Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 7: Wanuna Wa Vurhena

Dyondzo 7: Wanuna Wa Vurhena
Enoko

Loko nhlayo ya vanhu yi engeteleka emisaveni, vo tala va vona va endle swilo swo biha ku fana na Kayini. Kambe ku ni wanuna un’wana loyi a a hambane na vona. Wanuna loyi i Enoko. Enoko a a ri ni vurhena. Hinkwavo vanhu lava a a hanya na vona a va endla swilo swo biha swinene, kambe Enoko u ye emahlweni a tirhela Xikwembu.

Xana wa swi tiva leswaku ha yini vanhu va le nkarhini wolowo va endle swilo swo biha swonghasi? Tivutise, I mani la endleke leswaku Adamu na Evha va tlula nawu wa Xikwembu ni ku dya mbhandzu lowu Xikwembu xi vuleke leswaku a va fanelanga va wu dya? Ina, a ku ri ntsumi yo homboloka. Bibele yi vula leswaku i Sathana. Naswona u ringeta ku endla leswaku hinkwerhu hi va vanhu vo homboloka.

Munhu a tekeriwa swilo swa yena un’wana a dlayiwa

Siku rin’wana Yehovha Xikwembu u lerise Enoko leswaku a byela vanhu mhaka leyi a va nga lavi ku yi twa. Hi leyi mhaka ya kona: ‘Siku rin’wana Xikwembu xi ta lovisa vanhu hinkwavo lavo biha.’ Swi nga ha endleka vanhu va hlundzuke ngopfu loko va twa mhaka leyi. Va nga ha va va ringete ni ku dlaya Enoko. Hikwalaho Enoko a a fanele a va ni xivindzi swinene xo byela vanhu lava malunghana ni leswi Xikwembu a xi ta swi endla.

Xikwembu a xi n’wi pfumelelanga Enoko leswaku a hanya nkarhi wo leha exikarhi ka vanhu volavo vo homboloka. Enoko u lo hanya malembe ya 365 ntsena. Ha yini hi ku “malembe ya 365 ntsena”? Hikuva hi minkarhi yoleyo vanhu a va tiyile ku tlula sweswi naswona a va hanya malembe yo tala ngopfu. Phela, n’wana wa Enoko la vuriwaka Metusela u hanye malembe ya 969!

Vanhu va ri karhi va endla swilo swo biha

Endzhaku ka ku fa ka Enoko, vanhu va ye emahlweni va nyanya ku homboloka. Bibele yi vula leswaku ‘hinkwaswo leswi a va swi ehleketa a swi bihile nkarhi hinkwawo’ naswona ‘misava a yi tele madzolonga.’

Xana wa xi tiva xivangelo xin’wana lexi a xi endla leswaku ku va ni swiphiqo swo tala swonghasi emisaveni hi nkarhi wolowo? Hileswi Sathana a a tirhisa ndlela leyintshwa yo susumetela vanhu ku endla swilo swo biha. Hi ta dyondza ha yona edyondzweni leyi landzelaka.

Genesa 5:21-24, 27; 6:5; Vaheveru 11:5; Yudha 14, 15.



Swivutiso

  • Xana Enoko a a hambane njhani ni vanhu van’wana?
  • Hikwalaho ka yini vanhu va le nkarhini wa Enoko a va endla swilo swo tala swo biha?
  • Hi swihi swilo swo biha leswi vanhu a va swi endla? (Languta xifaniso.)
  • Ha yini Enoko a a fanele a va ni xivindzi?
  • Xana vanhu a va hanya nkarhi wo tanihi kwihi enkarhini wolowo, kambe Enoko u hanye nkarhi wo tanihi kwihi?
  • Ku humelele yini endzhaku ka loko Enoko a file?

Swivutiso swo engetela

  • Hlaya Genesa 5:21-24, 27.

    Xana Enoko a a ri ni vuxaka bya njhani na Yehovha?

    Hi ku ya hi Bibele, i mani munhu loyi a hanyeke malembe yo tala ku tlula vanhu hinkwavo lava tshameke va hanya, naswona a a ri ni malembe mangani loko a fa?

  • Hlaya Genesa 6:5.

    Xana swiyimo emisaveni a swi bihe ku fika kwihi endzhaku ka ku fa ka Enoko, naswona sweswo swi fambisana njhani ni nkarhi wa hina?

  • Hlaya Vaheveru 11:5.

    Hi yihi mfanelo leyinene ya Enoko leyi “tsakiseke Xikwembu” naswona vuyelo byi ve byihi?

  • Hlaya Yudha 14, 15.

    Xana Vakreste namuntlha va nga xi tekelela njhani xivindzi xa Enoko loko va ri karhi va tsundzuxa vanhu malunghana ni nyimpi leyi taka ya Armagedoni?