Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 19: Yakobe A A Ri Ni Ndyangu Lowukulu

Dyondzo 19: Yakobe A A Ri Ni Ndyangu Lowukulu
Yakobe ni vana vakwe va majaha

Languta ndyangu lowu lowukulu. Lava i vana va majaha va 12 va Yakobe. Ni vana va vanhwanyana a a ri na vona. Xana wa ma tiva mavito ya vana lava? Hi lawa man’wana ya wona.

Leya u veleke Ruveni, Simiyoni, Levhi na Yuda. Loko Rahele a vona leswaku a nga kumi vana, u twe ku vava. U nyikete nandza wakwe wa xisati Biliha eka Yakobe, kutani Biliha a kuma vana vambirhi va vafana, ku nga Dani na Neftali. Kutani Leya na yena u nyikete nandza wakwe wa xisati Zilpa eka Yakobe, kutani Zilpa a veleka Gadi na Axere. Eku heteleleni Leya u ve ni vana van’wana vambirhi va vafana, ku nga Isakara na Zebuloni.

Eku heteleleni Rahele u kote ku kuma n’wana. N’wana wa kona u n’wi thye vito ra Yosefa. Hi ta tlhela hi dyondza swo tala hi Yosefa hikuva u ve munhu wa nkoka swinene. Lava hi vona vana va 11 va Yakobe loko a ha tshama eka tata wa Rahele, ku nga Labani.

Yakobe u tlhele a kuma vana va vanhwanyana, kambe Bibele yi boxa vito ra un’we ntsena. Vito ra yena a ku ri Dina.

Ku fike nkarhi lowu Yakobe a ehleketeke ku suka eka Labani, a tlhelela eKanana. Hiloko a hlengeleta ndyangu wakwe lowukulu ni ntlhambi wakwe lowukulu wa tinyimpfu ni tihomu, a teka riendzo ro leha.

Endzhaku ka loko Yakobe ni ndyangu wakwe va ha ku fika eKanana, Rahele u veleke n’wana un’wana wa mufana. Swi humelele loko va ri endleleni. Rahele a swi n’wi tikela swinene kutani u fe a ha veleka. Kambe xifanyetana a xi hanye kahle. Yakobe u xi thye vito ra Benjamini.

Hi lava ku tsundzuka mavito ya vana va majaha va 12 va Yakobe hikuva rixaka hinkwaro ra Israyele ri huma eka vona. Entiyisweni, tinxaka ta Israyele ta 12 ti thyiwe hi mavito ya vana va 10 va majaha va Yakobe ni vambirhi va majaha va Yosefa. Isaka u hanye malembe yo tala endzhaku ko velekiwa ka vafana lava naswona swi nga endleka swi n’wi tsakisile ku va ni vatukulu vo tala swonghasi. Kambe a hi voneni leswaku ku endleke yini hi ntukulu wakwe Dina.

Genesa 29:32-35; 30:1-26; 35:16-19; 37:35.



Swivutiso

  • A ku ri vamani vana va tsevu va Yakobe lava a velekeriweke vona hi nsati wakwe wo sungula Leya?
  • Hi vahi vana vambirhi lava nandza wa Leya la vuriwaka Zilpa a va velekeleke Yakobe?
  • A ku ri vamani mavito ya vana vambirhi lava Biliha nandza wa Rahele a va velekeleke Yakobe?
  • I vamani vana vambirhi va Rahele, kambe ku humelele yini loko n’wana wa vumbirhi a velekiwile?
  • Hi ku ya hi xifaniso lexi, Yakobe a a ri ni vana vangani, naswona va endle yini?

Swivutiso swo engetela

  • Hlaya Genesa 29:32-35 na 30:1-26.

    Hilaha swi kombisiweke hakona emhakeni ya vana va Yakobe va 12, xana vana va vafana va Vaheveru hakanyingi a va thyiwa njhani mavito eminkarhini ya khale?

  • Hlaya Genesa 35:16-19 na 37:35.

    Hambileswi ku boxiweke vito ra Dina ntsena eBibeleni, hi swi tiva njhani leswaku Yakobe a a ri ni vana van’wana va vanhwanyana?

DYONDZA SWO TALA

TIMHAKA TA BIBELE LETI NGA NI SWIFANISO

Mhaka Ya Vana Va Yakobe

U fanele u endla yini loko buti, sesi kumbe munghana wa wena a kuma xilo lexi a wu ta tsakela ku va na xona?