Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 12: Vanhu Va Aka Xihondzo Lexikulu

Dyondzo 12: Vanhu Va Aka Xihondzo Lexikulu

Ku hundze malembe yo tala. Kutani vana va Nowa va va ni vana vo tala. Naswona vana va vona va kurile kutani na vona va va ni vana vo tala. Hi ku hatlisa, vanhu a va tele emisaveni.

Un’wana wa vanhu lava a ku ri ntukulu-xinguwe wa Nowa la vuriwaka Nimrodo. A a ri wanuna wo homboloka loyi a a hlota ni ku dlaya swiharhi ni vanhu. Nakambe Nimrodo u tiendle hosi kutani a fuma vanhu van’wana. Xikwembu a xi nga n’wi rhandzi Nimrodo.

Enkarhini wolowo, vanhu hinkwavo a va vulavula ririmi rin’we. Nimrodo a a lava ku va hlanganisa hinkwavo leswaku a ta kota ku va fuma. Xana wa swi tiva leswaku u endle yini? U byele vanhu leswaku va aka muti lowu nga ni xihondzo lexikulu. Hi lavaya laha xifanisweni va karhi va foroma switina.

Yehovha Xikwembu a a nga wu tsakeli muako lowu. Xikwembu a xi lava leswaku vanhu va hangalaka va tata misava. Kambe vanhu a va ku: ‘Tanani! A hi akeni muti lowu nga ni xihondzo xo leha swinene lexi nhlohlorhi ya xona yi nga ta fika ematilweni. Kutani hi ta va ni ndhuma!’ Vanhu a va nga lavi ku dzunisa Xikwembu, kambe a va lava leswaku ku dzunisiwa vona.

Kutani Xikwembu xi endle leswaku vanhu va tshika ku aka xihondzo. Xana wa swi tiva leswaku xi va tshikise njhani? Hi ku endla leswaku vanhu va vulavula tindzimi to hambana-hambana ematshan’weni ya ririmi rin’we. Vanhu lava akaka a va nga ha twanani. Hi yona mhaka leyi muti wa vona wu thyiweke vito ra Babele kumbe Babilona, leri vulaka “Mpfilumpfilu.”

Hiloko vanhu va sungula ku suka eBabele. Vanhu lava vulavulaka ririmi leri fanaka va fambe swin’we va ya tshama swin’we etindhawini tin’wana ta misava.

Genesa 10:1, 8-10; 11:1-9.

Vatirhi va ri karhi va aka xihondzo lexikulu


Swivutiso

  • Nimrodo a a ri mani, naswona Xikwembu a xi titwa njhani ha yena?
  • Exifanisweni lexi, ha yini vanhu va endla switina?
  • Ha yini Yehovha a a nga wu tsakeli ntirho wo aka muako lowu?
  • Xana Xikwembu xi wu yimise njhani ntirho wo aka xihondzo?
  • Xana muti lowu a wu thyiwe vito rihi, naswona vito rero a ri vula yini?
  • Ku humelele yini hi vanhu endzhaku ka loko Xikwembu xi pfilunganye tindzimi ta vona?

Swivutiso swo engetela

  • Hlaya Genesa 10:1, 8-10.

    Xana Nimrodo a a ri munhu wa njhani, naswona leswi swi hi lemukisa yini?

  • Hlaya Genesa 11:1-9.

    A xi ri xihi xikongomelo xo aka xihondzo, naswona ha yini ntirho lowu wu nga ha yanga emahlweni?