhlengeletanweni ya Yehovha namuntlha?

  • Hlaya Genesa 43:1-34.

    Hambileswi Ruveni a a ri mativula, swi ve erivaleni hi ndlela yihi leswaku Yuda u ve muvulavuleri wa vamakwavo?

    Xana Yosefa u va ringe njhani vamakwavo, naswona ha yini?

  • Hlaya Genesa 44:1-34.

    I yini swin’wana leswi Yosefa a swi vuleke ku endlela leswaku vamakwavo va nga n’wi voni leswaku hi yena mani?

    Xana vamakwavo wa Yosefa va swi kombise njhani leswaku mavondzo lawa a va ri na wona eka makwavo a va nga ha ri na wona?