Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 17: Mahahla Lawa A Ma Nga Fani

Dyondzo 17: Mahahla Lawa A Ma Nga Fani
Esawu

Vafana lava vambirhi a va fani nikatsongo, a hi swona ke? Xana wa ma tiva mavito ya vona? Lowa muhloti i Esawu naswona mufana loyi a khathalelaka tinyimpfu i Yakobe.

Esawu na Yakobe a va ri mahahla ya Isaka na Raveka. Tata wa vona Isaka, a a rhandza Esawu ngopfu hikuva a a ri muhloti lonene naswona a a wundla ndyangu wa ka vona. Kambe Raveka a a rhandza Yakobe ngopfu hikuva a a ri munhu wo miyela, mufana wo rhula.

Kokwa wa vona Abrahama a ha hanya naswona a swi kanakanisi leswaku Yakobe a a rhandza ku n’wi yingisa loko a vulavula hi Yehovha. Eku heteleleni Abrahama u file a ri ni malembe ya 175 hi vukhale, loko mahahla ma ri ni malembe ya 15.

Loko Esawu a ri ni malembe ya 40 u teke vavasati vambirhi va le tikweni ra Kanana. Sweswo swi twise Isaka na Raveka ku vava ngopfu hikuva vavasati lava a va nga n’wi gandzeli Yehovha.

Kutani siku rin’wana ku humelele swin’wana leswi endleke Esawu a karihela makwavo Yakobe. Sweswo swi humelele loko Isaka a fanele a katekisa mativula yakwe. Leswi Esawu a a ri nkulu eka Yakobe, Esawu a a langutele leswaku ku katekisiwa yena. Kambe Esawu se a a xavisele Yakobe mfanelo yakwe yo kuma mikateko. Nakambe, loko vafana lava vambirhi va velekiwa, Xikwembu xi vule leswaku ku ta katekisiwa Yakobe. Kutani hi swona leswi endlekeke. Isaka u katekise n’wana wakwe Yakobe.

Yakobe

Endzhakunyana, loko Esawu a twa mhaka leyi, u karihele Yakobe. A a karihe ngopfu lerova u vule leswaku u ta dlaya Yakobe. Loko Raveka a twa mhaka leyi, u karhateke ngopfu. Kutani u byele nuna wakwe Isaka, a ku: ‘Hakunene swi ta va swi bihile loko Yakobe na yena o teka un’wana wa vavasati lava va Kanana.’

Hiloko Isaka a vitana n’wana wakwe Yakobe, kutani a ku eka yena: ‘U nga teki wansati wa Mukanana. Ematshan’weni ya sweswo, yana endlwini ya kokwa wa wena Bethuwele eHarani. Teka un’wana wa vana va Labani.’

Yakobe u yingise tata wakwe, hiloko a teka riendzo ro leha a ya laha maxaka ya yena a ma tshama kona eHarani.

Genesa 25:5-11, 20-34; 26:34, 35; 27:1-46; 28:1-5; Vaheveru 12:16, 17.



Swivutiso

  • Xana Esawu na Yakobe a ku ri vamani, naswona a va hambane njhani?
  • Esawu na Yakobe a va ri ni malembe mangani loko kokwa wa vona Abrahama a fa?
  • Esawu u endle yini leswi hlundzukiseke mana wakwe ni tata wakwe?
  • Ha yini Esawu a n’wi hlundzukele ngopfu makwavo Yakobe?
  • Hi xihi xileriso lexi Isaka a xi nyikeke n’wana wakwe Yakobe?

Swivutiso swo engetela

  • Hlaya Genesa 25:5-11, 20-34.

    Xana Yehovha u vule yini ka ha ri emahlweni malunghana ni vana vambirhi va Raveka?

    Hi kwihi ku hambana loku a ku ri kona exikarhi ka Yakobe na Esawu malunghana ni ndlela leyi a va yi languta ha yona mfanelo ya vukulu?

  • Hlaya Genesa 26:34, 35; 27:1-46; na 28:1-5.

    Xana Esawu u swi kombise njhani leswaku a nga swi tlangeli swilo swa moya?

    Xana Isaka u n’wi byele ku endla yini Yakobe leswaku a ta kuma mikateko ya Xikwembu?

  • Hlaya Vaheveru 12:16, 17.

    Xana xikombiso xa Esawu xi byi kombisa njhani vuyelo bya ku swi tekela ehansi swilo swo kwetsima?

DYONDZA SWO TALA

Yakobe, Esawu Ni Xiculu

Dyondza hi Yakobe na Esawu! Kopa ntlango lowu wa xifaniso ivi u wu printa kutani u wu penda.