Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 16: Isaka U Kuma Nsati Lonene

Dyondzo 16: Isaka U Kuma Nsati Lonene

Xana wa n’wi tiva wansati loyi a nga exifanisweni lexi? Vito rakwe i Raveka. Naswona wanuna loyi a yaka eka yena i Isaka. U ta va nsati wa yena. Xana swi tise ku yini?

Entiyisweni, Abrahama, tata wa Isaka a a lava ku kumela n’wana wakwe nsati lonene. A a nga lavi leswaku Isaka a teka un’wana wa vavasati va le Kanana hikuva vanhu lava a va gandzela swikwembu swa hava. Hiloko Abrahama a vitana nandza wa yena kutani a ku: ‘Ndzi lava u tlhelela laha maxaka ya mina ma tshamaka kona eHarani kutani u ya kumela n’wana wa mina Isaka nsati.’

Hiloko nandza wa Abrahama a teka tikamela ta khume kutani a teka riendzo ro leha. Loko a fika ekusuhi ni ndhawu leyi maxaka ya Abrahama a ma tshama eka yona, u yime exihlobyeni. Se a ri rhengile, a ku ri nkarhi lowu vavasati va muti wolowo a va ya ha wona exihlobyeni leswaku va ya ka mati. Kutani nandza wa Abrahama u khongele eka Yehovha a ku: ‘Onge wansati loyi a nga ta ndzi kela mati swin’we ni tikamela ta mina ku nga va yena loyi u n’wi hlawulaka ku va nsati wa Isaka.’

Raveka a hlangana na Isaka

Ku nga ri kungani Raveka a fika ku ta ka mati. Loko nandza loyi a n’wi kombela mati, u n’wi kerile. Kutani u ye mahlweni a kela tikamela hinkwato mati. Ntirho wolowo a wu ri wukulu ngopfu hikuva tikamela ti nwa mati yo tala ngopfu.

Loko Raveka a heta ku ti kela mati, nandza wa Abrahama u n’wi vutise vito ra tata wa yena. U tlhele a kombela ku etlela ekaya ka vona. Yena u te: ‘Tata wa mina i Bethuwele naswona kamara ri kona leri u nga etlelaka eka rona.’ Nandza wa Abrahama a a swi tiva leswaku Bethuwele a a ri n’wana wa Nakori, ku nga buti wa Abrahama. Hiloko a nkhinsama a nkhensa Yehovha hileswi a n’wi kongomiseke eka maxaka ya Abrahama.

Madyambu wolawo nandza wa Abrahama u byele Bethuwele na Labani buti wa Raveka leswaku a a tele yini. Havumbirhi va pfumerile leswaku Raveka a nga famba na yena a ya tekiwa hi Isaka. Xana Raveka u hlamule njhani loko a komberiwa? U te, ‘Ina,’ a kombisa leswaku wa swi lava ku famba. Hi xamundzuku wa kona, va khandziye tikamela kutani va teka riendzo ro leha va tlhelela eKanana.

Loko va fika, se a ri perile. Raveka u vone wanuna a ri karhi a tifambela emasin’wini. A ku ri Isaka. A a tsakile loko a vona Raveka. Sara, mana wa Isaka a a ri ni malembe manharhu a file kutani a ha karhatekile hi mhaka leyi. Kambe Isaka u sungule ku rhandza Raveka swinene, hiloko a tlhela a tsaka.

Genesa 24:1-67.



Swivutiso

  • I mani wanuna ni wansati lava va nga laha xifanisweni?
  • Xana Abrahama u endle yini leswaku a kumela n’wana wakwe nsati naswona ha yini a endle tano?
  • Xana xikhongelo xa nandza wa Abrahama xi hlamuriwe njhani?
  • Xana Raveka u te yini loko a vutisiwa leswaku wa swi lava ku tekiwa hi Isaka?
  • I yini lexi endleke leswaku Isaka a tlhela a tsaka?

Swivutiso swo engetela

  • Hlaya Genesa 24:1-67.

    Hi tihi timfanelo letinene leti Raveka a ti kombiseke loko a hlangana ni nandza wa Abrahama exihlobyeni?

    Hi xihi xikombiso lexinene lexi Vakreste va namuntlha va xi kumaka eka leswi Abrahama a swi endleleke Isaka?

    Ha yini hi fanele hi tinyika nkarhi wo anakanyisisa hilaha Isaka a endleke hakona?

DYONDZA SWO TALA

TIDYONDZO TA SWIFANISO

Timfanelo Letinene Ta Raveka

Kopa ntlango lowu kutani u tirhisa Bibele ya wena ku dyondza leswaku u nga n’wi tekelela njhani Raveka.

DYONDZISA VANA VA WENA

Raveka A A Lava Ku Tsakisa Yehovha

Xana hi nga endla yini leswaku hi fana na Raveka? Hlaya rungula kutani u dyondza swo tala ha yena.