Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 15: Nsati Wa Lota U Langute eNdzhaku

Dyondzo 15: Nsati Wa Lota U Langute eNdzhaku

Lota ni ndyangu wakwe a va tshama na Abrahama etikweni ra Kanana. Siku rin’wana Abrahama u byele Lota a ku: ‘A ku na ndhawu leyi ringaneke ya swifuwo swa hina hinkwaswo. Ndzi kombela hi hambana. Loko u ya etlhelo leri, mina ndzi ta ya eka leriya.’

Lota u langute tiko. U vone xiphemu xo saseka swinene xa tiko lexi nga ni mati ni madyelo yo tala lamanene ya swifuwo swakwe. Xiphemu xexo a ku ri Muganga wa Yordani. Kutani Lota u rhurhisele ndyangu ni swifuwo swakwe kwalaho. Va hetelele va ake emutini wa Sodoma.

Vanhu va le Sodoma a va bihe ngopfu. Sweswo a swi karhata Lota, hikuva a a ri munhu wo lulama. Hambi ku ri Xikwembu a xi karhatekile. Eku heteleleni, Xikwembu xi rhumele tintsumi timbirhi ku tsundzuxa Lota leswaku xi ta lovisa Sodoma ni muti wa le kusuhi wa Gomora hikwalaho ka vubihi bya yona.

Tintsumi ti byele Lota ti ku: ‘Hatlisa! Teka nsati ni vana va wena vambirhi va vanhwanyana mi huma laha!’ Lota ni ndyangu wakwe a va nonoka, hiloko tintsumi ti va khoma hi voko ti va humesa emutini. Hiloko ntsumi yin’wana yi ku: ‘Balekani! Mi nga languti endzhaku. Balekelani etintshaveni leswaku mi nga fi.’

Lota ni vana vakwe va vanhwanyana va yingisile kutani va tsutsuma va huma eSodoma. A va yimanga naswona a va langutanga endzhaku. Kambe nsati wa Lota a nga yingisanga. Endzhaku ka loko va fambe mpfhukanyana ku suka eSodoma, u yimile kutani a languta endzhaku. Hiloko nsati wa Lota a hundzuka tshuka ra munyu. Xana wa n’wi vona laha xifanisweni?

Hi nga kuma dyondzo leyinene emhakeni leyi. Yi hi kombisa leswaku Xikwembu xi ponisa lava xi yingisaka kambe lava nga xi yingisiki va ta lahlekeriwa hi vutomi bya vona.

Genesa 13:5-13; 18:20-33; 19:1-29; Luka 17:28-32; 2 Petro 2:6-8.

Lota a baleka eSodoma


Swivutiso

  • Ha yini Abrahama na Lota va hambanile?
  • Ha yini Lota a hlawule ku ya tshama eSodoma?
  • Vanhu va le Sodoma a va ri vanhu va njhani?
  • Xana tintsumi timbirhi ti n’wi tsundzuxe yini Lota?
  • Ha yini nsati wa Lota a hundzuke tshuka ra munyu?
  • Xana hi dyondza yini eka mhaka ya nsati wa Lota?

Swivutiso swo engetela

  • Hlaya Genesa 13:5-13.

    Hi dyondza yini eka Abrahama emhakeni yo lulamisa swiphiqo exikarhi ka vanhu?

  • Hlaya Genesa 18:20-33.

    Xana ndlela leyi Yehovha a tirhisaneke ha yona na Abrahama yi hi tiyisekisa njhani leswaku Yehovha na Yesu va ta avanyisa hi vululami?

  • Hlaya Genesa 19:1-29.

    Xana mhaka leyi ya Bibele yi ri kombisa njhani langutelo ra Xikwembu hi vusodoma?

    Hi kwihi ku hambana loku nga kona eka tindlela leti Lota na Abrahama va anguleke ha tona eka nkongomiso wa Xikwembu naswona hi nga dyondza yini eka swona?

  • Hlaya Luka 17:28-32.

    Xana nsati wa Lota a a ri ni langutelo rihi hi swilo leswi vonakaka naswona leswi swi hi lemukisa yini?

  • Hlaya 2 Petro 2:6-8.

    Ku fana na Lota, xana hi fanele hi va ni langutelo rihi hi misava leyi hi hanyaka exikarhi ka yona leyi nga xi xiximiki Xikwembu?

DYONDZA SWO TALA

Nsati Wa Lota A Hundzuka Tshuka Ra Munyu

Hlaya mhaka ya Bibele kutani u hlanganisa mathonsi. U nga dyondza yini eka nsati wa Lota.

Lota Ni Ndyangu Wakwe—Swifaniso Swa Mhaka Ya Le Bibeleni

Kopa ntlango lowu ivi u vona leswi u nga swi dyondzaka eka Lota ni ndyangu wakwe.