Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 23: Milorho Ya Faro

Dyondzo 23: Milorho Ya Faro

Ku hundze malembe mambirhi Yosefa a ha ri ekhotsweni. Mucheri wa vhinyo a nga n’wi tsundzukanga. Siku rin’wana Faro u lorhe milorho yimbirhi yo hlawuleka naswona a a nga swi tivi leswaku yi vula yini. Xana wa n’wi vona a etlele lahaya? Hi mixo lowu landzelaka Faro u vitane vavanuna vakwe vo tlhariha kutani a va byela swilo leswi a swi lorheke. Kambe a va nga swi koti ku n’wi hlamusela milorho yakwe.

Eku heteleleni mucheri wa vhinyo u tsundzuke Yosefa. U byele Faro a ku: ‘Loko ndzi ri ekhotsweni a ku ri ni wanuna un’wana kwalaho loyi a a swi kota ku hlamusela milorho.’ Hiloko Faro a lerisa leswaku Yosefa a humesiwa ekhotsweni hi nkarhi wolowo.

Faro u byele Yosefa norho wakwe, a ku: ‘Ndzi vone tihomu ta nkombo to nona ti tlhela ti saseka. Ndzi tlhela ndzi vona tihomu to ondza swinene ti tlhela ti khwankhwa. Hiloko leto ondza ti mita tihomu leto nona.

Faro a ri karhi a lorha

‘Eka norho wa mina wa vumbirhi ndzi vone min’oko ya nkombo leyi wupfeke, leyi a yi ri ni tindzoho to tala, yi ri erihlangeni rin’we. Hiloko ndzi tlhela ndzi vona min’oko yo lala leyi nga ni tindzoho to vuna. Kutani min’oko yo lala yi sungula ku mita leyinene ya nkombo.’

Hiloko Yosefa a ku eka Faro: ‘Milorho leyimbirhi yi vula nchumu wun’we. Tihomu leta nkombo to nona ni min’oko leya nkombo leyi teleke tindzoho, swi vula malembe ya nkombo, naswona tihomu leto ondza ta nkombo ni min’oko leyo lala ya nkombo, swi vula malembe man’wana ya nkombo. Ku ta va ni malembe ya nkombo ya ndzalo aEgipta. Kutani ku ta landzela malembe ya nkombo ya ndlala.’

Kutani Yosefa a byela Faro a ku: ‘Hlawula wanuna wo tlhariha kutani u n’wi veka leswaku a hlengeleta swakudya hi nkarhi lowu wa malembe ya nkombo ya ndzalo. Kutani vanhu a va nge fi hi ndlala emalembeni ya nkombo lama nga ta landzela ya ndlala.’

Hiloko Faro a yi tsakela mhaka leyi. Kutani a hlawula Yosefa leswaku a hlengeleta swakudya ni ku swi hlayisa. Yosefa u ve wanuna wo hlawuleka aEgipta, a va ekusuhi na Faro.

Endzhaku ka malembe ya nhungu, hi nkarhi wa ndlala, Yosefa a vona vavanuna van’wana va ri karhi va ta. Xana wa swi tiva leswaku i vamani? Phela, a ku ri vamakwavo va khume! Tata wa vona Yakobe u va rhume aEgipta hikuva swakudya swa vona se a swi hela le kaya eKanana. Yosefa wa ha va tiva vamakwavo, kambe vona a va n’wi tivi. Xana wa swi tiva leswaku ha yini? Hikuva Yosefa se a a kurile naswona a a ambale swiambalo swa muxaka wun’wana.

Yosefa wa swi tsundzuka leswaku loko a ha ri mufana u lorhe vamakwavo va n’wi nkhinsamela. Xana u tsundzuka u hlaya mhaka leyi? Kutani Yosefa wa swi vona leswaku i Xikwembu lexi n’wi rhumeleke aEgipta hikwalaho ka xivangelo lexinene. Xana u ehleketa leswaku Yosefa u endle yini? A hi voneni.

Genesa 41:1-57; 42:1-8; 50:20.



Swivutiso

  • Ku humelele yini hi Faro vusiku byin’wana?
  • Ha yini mucheri wa vhinyo a hetelele a tsundzuke Yosefa?
  • Hilaha swi kombisiweke hakona laha xifanisweni, hi yihi milorho yimbirhi leyi Faro a yi lorheke?
  • Xana Yosefa u vule leswaku milorho leyi yi vula yini?
  • Xana swi tise ku yini leswaku Yosefa a tlakusiwa swinene aEgipta a va ekusuhi na Faro?
  • Ha yini vamakwavo wa Yosefa va ya Egipta naswona ha yini va nga ha n’wi tsundzuki?
  • Hi wihi norho lowu Yosefa a wu tsundzukaka, naswona wu n’wi pfuna ku twisisa yini?

Swivutiso swo engetela

  • Hlaya Genesa 41:1-57.

    Xana Yosefa u yise nyingiso eka Yehovha hi ndlela yihi, naswona namuntlha Vakreste va nga xi tekelela njhani xikombiso xa yena?

    Xana malembe ya ndzalo le Egipta lama landzeleke hi malembe ya ndlala ma ku kombisa njhani ku hambana lokukulu loku nga kona exikarhi ka xiyimo xa moya xa vanhu va Yehovha namuntlha ni xa Vujagana?

  • Hlaya Genesa 42:1-8 na 50:20.

    Xana swi hoxile eka vagandzeri va Yehovha ku nkhinsama emahlweni ka munhu ku ri ndlela yo kombisa xichavo ni ku xixima xikhundlha xa yena loko sweswo ku ri mukhuva wa tiko?

DYONDZA SWO TALA

Yosefa A Ponisa Vutomi

Kopa mhaka leyi ivi u hlaya hi Yosefa loyi Xikwembu xi n’wi tirhiseke leswaku a ponisa tiko hinkwaro.