Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 11: Nkwangulatilo Wo Sungula

Dyondzo 11: Nkwangulatilo Wo Sungula

Xana wa swi tiva leswaku Nowa u rhange a endla yini loko yena ni ndyangu wakwe va huma engalaveni? U endlele Xikwembu gandzelo kumbe nyiko. Hi loyi u karhi wa ri endla exifanisweni lexi nga laha hansi. Nowa u nyikele nyiko leyi ya swiharhi a nkhensa Xikwembu hi ku va xi ponise ndyangu wakwe eka ndhambi leyikulu.

Ngalava ni nkwangulatilo

Xana u ehleketa leswaku Yehovha u yi tsakerile nyiko ya kona? Ina, u yi tsakerile. Kutani u tshembise Nowa leswaku a nge he tlheli a lovisa misava hi ndhambi.

Ku nga ri khale misava a yi omile, kutani Nowa ni ndyangu wakwe va sungula vutomi lebyintshwa ehandle ka ngalava. Xikwembu xi va katekisile kutani xi ku eka vona: ‘Mi fanele mi tswala vana vo tala. Mi fanele mi andza kukondza vanhu va tata misava.’

Kambe, hi ku famba ka nkarhi swi nga ha endleka vanhu va chava loko va twa hi ta ndhambi leyikulu, va ehleketa leswaku yi nga tlhela yi humelela. Kutani Xikwembu xi nyikele xikombiso hi nchumu lowu nga ta tsundzuxa vanhu hi xitshembiso xa xona xa leswaku a xi nge he tlheli xi lovisa misava hi ndhambi. Xana wa swi tiva leswaku xi va nyike yini lexi a xi ta va tsundzuxa sweswo? Xi va nyike nkwangulatilo.

Nowa ni ndyangu wakwe

Nkwangulatilo wu tala ku vonaka empfhukeni loko mpfula yi xa, kutani ku tlhava dyambu. Nkwangulatilo wu nga ha va ni mivalavala yo tala yo saseka. Xana u tshama u wu vona? Xana wa wu vona lowu nga laha xifanisweni?

Xikwembu xi te: ‘Ndzi tshembisa leswaku a ndzi nge he tlheli ndzi lovisa vanhu ni swiharhi hi ndhambi. Ndzi veka nkwangulatilo wa mina emapapeni. Kutani loko ku huma nkwangulatilo, ndzi ta wu vona naswona ndzi ta tsundzuka xitshembiso xa mina.’

Kutani loko u vona nkwangulatilo, xana wu fanele wu ku tsundzuxa yini? Ina, wu fanele wu ku tsundzuxa xitshembiso xa Xikwembu xa leswaku a xi nge he tlheli xi lovisa misava hi ndhambi leyikulu.

Genesa 8:18-22; 9:9-17.



Swivutiso

  • Hilaha swi kombisiweke hakona laha xifanisweni, hi wihi nchumu wo sungula lowu Nowa a wu endleke loko a huma engalaveni?
  • Hi xihi xileriso lexi Xikwembu xi xi nyikeke Nowa ni ndyangu wakwe endzhaku ka Ndhambi?
  • Hi xihi xitshembiso lexi Xikwembu xi xi endleke?
  • Loko hi vona nkwangulatilo, wu fanele wu hi tsundzuxa yini?

Swivutiso swo engetela

  • Hlaya Genesa 8:18-22.

    Xana namuntlha hi nga n’wi nyika njhani Yehovha ku “nun’hwela loku tsakisaka?”

    Xana Yehovha u xiye yini hi xiyimo xa mbilu ya munhu naswona i yini lexi hi faneleke hi xi endla?

  • Hlaya Genesa 9:9-17.

    Hi wihi ntwanano lowu Yehovha a wu endleke ni swivumbiwa hinkwaswo leswi nga emisaveni?

    Xana ntwanano wa nkwangulatilo wu ta tirha ku fikela rini?

DYONDZA SWO TALA

Nowa U Hlayisiwe Ni “Van’wana Va Nkombo”

Xana Nowa ni ndyangu wakwe va pone njhani enkarhini wa mangava lowu a wu nga si tshama wu va kona?