Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 14: Xikwembu Xi Ringa Ripfumelo Ra Abrahama

Dyondzo 14: Xikwembu Xi Ringa Ripfumelo Ra Abrahama

Xana wa swi vona leswaku Abrahama u endla yini laha? U tamele mukwana naswona swi vonaka onge u ta dlaya n’wana wakwe. Ha yini a lava ku dlaya n’wana wakwe? Xo sungula, a hi voneni leswaku Abrahama na Sara va n’wi kume njhani n’wana wa vona.

Abrahama a lava ku endla gandzelo hi Isaka

Tsundzuka, Xikwembu xi va tshembise leswaku va ta kuma n’wana. Kambe a swi vonaka onge a swi nge koteki sweswo hikuva Abrahama na Sara a va dyuhele swinene. Hambiswiritano, Abrahama a a kholwa leswaku Xikwembu xi nga endla nchumu lowu vonakaka wu nga koteki. Kutani ku endleke yini?

Ku hundze lembe hinkwaro endzhaku ka loko Xikwembu xi endle xitshembiso xexo. Kutani loko Abrahama a ri ni malembe ya 100 na Sara a ri ni malembe ya 90 hi vukhale, va kume n’wana wa mufana la vuriwaka Isaka. Xikwembu xi endle leswi xi swi tshembiseke!

Kambe loko Isaka a kurile, Yehovha u ringe ripfumelo ra Abrahama. U n’wi vitanile a ku: ‘Abrahama!’ Hiloko Abrahama a hlamula a ku: ‘Hi mina loyi!’ Kutani Xikwembu xi ku: ‘Teka n’wana wa wena, n’wana wa wena la nga swakwe, Isaka, u ya entshaveni leyi ndzi nga ta ku komba yona. Loko u fika kwalaho, dlaya n’wana wa wena kutani u endla gandzelo ha yena.’

Marito wolawo ma n’wi twise ku vava ngopfu Abrahama, hikuva Abrahama a a n’wi rhandza swinene n’wana wakwe. Tsundzuka, Xikwembu a xi tshembise leswaku vana va Abrahama a va ta tshama etikweni ra Kanana. Kambe, sweswo a swi ta endleka njhani loko Isaka a file? Abrahama a a nga swi twisisi kambe u xi yingisile Xikwembu.

Loko a fika entshaveni, Abrahama u bohe Isaka kutani a n’wi veka ealitarini leyi a yi akeke. Hiloko a humesa mukwana leswaku a dlaya n’wana wakwe. Kambe hi nkarhi wolowo ntsumi ya Xikwembu yi huwelela yi ku: ‘Abrahama, Abrahama!’ Kutani Abrahama a hlamula a ku: ‘Hi mina loyi!’

Xikwembu xi ku: ‘U nga vavisi n’wana naswona u nga endli nchumu eka yena. Sweswi ndza swi tiva leswaku u ni ripfumelo eka mina hikuva a wu ndzi alelanga hi n’wana wa wena loyi a nga swakwe.’

Hakunene Abrahama a a ri ni ripfumelo lerikulu ngopfu eka Xikwembu! A a tshemba leswaku a xi kona lexi nga tsandzaka Yehovha nileswaku Yehovha a nga n’wi pfuxa Isaka eka lava feke. Kambe, entiyisweni Xikwembu a xi nga swi lavi leswaku Abrahama a dlaya Isaka. Kutani Xikwembu xi endle leswaku nyimpfu yi phaseka ekhwatini leri nga ekusuhi, kutani xi byele Abrahama leswaku a endla gandzelo ha yona ematshan’weni ya n’wana wakwe.

Genesa 21:1-7; 22:1-18.



Swivutiso

  • Xana Xikwembu xi n’wi tshembise yini Abrahama, naswona Xikwembu xi xi hetisise njhani xitshembiso xa xona?
  • Hilaha swi kombisiweke hakona laha xifanisweni, Xikwembu xi ri ringe njhani ripfumelo ra Abrahama?
  • Xana Abrahama u endle yini hambileswi a a nga xi twisisi xivangelo xa xileriso xa Xikwembu?
  • Ku humelele yini loko Abrahama a humesa mukwana leswaku a ta dlaya n’wana wakwe?
  • Xana ripfumelo ra Abrahama a ri tiye ku fikela kwihi eka Xikwembu?
  • Xana Xikwembu xi n’wi nyike yini Abrahama leswaku a endla magandzelo, naswona xi n’wi nyike njhani?

Swivutiso swo engetela

  • Hlaya Genesa 21:1-7.

    Ha yini Abrahama a yimbise n’wana wakwe hi siku ra vunhungu?

  • Hlaya Genesa 22:1-18.

    Xana Isaka u titsongahate njhani eka tata wakwe Abrahama, naswona leswi a swi xi fanekisela njhani xiendlakalo xa nkoka xa nkarhi lowu taka?

DYONDZA SWO TALA

Abrahama—“Tata Wa Hinkwavo Lava Nga Ni Ripfumelo”

Abrahama u ri kombise njhani ripfumelo? U nga lava ku tekelela ripfumelo ra Abrahama hi tindlela tihi?