Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 6: N’wana Lonene Ni Lowo Homboloka

Dyondzo 6: N’wana Lonene Ni Lowo Homboloka

Sweswi languta Kayini na Avele. Havambirhi ka vona va kurile. Kayini i murimi. U byala mavele, mihandzu ni matsavu.

Kayini na Avele va nyikela magandzelo eka Xikwembu

Avele u risa tinyimpfu. U rhandza ku khathalela swinyimpfana. Swa kula swi va tinyimpfu letikulu, sweswi Avele u fanele a risa ntlhambi lowukulu wa tinyimpfu.

Siku rin’wana Kayini na Avele va tise nyiko eka Xikwembu. Kayini u tise swakudya leswi a swi tshoveleke. Naswona Avele u tise nyimpfu leyinene ngopfu eka leti a a ri na tona. Yehovha u tsakisiwe hi Avele ni nyiko yakwe. Kambe a nga n’wi tsakelanga Kayini ni nyiko yakwe. Xana wa swi tiva leswaku a swi vangiwa hi yini?

A ku nga ri swona leswaku nyiko ya Avele a yi tlula ya Kayini. Kambe hileswi Avele a a ri munhu lonene. A a rhandza Yehovha ni makwavo. Kambe Kayini a a hombolokile; a a nga n’wi rhandzi makwavo.

Kutani Xikwembu xi byele Kayini leswaku u fanele a cinca tindlela takwe. Kambe Kayini a nga yingisanga. U hlundzuke ngopfu hikuva Xikwembu a xi rhandza Avele ngopfu. Kutani Kayini u byele Avele a ku, “A hi ye enhoveni.” Loko va ri voxe le nhoveni, Kayini u be makwavo Avele. U n’wi be hi matimba lerova a n’wi dlaya. Xana sweswo a ku nga ri nchumu wo biha ngopfu lowu Kayini a wu endleke?

Kayini a baleka endzhaku ko dlaya Avele

Hambileswi Avele a feke, Xikwembu xa ha n’wi tsundzuka. Avele a a lulamile, naswona Yehovha a nga va rivali vanhu vo tano. Kutani siku rin’wana Yehovha Xikwembu u ta pfuxa Avele eku feni. Hi nkarhi wolowo Avele a nge he tlheli a fa. U ta swi kota ku hanya laha misaveni hilaha ku nga heriki. Xana a swi nge tsakisi ku va tiva kahle vanhu vo fana na Avele?

Kambe Xikwembu a xi va tsakeli vanhu vo fana na Kayini. Endzhaku ka loko Kayini a dlaye makwavo, Xikwembu xi n’wi xupurile hi ku n’wi hlongola a ya ekule ni ndyangu wa ka vona. Loko Kayini a famba a ya tshama exiphen’wini xin’wana xa misava, u fambe ni makwavo wa xisati, kutani a va nsati wakwe.

Hi ku famba ka nkarhi Kayini ni nsati wakwe va ve ni vana. Vana van’wana va Adamu na Evha na vona va tekanile, na vona va va ni vana. Ku nga ri kungani vanhu a va tele emisaveni. A hi kambisiseni ta van’wana va vona.

Genesa 4:2-26; 1 Yohane 3:11, 12; Yohane 11:25.



Swivutiso

  • Hi yihi mintirho leyi a yi endliwa hi Kayini na Avele?
  • Hi tihi tinyiko leti Kayini na Avele va ti nyikeke Yehovha?
  • Ha yini Yehovha a tsakisiwe hi nyiko ya Avele naswona ha yini ya Kayini yi nga n’wi tsakisanga?
  • Xana Kayini a a ri munhu wa njhani, naswona Yehovha u ringete njhani ku n’wi lulamisa?
  • Xana Kayini u endle yini loko a ri swakwe ni makwavo enhoveni?
  • Hlamusela leswi humeleleke Kayini endzhaku ka loko a dlaye makwavo?

Swivutiso swo engetela

  • Hlaya Genesa 4:2-26.

    Xana Yehovha u xi hlamusele njhani xiyimo xo biha lexi Kayini a a ri eka xona?

    Xana Kayini u xi kombise njhani xiyimo xa mbilu yakwe?

    Yehovha u swi languta njhani ku halata ngati leyi nga riki na nandzu?

  • Hlaya 1 Yohane 3:11, 12.

    Ha yini Kayini a a hlundzukile swinene, naswona swi hi lemukisa ha yini namuntlha?

    Xana Bibele yi swi kombisa njhani leswaku hambiloko swirho swa ndyangu wa ka hina hinkwaswo swi kaneta Yehovha, hi nga swi kota ku tshama hi tshembekile?

  • Hlaya Yohane 11:25.

    Hi xihi xitiyisekiso lexi Yehovha a xi nyikaka hinkwavo lava faka hikwalaho ka ku lulama?

DYONDZA SWO TALA

Hi Nga Dyondza Yini Eka Kayini Na Avele?

Printa ntlango lowu, hlaya tindzimana ta Bibele kutani u tsala laha ku nga tsariwangiki nchumu.

Avele—“Hambiloko A File, Wa Vulavula”

Hi nga dyondza yini hi Avele ni ripfumelo rakwe loko ku nga vuriwi swo tala ha yena eBibeleni?