Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 3: Wanuna Ni Wansati Vo Sungula

Dyondzo 3: Wanuna Ni Wansati Vo Sungula

I yini lexi engeteriweke eka xifaniso lexi? Ina, ku engeteriwe vanhu. I vanhu vo sungula, wanuna ni wansati. Va endliwe hi mani? Va endliwe hi Xikwembu. Xana wa ri tiva vito ra xona? I Yehovha. Wanuna loyi u thyiwe vito ra Adamu kasi wansati loyi u thyiwe vito ra Evha.

Adamu na Evha va ri entangeni wa Edeni

Yehovha Xikwembu u endle Adamu hi ndlela leyi landzelaka. U teke ntshuri wa misava kutani a vumba miri wa munhu, miri lowu hetisekeke. Hiloko a huhutela etinhompfini ta wanuna loyi, kutani Adamu a sungula ku hanya.

Yehovha Xikwembu a a ri ni ntirho lowu a a lava ku wu nyika Adamu. U byele Adamu leswaku a thya swiharhi hinkwaswo mavito. Swi nga ha endleka Adamu a langute swiharhi nkarhi wo leha leswaku a ta swi thya mavito lama faneleke. Loko Adamu a ri karhi a thya swiharhi leswi mavito, u sungule ku lemuka nchumu wo karhi. Xana wa swi tiva leswaku u lemuke yini?

Xiharhi xin’wana ni xin’wana xa matsune a xi ri ni munghana wa xona wa nkati. A ku ri ni tindlopfu ta matsune ni ta nkati, tinghala ta matsune ni ta nkati. Kambe Adamu yena a a nga ri na nsati. Hiloko Yehovha a etlerisa Adamu vurhongo lebyikulu kutani a humesa rimbambu rakwe rin’we. Yehovha u tirhise rimbambu leri ku endlela Adamu nsati, hiloko a va nsati wa yena.

Mawaku ndlela leyi Adamu a a tsake ha yona! Naswona ehleketa ndlela leyi Evha a faneleke a tsake ha yona hi ku vekiwa entangeni wo saseka swonghasi leswaku a hanya kona! A va ta va ni vana kutani va hanya swin’we hi ntsako.

Yehovha a a lava leswaku Adamu na Evha va hanya hilaha ku nga heriki. A a lava leswaku va endla misava hinkwayo yi saseka ku fana ni ntanga wa Edeni. Mawaku ndlela leyi Adamu na Evha va faneleke va tsake ha yona loko va ehleketa hi ku endla sweswo! Xana a wu ta va u swi tsakerile ku hlanganyela eku endleni ka misava yi va ntanga wo saseka? Kambe ntsako wa Adamu na Evha a wu tshamanga nkarhi wo leha. A hi kumeni xivangelo xa kona.

Pisalema 83:18; Genesa 1:26-31; 2:7-25.



Swivutiso

  • Xana xifaniso lexi nga eka Dyondzo 3 xi hambane njhani ni xifaniso lexi nga eka Dyondzo 2?
  • I mani loyi a endleke wanuna wo sungula naswona a ku ri mani vito ra wanuna wa kona?
  • Hi wihi ntirho lowu Xikwembu xi nyikeke Adamu leswaku a wu endla?
  • Hikwalaho ka yini Xikwembu xi etlerise Adamu vurhongo lebyikulu?
  • Xana Adamu na Evha a va ta hanya nkarhi wo tanihi kwihi naswona hi wihi ntirho lowu Yehovha a a lava leswaku va wu endla?

Swivutiso swo engetela

  • Hlaya Pisalema 83:18.

    Vito ra Xikwembu i mani, naswona hi xihi xikhundlha xa xona xo hlawuleka emisaveni?

  • Hlaya Genesa 1:26-31.

    Hi xihi xivumbiwa xa nkoka lexi Xikwembu xi xi vumbeke hi siku ra vutsevu naswona xivumbiwa lexi a xi hambane njhani ni swiharhi?

    Hi swihi swakudya leswi Yehovha a swi nyikeke vanhu ni swiharhi?

  • Hlaya Genesa 2:7-25.

    Ntirho wa Adamu wo thya swiharhi mavito a wu katsa yini?

    Xana Genesa 2:24 yi hi pfuna njhani ku twisisa ndlela leyi Yehovha a byi langutaka ha yona vukati, ku hambana ka vatekani ni ku dlaya vukati?