Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 8: Swihontlovila eMisaveni

Dyondzo 8: Swihontlovila eMisaveni

Loko wo vona munhu wo leha ku fika elwangwini a ta a ku kongomile, a wu ta ehleketa yini? Munhu wo tano i xihontlovila! Ku tshame ku va ni swihontlovila swa xiviri emisaveni. Bibele yi kombisa leswaku vatata wa swihontlovila leswi a ku ri tintsumi ta le tilweni. Kambe, swi endlekise ku yini sweswo?

Swihontlovila leswi rhandzaka madzolonga

Tsundzuka, ntsumi yo biha leyi vuriwaka Sathana a yi pfuxa hasahasa. A yi ringeta ni ku kucetela tintsumi ta Xikwembu leswaku ti endla swo biha. Hi ku famba ka nkarhi, tin’wana ta tintsumi leti ti sungule ku yingisa Sathana. Ti tshike ku endla ntirho lowu Xikwembu a xi ti nyike wona etilweni. Ti rhelele emisaveni ti ta tiendlela mimiri ya nyama. Xana wa swi tiva leswaku ha yini ti endle tano?

Bibele yi vula leswaku hileswi vana lava va Xikwembu va voneke vavasati vo saseka emisaveni kutani va lava ku tshama na vona. Kutani va tile emisaveni ivi va tekana ni vavasati lava. Bibele yi vula leswaku sweswo a swi hoxile, hikuva Xikwembu xi endle tintsumi leswaku ti tshama etilweni.

Loko tintsumi ti kuma vana ni vasati va tona, vana lava a va nga fani ni vana van’wana. A swi nga vonaki loko va ha ku velekiwa. Kambe va ye mahlweni va kula swinene, va va ni matimba ngopfu, kukondza va va swihontlovila.

Swihontlovila leswi a swi hombolokile. Naswona a swi vavisa vanhu hikuva a swi ri swikulu ngopfu naswona a swi ri ni matimba. Swi ringete ku sindzisa vanhu hinkwavo leswaku va fana na swona hi vubihi.

Enoko se a a file, kambe a ku ri ni wanuna un’wana emisaveni loyi na yena a a lulamile. Vito ra wanuna loyi a ku ri Nowa. Minkarhi hinkwayo a a endla leswi Xikwembu xi swi lavaka.

Siku rin’wana Xikwembu xi byele Nowa leswaku nkarhi wu fikile wa leswaku xi lovisa vanhu lavo homboloka. Kambe Xikwembu a xi ta ponisa Nowa, ndyangu wakwe ni swiharhi swo tala. A hi voneni leswaku Xikwembu xi swi endlise ku yini leswi.

Genesa 6:1-8; Yudha 6.



Swivutiso

  • Ku humelele yini loko tintsumi tin’wana ta Xikwembu ti yingise Sathana?
  • Ha yini tintsumi tin’wana ti tshike ntirho wa tona etilweni kutani ti ta emisaveni?
  • Ha yini a swi hoxile leswaku tintsumi ti ta emisaveni kutani ti tihundzula vanhu?
  • Xana vana va tintsumi a va hambane njhani ni vana van’wana?
  • Hilaha u swi vonaka hakona laha xifanisweni, xana vana va tintsumi va endle yini loko se va ri swihontlovila?
  • Endzhaku ka Enoko, i mani wanuna wo lulama loyi a hanyeke emisaveni naswona ha yini Xikwembu xi n’wi tsakerile?

Swivutiso swo engetela

  • Hlaya Genesa 6:1-8.

    Xana Genesa 6:6 yi swi kombisa njhani leswaku ndlela leyi hi hanyaka ha yona yi nga khumba mintlhaveko ya Yehovha?

  • Hlaya Yudha 6.

    Xana tintsumi letiya ti “nga hlayisangiki xiyimo xa tona xo sungula” esikwini ra Nowa i xitsundzuxo eka hina hi ndlela yihi?