Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 22: Yosefa A Hoxiwa eKhotsweni

Dyondzo 22: Yosefa A Hoxiwa eKhotsweni

Yosefa a a ri ni malembe ya 17 loko a yisiwa le Egipta. Kwalaho u xaviseriwe wanuna la vuriwaka Potifaro. Potifaro a a tirha eka hosi ya le Egipta leyi vuriwaka Faro.

Yosefa a ri ekhotsweni

Yosefa a a n’wi tirhela hi matimba n’wini wakwe Potifaro. Loko Yosefa a ri karhi a kula, Potifaro u n’wi veke ku va mulanguteri wa yindlu yakwe hinkwayo. Kutani, ha yini Yosefa a ri laha khotsweni? U le khotsweni hikwalaho ka nsati wa Potifaro.

Yosefa a a ri mbhurhi, naswona nsati wa Potifaro a a lava ku etlela na yena. Kambe Yosefa a a swi tiva leswaku swi bihile sweswo naswona a a nga ta swi endla. Nsati wa Potifaro u hlundzuke ngopfu. Kutani loko nuna wa yena a vuya, nsati loyi u hembile a ku: ‘Yosefa u ringete ku etlela na mina!’ Potifaro u swi khorwile leswi a swi vuriwa hi nsati wakwe kutani a karihela Yosefa swinene. Hiloko a endla leswaku a pfaleriwa ekhotsweni.

Wanuna loyi a a langutela khotso hi ku hatlisa u swi vonile leswaku Yosefa a a ri munhu lonene. Hiloko a n’wi veka ku langutela vabohiwa lavan’wana hinkwavo. Endzhakunyana Faro u hlundzukele mucheri wa vhinyo ni mubaki kutani a va hoxa ekhotsweni. Siku rin’wana havambirhi va lorhe norho wo hlawuleka kambe a va nga swi tivi leswaku milorho ya vona yi vula yini. Hi siku leri tlhandlamaka Yosefa u te: ‘Ndzi byeleni milorho ya n’wina.’ Loko va n’wi byerile, Yosefa u va hlavutele milorho ya vona hi ku pfuniwa hi Xikwembu.

Yosefa u byele loyi a a chela vhinyo a ku: ‘Endzhaku ka masiku manharhu u ta ntshunxiwa ekhotsweni kutani u ta tlhela u ya tirha ku chelela Faro vhinyo.’ Kutani Yosefa u engetele a ku: ‘Loko u huma, u ndzi tivisa eka Faro naswona u ndzi pfuna leswaku ndzi huma endhawini leyi.’ Kambe Yosefa u byele mubaki a ku: ‘Endzhaku ka masiku manharhu Faro u ta ku tsema nhloko.’

Endzhaku ka masiku manharhu swi humelele hilaha Yosefa a vuleke hakona. Faro u lerise leswaku mubaki a tsemiwa nhloko. Kambe mucheri wa vhinyo u ntshunxiwile ekhotsweni kutani a sungula ku tirhela hosi nakambe. Kambe mucheri wa vhinyo a nga n’wi tsundzukanga Yosefa! A nga n’wi tivisanga Faro hi ta Yosefa, xisweswo u boheke ku tshama ekhotsweni.

Genesa 39:1-23; 40:1-23.



Swivutiso

  • Yosefa a a ri ni malembe mangani loko a yisiwa aEgipta, naswona ku humelele yini loko a fika kona?
  • Swi tise ku yini leswaku Yosefa a pfaleriwa ekhotsweni?
  • Hi wihi ntirho lowu Yosefa a nyikiweke wona ekhotsweni?
  • Xana loko Yosefa a ri ekhotsweni u n’wi endlele yini mucheri wa vhinyo ya Faro ni mubaki wa xinkwa?
  • Ku humelele yini endzhaku ka loko mucheri wa vhinyo a humesiwile ekhotsweni?

Swivutiso swo engetela

  • Hlaya Genesa 39:1-23.

    Tanihi leswi a ku nga ri na nawu lowu tsariweke lowu humaka eka Xikwembu lowu a wu lwisana ni vuoswi eminkarhini ya Yosefa, i yini lexi n’wi susumeteleke ku balekela nsati wa Potifaro?

  • Hlaya Genesa 40:1-23.

    Hlamusela norho wa mucheri wa vhinyo hi ku komisa ni nhlamuselo ya wona leyi Yehovha a yi nyikeke Yosefa.

    Xana mubaki wa xinkwa u lorhe yini, naswona a swi vula yini?

    Xana namuntlha hlonga ro tshembeka ni ro tlhariha ri ri tekelela njhani langutelo ra Yosefa?

    Xana Genesa 40:20 yi ri kombisa njhani langutelo ra Vakreste hi ku tlangela masiku ya ku velekiwa?

DYONDZA SWO TALA

MAKHADI YA VANHU VA LE BIBELENI

Khadi Ra Bibele Ra Potifaro

Kopa khadi leri ra munhu wa le Bibeleni kutani u dyondza swo tala hi Potifaro n’wini wa Yosefa wa le Egipta.