Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 4: Lexi Endleke Va Hlongoriwa Ekaya Ra Vona

Dyondzo 4: Lexi Endleke Va Hlongoriwa Ekaya Ra Vona

Vona leswi a swi endleka. Adamu na Evha a va hlongoriwa entangeni wo saseka wa Edeni. Xana wa swi tiva leswaku a va hlongoleriwela yini?

Adamu na Evha va hlongoriwa entangeni wa Edeni

A va hlongoriwa hikwalaho ka leswi a va endle nchumu wo biha swinene. Xisweswo Yehovha a a va xupula. Xana wa wu tiva nchumu wo biha lowu Adamu na Evha va wu endleke?

Va endle nchumu lowu Xikwembu xi va byeleke leswaku va nga wu endli. Xikwembu xi va byele leswaku va nga dya mihandzu ya mirhi ya le ntangeni. Kambe ku ni murhi wun’we lowu Xikwembu xi va byeleke leswaku va nga wu dyi, loko vo wu dya, va ta fa. Murhi wolowo a ku ri wa xona. Naswona ha swi tiva leswaku swi hoxile ku teka nchumu wa munhu un’wana, a hi swona ke? Kutani, ku humelele yini?

Siku rin’wana loko Evha a ri swakwe entangeni, nyoka yi vulavule na yena. Ehleketa hi sweswo! Yi byele Evha leswaku a dya murhi lowu Xikwembu xi va byeleke leswaku va nga wu dyi. Phela, loko Yehovha a endla tinyoka, a nga ti endlanga leswaku ti kota ku vulavula. Kutani leswi swi vula leswaku ku ni un’wana loyi a endleke leswaku nyoka yi vulavula. A ku ri mani munhu wa kona?

A ku nga ri Adamu. Xisweswo ku fanele ku ri un’wana wa vanhu lava Yehovha a va endleke khale a nga si endla misava. Vanhu volavo i tintsumi, naswona a hi swi koti ku ti vona. Ntsumi yoleyo yi sungule ku tikukumuxa swinene. Yi sungule ku ehleketa leswaku yi fanele yi va mufumi ku fana ni Xikwembu. Naswona a yi lava leswaku vanhu va yi yingisa ematshan’weni yo yingisa Yehovha. Hi yona ntsumi leyi endleke leswaku nyoka yi vulavula.

Ntsumi leyi yi swi kotile ku xisa Evha. U yi khorwile loko yi n’wi byele leswaku u ta fana ni Xikwembu loko o dya mbhandzu lowu. Kutani u dyile mbhandzu wa kona, na Adamu na yena a wu dya. Adamu na Evha a va xi yingisanga Xikwembu, hi yona mhaka leyi va hlongoriweke ekaya ra vona ra ntanga wo saseka.

Kambe, siku rin’wana Xikwembu xi ta endla leswaku misava hinkwayo yi saseka ku fana ni ntanga wa le Edeni. Hi ku famba ka nkarhi, hi ta dyondza leswaku u nga hlanganyela njhani eku endleni ka misava yi va ntanga wo tano. Kambe, a hi rhangeni hi vona leswaku ku endleke yini hi Adamu na Evha.

Genesa 2:16, 17; 3:1-13, 24; Nhlavutelo 12:9.



Swivutiso

  • Exifanisweni lexi, xana ku humelela yini hi Adamu na Evha?
  • Ha yini Yehovha a va xupurile?
  • Xana nyoka yi n’wi byele yini Evha?
  • I mani loyi a endleke leswaku nyoka yi vulavula na Evha?
  • Ha yini Adamu na Evha va hlongoriwile ekaya ra vona ra Paradeyisi?

Swivutiso swo engetela

  • Hlaya Genesa 2:16, 17 na 3:1-13, 24.

    Xana xivutiso lexi nyoka yi xi vutiseke Evha a xi n’wi hehla njhani Yehovha?

    Xikombiso xa Evha i xilemukiso eka hina hi ndlela yihi?

    Xana Adamu na Evha va byi landzule njhani vutihlamuleri bya leswi va swi endleke?

    Xana makerubu lama vekiweke evuxeni bya ntanga wa Edeni ma byi seketele njhani vuhosi bya Yehovha?

  • Hlaya Nhlavutelo 12:9.

    Xana Sathana u humelela hi ndlela yihi eku xiseni ka vanhu leswaku va lwisana ni vulawuri bya Xikwembu?