Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 13: Abrahama—Munghana Wa Xikwembu

Dyondzo 13: Abrahama—Munghana Wa Xikwembu

Yin’wana ya tindhawu leti vanhu va yeke va ya tshama eka yona endzhaku ka Ndhambi a yi vuriwa Ura. Yi ve muti wa nkoka lowu a wu ri ni makaya yo saseka. Kambe vanhu va kwalaho a va gandzela swikwembu swa hava. A va gandzela hi ndlela yoleyo ni le Babele. Vanhu va le Ura ni le Babele a va nga fani na Nowa ni n’wana wakwe Xeme lava yeke mahlweni va tirhela Yehovha.

Eku heteleleni, Nowa lowo tshembeka u file emalembeni ya 350 endzhaku ka ndhambi. Endzhaku ka malembe mambirhi, ku velekiwe wanuna loyi u n’wi vonaka exifanisweni lexi. A a ri munhu wo hlawuleka swinene eka Xikwembu. Vito ra yena a a ri Abrahama. A a tshama ni ndyangu wakwe emutini wolowo wa Ura.

Abrahama a langute tinyeleti

Siku rin’wana Yehovha u byele Abrahama a ku: ‘Suka eUra swin’we ni le ka maxaka ya wena, kutani u ya etikweni leri ndzi nga ta ku komba rona.’ Xana Abrahama u xi yingisile Xikwembu a siya vulovolovo hinkwabyo bya le Ura? Ina, u xi yingisile. Leswi Abrahama a a yingisa Xikwembu minkarhi hinkwayo, u kale a tiviwa tanihi munghana wa Xikwembu.

Van’wana va ndyangu wa Abrahama va fambe na yena loko a suka eUra. Un’wana wa vona a ku ri tata wakwe Tera. Lota, ntukulu wakwe na yena u fambe na vona. Phela, na Sara nsati wa Abrahama u fambe na vona. Hi ku famba ka nkarhi, hinkwavo va fike endhawini leyi vuriwaka Harani, laha Tera a feleke kona. A va ri ekule swinene ni le Ura.

Endzhakunyana Abrahama ni ndyangu wakwe va sukile eHarani kutani va fika etikweni leri vuriwaka Kanana. Kwalaho Yehovha u te: ‘Leri i tiko leri ndzi nga ta ri nyika vana va wena.’ Abrahama a a tshama ematendeni le Kanana.

Xikwembu xi sungule ku pfuna Abrahama lerova u ve ni ntlhambi lowukulu wa tinyimpfu ni swifuwo swin’wana ni malandza yo tala ngopfu. Kambe yena na Sara a va nga ri na vana.

Loko Abrahama a ri ni malembe ya 99, Yehovha u te: ‘Ndzi tshembisa leswaku u ta va tata wa vanhu vo tala.’ Kambe, xana sweswo a swi ta endlekisa ku yini tanihi leswi Abrahama na Sara se a va kurile lerova a va nga ha ta kuma n’wana?

Genesa 11:27-32; 12:1-7; 17:1-8, 15-17; 18:9-19.



Swivutiso

  • A ku tshama vanhu va njhani emutini wa Ura?
  • I mani wanuna loyi a nga laha xifanisweni, u velekiwe rini, naswona a a tshama kwihi?
  • Xana Xikwembu xi byele Abrahama leswaku a endla yini?
  • Ha yini Abrahama a a vitaniwa munghana wa Xikwembu?
  • I mani loyi a fambeke na Abrahama loko a suka eUra?
  • Xana Xikwembu xi n’wi byele yini Abrahama loko a fika etikweni ra Kanana?
  • Xana Xikwembu xi n’wi tshembise yini Abrahama loko a ri ni malembe ya 99?

Swivutiso swo engetela

  • Hlaya Genesa 11:27-32.

    Xana Abrahama na Lota a va ri maxaka hi ndlela yihi?

    Hambileswi Tera a pfumeleke ku famba ni ndyangu wakwe eKanana, xana hi swi tivisa ku yini leswaku entiyisweni a ku ri Abrahama loyi a vuleke leswaku va famba, naswona ha yini a endle tano?

  • Hlaya Genesa 12:1-7.

    Xana Yehovha u kurise ntwanano wa Abrahama ku ya fika kwihi endzhaku ka loko a fike etikweni ra Kanana?

  • Hlaya Genesa 17:1-8, 15-17.

    Vito ra Abrama ri cinciwe njhani loko a ri ni malembe ya 99, naswona ha yini ri cinciwile?

    Hi yihi mikateko ya nkarhi lowu taka leyi Yehovha a yi tshembiseke Sara?

  • Hlaya Genesa 18:9-19.

    Eka Genesa 18:19, hi byihi vutihlamuleri lebyi vatatana va nga na byona?

    Hi wihi ntokoto wa Sara lowu kombisaka leswaku a hi nge n’wi fihleli nchumu Yehovha?

DYONDZA SWO TALA

Hi Nga Dyondza Yini Eka Abrahama?

Abrahama u wu kombise njhani musa eka van’wana? Kuma nhlamulo hi ku kopa ntlango lowu wa xifaniso u tlhela u hlaya xitori xa le Bibeleni.