Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 10: Ndhambi Leyikulu

Dyondzo 10: Ndhambi Leyikulu

Ehandle ka ngalava, vanhu a va ya emahlweni ni vutomi bya vona hi ndlela ya ntolovelo. A va nga si tshemba leswaku Ndhambi yi ta ta. Swi nga ha endleka a va hleka ngopfu hi nkarhi wolowo. Kambe ku nga ri kungani, nkarhi wa mafenya a wu herile.

Vanhu lava chuheke swin’we ni swiharhi va rhendzeriwe hi mati ya ndhambi

Hi xitshuketa, mpfula yi sungule ku na. A yo chuluka kunene onge hiloko u chulula mati hi bakiti. Nowa a a tiyisile! Kambe vanhu a va nga ha ta swi kota ku nghena engalaveni. Yehovha a a pfale nyangwa swi tiya.

Ku nga ri kungani misava a yi funengetiwe hi mati. Mati a ma fana ni milambu leyikulu. A ma khukhula mirhi ni ku khunguluxa maribye lamakulu, pongo ra kona a ri pfala ni tindleve. Vanhu a va chuhile. Va khandziye tintshava. Tolo a nga ha vuyi, loko a va lo yingisa Nowa nyangwa ya ha pfulekile, a va ta va va ponile! Kambe sweswi, a swi nga ha ta koteka.

Mati ma ye emahlweni ma tlakuka. Mpfula yi ne masiku ya 40 ni vusiku bya 40. Ma tlakuke ma ringana ni tintshava, ku nga ri kungani hambi ku ri tintshava to leha swinene se a ti funengetiwe hi mati. Hilaha Xikwembu xi vuleke hakona, vanhu ni swiharhi hinkwaswo leswi a swi ri ehandle ka ngalava swi file. Kambe hinkwavo lava a va ri endzeni a va hlayisekile.

Nowa ni vana vakwe va endle ntirho lowunene hi ku aka ngalava. Mati ma yi tlakusile, yi va ehenhla ka mati. Kutani, siku rin’wana loko mpfula se yi xile, dyambu ri sungule ku tlhava. Leswi va swi voneke a swi chavisa! A ku ri ni mati hinkwako-nkwako. Nchumu lowu a wu vonaka a ku ri ngalava ntsena leyi a yi ri ehenhla ka mati.

Ngalava yi papamala ehenhla ka mati

Swihontlovila leswiya a swi nga ha ri kona. A swi nga ha ta vavisa vanhu. Hinkwaswo ka swona a swi file, swin’we ni vamana wa swona ni vanhu hinkwavo lavo homboloka. Kambe, ku endleke yini hi vatata wa swona?

Vatata wa swihontlovila leswiya a va nga ri vanhu va nyama ku fana na hina. A va ri tintsumi leti teke ti ta hanya ku fana ni vanhu emisaveni. Kutani loko Ndhambi yi fika, a ti fanga ni vanhu lavan’wana. Ti hluvule mimiri ya nyama kutani ti tlhelela etilweni ti ri tintsumi. Kambe a ta ha pfumeleriwanga ku va swirho swa ndyangu wa tintsumi ta Xikwembu. Kutani ti ve tintsumi ta Sathana. EBibeleni, ti vitaniwa madimona.

Kutani Xikwembu xi hungise moya, hiloko mati ya ndhambi ma sungula ku phya. Endzhaku ka tin’hweti ta ntlhanu, ngalava yi fike yi tshama ehenhla ka ntshava. Ku hundze masiku yo tala, naswona lava a va ri endzeni ka ngalava va hlometele ehandle kutani va vona tinhlohlorhi ta tintshava. Mati ma ye emahlweni ma phya.

Hiloko Nowa a humesa wukuwuku engalaveni. A ri huma swa xinkarhana kutani ri vuya, hikuva a ri nga yi kumi ndhawu leyinene yo phatsama eka yona. A ri hambeta ri endla tano, naswona nkarhi wun’wana ni wun’wana loko ri vuya, a ri fika ri tshama engalaveni.

Tuva

Nowa a a lava ku vona loko mati ma phyile emisaveni, hiloko a rhumela tuva. Kambe tuva na rona ri vuyile hikuva a ri yi kumanga ndhawu leyi ri nga tshamaka eka yona. Hiloko Nowa a ri rhumela ra vumbirhi, hiloko ri vuya ri tamele tluka ra mitlhwari hi nomu. Hiloko Nowa a swi vona leswaku mati ma hungutekile. Nowa u rhumele tuva ra vunharhu, hiloko ri ya kuma ndhawu leyi omeke leyi ri nga tshamaka eka yona.

Hiloko Xikwembu xi vulavula na Nowa. Xi te: ‘Huma engalaveni. Huma ni ndyangu wa wena hinkwawo ni swiharhi.’ Ku hele nkarhi lowu tlulaka lembe va ri endzeni ka ngalava. Mawaku ndlela leyi hinkwavo a va tsake ha yona ku tlhela va humela ehandle naswona va ha hanya!

Genesa 7:10-24; 8:1-17; 1 Petro 3:19, 20.



Swivutiso

  • Ha yini ku nga ri na munhu la swi koteke ku nghena engalaveni loko mpfula yi sungula ku na?
  • Xana Yehovha u nise mpfula ku ringana masiku ni vusiku byingani, naswona mati a ma ente ku fikela kwihi?
  • Ku humelele yini hi ngalava loko mati ma sungula ku funengeta misava?
  • Xana swihontlovila swi ponile eka Ndhambi, naswona ku humelele yini hi vatata wa swona?
  • Ku humelele yini hi ngalava endzhaku ka tin’hweti ta ntlhanu?
  • Ha yini Nowa a humese wukuwuku engalaveni?
  • Xana Nowa u swi tivise ku yini leswaku mati ma phyile emisaveni?
  • Xana Xikwembu xi te yini eka Nowa ni ndyangu wakwe endzhaku ka loko va hete nkarhi lowu tlulaka lembe va ri engalaveni?

Swivutiso swo engetela

  • Hlaya Genesa 7:10-24.

    I yini leswi lovisiweke emisaveni?

    Xana mati ya Ndhambi ma hete nkarhi wo tanihi kwihi leswaku ma phya?

  • Hlaya Genesa 8:1-17.

    Xana Genesa 8:17 yi swi kombisa njhani leswaku xikongomelo xo sungula xa Yehovha hi misava a xi cincanga?

  • Hlaya 1 Petro 3:19, 20.

    Loko tintsumi leti xandzukeke ti tlhelela etilweni, ti avanyisiwe njhani?

    Xana mhaka ya Nowa ni ndyangu wakwe yi wu tiyisa njhani ntshembo wa hina malunghana ni vuswikoti bya Yehovha byo ponisa vanhu vakwe?

DYONDZA SWO TALA

Nowa U Fambe Ni Xikwembu

Nowa u veke xikombiso lexinene hi ku va ni ripfumelo leri tiyeke emisaveni leyi a yi ri ni madzolonga loko Ndhambi yi nga si humelela. Kunene namuntlha hi dyondza swo tala eka leswi a swi endleke.

Hi Nga Dyondza Yini Eka Nowa?

Kopa kumbe printa ntlango lowu kutani u kuma leswaku u nga xi tekelela njhani xikombiso xa Nowa xa ku yingisa.

Nowa U ‘Fambe Ni Xikwembu Xa Ntiyiso’

Xana Nowa ni nsati wakwe va langutane ni swiphiqo swihi loko va ri karhi va kurisa vana va vona? Xana va ri kombise njhani ripfumelo loko va ri karhi va aka ngalava?