Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 1: Xikwembu Xi Sungula Ku Tumbuluxa Swilo

Dyondzo 1: Xikwembu Xi Sungula Ku Tumbuluxa Swilo

Swilo hinkwaswo leswinene leswi hi nga na swona swi huma eka Xikwembu. Xi endle dyambu leswaku ri hi voningela ninhlikanhi, ni n’weti ni tinyeleti leswaku swi hi voningela nivusiku. Naswona Xikwembu xi hi endlele misava leswaku hi ta tshama eka yona.

Kambe, Xikwembu a xi sungulanga hi ku endla dyambu, n’weti, tinyeleti ni misava. Xana wa swi tiva leswaku xi rhange xi endla yini? Xikwembu xi rhange hi ku endla vanhu lava fanaka na xona. A hi nge swi koti ku va vona vanhu lava, tanihi leswi hi nga swi kotiki ku vona Xikwembu. EBibeleni, vanhu lava va vuriwa tintsumi. Xikwembu xi endle tintsumi leswaku ti hanya na xona etilweni.

Ntsumi yo sungula leyi Xikwembu xi yi endleke a yi hlawulekile swinene. A ku ri N’wana wa Xikwembu wa mativula naswona a a tirha ni Tata wakwe. U pfune Xikwembu ku endla swilo leswin’wana hinkwaswo. U pfune Xikwembu ku endla dyambu, n’weti, tinyeleti swin’we ni misava ya hina.

Xana misava a yi ri njhani hi nkarhi wolowo? Eku sunguleni, a ku nga ta hanya munhu emisaveni. Misava hinkwayo a yi funengetiwe hi mati. Kambe Xikwembu a xi lava leswaku vanhu va tshama emisaveni. Hiloko xi sungula ku hi lunghiselela swilo. Xana xi endle yini?

Phela, xo sungula a ku laveka ku vonakala emisaveni. Hikwalaho Xikwembu xi endle leswaku dyambu ri voningela misava. Xi endle leswaku ku va ni vusiku ni nhlikanhi. Endzhaku ka sweswo Xikwembu xi endle leswaku misava yi va ehenhla ka mati ya lwandle.

Eku sunguleni, a ku nga ri na nchumu emisaveni. Misava a yi fana ni xifaniso lexi u xi vonaka laha. A ku nga ri na swiluva kumbe mirhi kumbe swiharhi. Ni tinhlampfi ta le lwandle a ti nga ri kona. Xikwembu a xa ha ri ni ntirho wo tala wo endla leswaku misava yi va ndhawu leyinene laha swiharhi ni vanhu a va ta hanya kona.

Yeremiya 10:12; Vakolosa 1:15-17; Genesa 1:1-10.

Misava leyi nga riki na nchumu


Swivutiso

  • Xana swilo hinkwaswo leswinene swi huma kwihi, naswona hi swihi swin’wana swa swona?
  • I yini lexi Xikwembu xi xi endleke ku sungula?
  • Hikwalaho ka yini ntsumi yo sungula a yi hlawulekile?
  • Hlamusela leswi misava a yi ri xiswona eku sunguleni. (Languta xifaniso.)
  • Xana Xikwembu xi yi lunghiselele njhani misava leswaku swiharhi ni vanhu va kota ku tshama eka yona?

Swivutiso swo engetela

  • Hlaya Yeremiya 10:12.

    Hi tihi timfanelo ta Xikwembu leti vonakaka eka ntumbuluko wa xona?

  • Hlaya Vakolosa 1:15-17.

    Yesu u ve ni xiphemu xihi eku tumbuluxeni, naswona leswi swi fanele swi endla leswaku hi n’wi languta njhani?

  • Hlaya Genesa 1:1-10.

    Hi wahi masungulo ya misava?

    Xana ku humelele yini eka siku ro sungula ro tumbuluxa?

    Hlamusela leswi humeleleke eka siku ra vumbirhi ro tumbuluxa.