Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 9: Nowa A Aka Ngalava

Dyondzo 9: Nowa A Aka Ngalava
Vanhu va ri karhi va hleka Nowa

Nowa a a ri ni nsati ni vana vanharhu va vafana. Mavito ya vana vakwe a ku ri Xeme, Hamu na Yafeta. Naswona hinkwavo a va tekile. Xisweswo a ku ri ni vanhu va nhungu endyangwini wa Nowa.

Xikwembu xi kombele Nowa leswaku a endla nchumu lowu nga tolovelekangiki. Xi n’wi byele leswaku a aka ngalava leyikulu. Ngalava leyi a yi ri yikulu ku fana ni xikepe, kambe a yi fana ni bokisi lerikulu, ro leha. Xikwembu xi te: ‘Yi endle yi va ni swithezi swinharhu, u endla makamara endzeni ka yona.’ Makamara lawa a ma ta va ya Nowa ni ndyangu wakwe, ya swiharhi ni ya swakudya hinkwaswo leswi a va ta swi lava.

Xikwembu xi tlhele xi byela Nowa ku lunghisa ngalava leswaku mati ma nga tshuki ma nghena endzeni ka yona. Xikwembu xi te: ‘Ndzi ta tisa ndhambi leyikulu kutani ndzi lovisa misava hinkwayo. Un’wana ni un’wana la nga riki engalaveni u ta fa.’

Nowa ni vana vakwe va yingise Yehovha kutani va sungula ku aka. Kambe vanhu lavan’wana a vo hleka. Va ye emahlweni va endla swo biha. A nga kona la kholweke Nowa loko a va byela leswi Xikwembu a xi ta swi endla.

Ndyangu wa Nowa wu ri karhi wu nghenisa swiharhi ni swakudya engalaveni

Swi teke nkarhi wo leha ku aka ngalava hikuva a yi ri yikulu ngopfu. Eku heteleleni, endzhaku ka malembe yo tala, va yi hetile. Kutani Xikwembu xi byela Nowa ku nghenisa swiharhi engalaveni. Xikwembu xi n’wi byele leswaku swiharhi swin’wana a swi nghenisa hi swimbirhi-mbirhi, swa nkati ni swa matsune. Kambe Xikwembu xi byele Nowa leswaku a nghenisa muxaka wun’wana wa swiharhi hi nkombo-nkombo. Xikwembu xi tlhele xi byela Nowa ku nghenisa swinyenyana hi mixaka-xaka ya swona hinkwayo. Nowa u endle leswi Xikwembu xi swi vuleke.

Endzhaku ka sweswo Nowa ni ndyangu wakwe na vona va nghene engalaveni. Hiloko Xikwembu xi pfala nyangwa. Nowa ni ndyangu wakwe va rindze va ri endzeni. Ehleketa leswaku a swi ta va njhani loko na wena a wu ri endzeni ka ngalava na vona, u rindzile. Xana ndhambi a yi ta va kona hakunene hilaha Xikwembu xi vuleke hakona?

Genesa 6:9-22; 7:1-9.



Swivutiso

  • A va ri vangani endyangwini wa Nowa, naswona mavito ya vana vakwe vanharhu a ku ri vamani?
  • Hi wihi nchumu lowu nga tolovelekangiki lowu Xikwembu xi kombeleke Nowa leswaku a wu endla, naswona ha yini?
  • Xana vaakelani va Nowa va angule njhani loko a va byela hi ta ngalava?
  • Xana Xikwembu xi byele Nowa leswaku a endla yini hi swiharhi?
  • Endzhaku ka loko Xikwembu xi pfale nyangwa wa ngalava, Nowa ni ndyangu wakwe a va fanele va endla yini?

Swivutiso swo engetela

  • Hlaya Genesa 6:9-22.

    I yini lexi endleke leswaku Nowa a va mugandzeri wo hlawuleka wa Xikwembu?

    Xana Yehovha u titwa njhani hi madzolonga, naswona leswi swi fanele swi yi khumba njhani ndlela leyi hi hlawulaka vuhungasi ha yona?

    Xana hi nga n’wi tekelela njhani Nowa loko hi kuma nkongomiso lowu taka hi nhlengeletano ya Yehovha?

  • Hlaya Genesa 7:1-9.

    Xana mhaka ya leswaku Yehovha u teke Nowa munhu la nga hetisekangiki a ri lowo lulama yi hi khutaza njhani namuntlha?