Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 5: Vutomi Byi Sungula Ku Tika

Dyondzo 5: Vutomi Byi Sungula Ku Tika

Ehandle ka ntanga wa Edeni, Adamu na Evha va langutane ni maxangu yo tala. A va fanele va tirha hi matimba leswaku va kuma swakudya. Ematshan’weni yo vona mirhi yo saseka ya mihandzu, va tikume va rhendzeriwe hi mirhi yo tala ya mitwa ni swihlohlwana. Leswi hi swona leswi humeleleke loko Adamu na Evha va nga xi yingisanga Xikwembu naswona va nga ha ri vanghana va xona.

Adamu a ri karhi a tirha hi matimba ni n’wana wa yena wa mufana

Kambe nchumu wo biha ngopfu, Adamu na Evha va file. Tsundzuka leswaku Xikwembu a xi va lemukisile leswaku va ta fa loko vo dya mbhandzu wa murhi wo karhi. Phela, siku leri va dyeke ha rona va sungule ku hohloka. Va ve swiphukuphuku leswikulu hi ku honisa leswi Xikwembu xi va byeleke swona!

Hinkwavo vana va Adamu na Evha va velekiwe endzhaku ka loko Xikwembu xi hlongole vatswari va vona entangeni wa le Edeni. Leswi swi vula leswaku ni vana va vona a va fanele va dyuhala ni ku fa.

Loko Adamu na Evha a va lo yingisa Yehovha, vona ni vana va vona a va ta hanya vutomi byo tsakisa. Hinkwavo a va ta va va hanye hi ntsako hilaha ku nga heriki emisaveni. Ku hava loyi a a ta dyuhala, a vabya ni ku fa.

Xikwembu xi lava leswaku vanhu va hanya va tsakile hilaha ku nga heriki, naswona xi tshembisa leswaku swi ta endleka siku rin’wana. A hi misava hinkwayo ntsena leyi nga ta saseka, kambe vanhu hinkwavo va ta va ni rihanyo lerinene. Naswona vanhu hinkwavo emisaveni va ta va vanghana va tlhela va va vanghana va Xikwembu.

Evha a ri ni vana va yena

Kambe Evha a a nga ha ri munghana wa Xikwembu. Hikwalaho loko a kuma vana, a swi n’wi tikela swinene. U ve ni switlhavi. Ku tlula ka yena nawu wa Yehovha swi n’wi vangele maxangu lamakulu, a hi swona ke?

Adamu na Evha a va ri ni vana vo tala va vafana ni va vanhwanyana. N’wana wa vona wa mativula va n’wi thye vito ra Kayini. Lowa vumbirhi va n’wi thye vito ra Avele. Ku endleke yini hi vona? Xana wa swi tiva?

Genesa 3:16-23; 4:1, 2; Nhlavutelo 21:3, 4.



Swivutiso

  • Xana Adamu na Evha a va hanya njhani ehandle ka ntanga wa Edeni?
  • I yini lexi sunguleke ku humelela eka Adamu na Evha naswona ha yini?
  • Ha yini vana va Adamu na Evha a va ta dyuhala ni ku fa?
  • Loko Adamu na Evha a va lo yingisa Yehovha, vutomi a byi ta va fambela njhani vona ni vana va vona?
  • Xana Evha u langutane ni maxangu wahi hikwalaho ka leswi a nga yingisangiki?
  • A ku ri vamani mavito ya vana vambirhi vo sungula va Adamu na Evha?
  • I vamani vana lavan’wana lava nga exifanisweni lexi?

Swivutiso swo engetela

  • Hlaya Genesa 3:16-23 na 4:1, 2.

    Xana vutomi bya Adamu byi khumbeke njhani hi ku rhukaniwa ka misava?

    Ha yini vito leri nge Evha leri vulaka leswaku “Lava Hanyaka” ri faneleka?

    Xana Yehovha u swi kombise njhani leswaku wa va khathalela Adamu na Evha hambiloko va dyohile?

  • Hlaya Nhlavutelo 21:3, 4.

    Hi swihi “swilo swo sungula” leswi u swi languteleke hi mahlo-ngati leswaku swi susiwa?