Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 2: Ntanga Wo Saseka

Dyondzo 2: Ntanga Wo Saseka

Languta misava leyi! Vona ndlela leyi swilo hinkwaswo swi sasekeke ha yona! Languta byanyi ni mirhi, swiluva ni swiharhi hinkwaswo. Xana wa yi vona ndlopfu ni tinghala?

Swiharhi entangeni wa Edeni

Xana ntanga lowo saseka wu ve kona hi ndlela yihi? A hi voneni ndlela leyi Xikwembu xi hi lunghiseleleke misava ha yona.

Xo sungula, Xikwembu xi endle byanyi bya rihlaza leswaku byi funengeta misava. Naswona xi endle mixaka hinkwayo ya swimilana leswitsongo ni makhwati ni mirhi. Swimilana leswi swi pfunile eku sasekiseni ka misava. Kambe a swo sasekisa ntsena. Swo tala swa swona swi hi nyika ni swakudya leswo nandziha swinene.

Hi ku famba ka nkarhi Xikwembu xi endle tinhlampfi leswaku ti hlambela ematini ni swinyenyana leswaku swi haha empfhukeni. Xi endle timbyana ni swimanga ni tihanci; swiharhi leswikulu ni leswitsongo. Hi swihi swifuwo leswi kumekaka ekusuhi ni le ka n’wina? Xana a hi fanelanga hi tsaka hileswi Xikwembu xi hi endleleke swilo leswi hinkwaswo?

Eku heteleleni, Xikwembu xi endle ndhawu yin’wana ya le misaveni yi va yo hlawuleka swinene. Ndhawu leyi xi yi thye ntanga wa Edeni. A yi hetisekile ndhawu leyi. Hinkwaswo leswi a swi ri kwalaho a swi sasekile. Naswona Xikwembu a xi lava leswaku misava hinkwayo yi fana ni ntanga lowu wo saseka lowu xi wu endleke.

Kambe languta xifaniso xa ntanga lowu nakambe. Xana wa swi tiva leswaku Xikwembu xi vone ku kayivela yini? A hi voneni.

Genesa 1:11-25; 2:8, 9.



Swivutiso

  • Xana Xikwembu xi yi lunghiselele njhani misava leswaku yi va kaya ra hina?
  • Hlamusela swiharhi swo hambana-hambana leswi Xikwembu xi swi endleke. (Languta xifaniso.)
  • Ha yini ntanga wa Edeni a wu hlawulekile?
  • Xana Xikwembu a xi lava leswaku misava hinkwayo yi va yini?

Swivutiso swo engetela

  • Hlaya Genesa 1:11-25.

    Xana Xikwembu xi tumbuluxe yini hi siku ra vunharhu ro tumbuluxa?

    Ku humelele yini hi siku ra vumune ro tumbuluxa?

    I swiharhi swa njhani leswi Xikwembu xi swi endleke hi siku ra vuntlhanu ni ra vutsevu ro tumbuluxa?

  • Hlaya Genesa 2:8, 9.

    Hi yihi mirhi yimbirhi yo hlawuleka leyi Xikwembu xi yi vekeke entangeni naswona a yi fanekisela yini?