Nghena endzeni

Hundzela eka leswi nga endzeni

Timbhoni Ta Yehovha

Hlawula ririmi Xitsonga

 DYONDZO 30

Rahava A Fihla Tinhlori

Rahava A Fihla Tinhlori

Loko tinhlori ta Vaisrayele ti ye emutini wa Yeriko, ti fike ti tshama endlwini ya wansati la vuriwaka Rahava. Hosi ya Yeriko yi swi twile kutani yi rhuma masocha endlwini ya Rahava. U fihle tinhlori leti timbirhi elwangwini ivi a byela masocha leswaku ma famba hi ndlela yin’wana. U byele tinhlori a ku: ‘Ndzi ta mi pfuna hikuva ndza swi tiva leswaku Yehovha u na n’wina naswona mi ta ri hlula tiko leri. Ndzi kombela mi ndzi tshembisa leswaku mi ta ponisa vandyangu wa mina.’

Tinhlori ti byele Rahava ti ku: ‘Ha ku tshembisa leswaku vanhu lava nga ta va va ri endlwini ya wena a va nge vaviseki.’ Ti tlhele ti ku: ‘Boha ntambhu yo tshwuka efasitereni ra wena kutani vandyangu wa wena va ta ponisiwa.’

Rahava u xikise tinhlori toleto hi ntambhu hi le fasitereni rakwe. Ti ye etintshaveni ivi ti tumbela masiku manharhu ti nga si tlhelela eka Yoxuwa. Kutani Vaisrayele va tsemakanye Nambu wa Yordani ivi va lunghekela ku teka tiko. Va rhange va hlula muti wa Yeriko. Yehovha  u va byele leswaku va rhendzeleka hi muti kan’we hi siku ku ringana masiku ya tsevu. Hi siku ra vunkombo, va rhendzeleke hi muti mikarhi ya nkombo. Kutani vaprista va chaye timhalamhala ta vona naswona masocha ma huwelele hi marito lamakulu hilaha ma nga kotaka hakona. Makhumbi ya muti ma wele ehansi! Kambe yindlu ya Rahava, leyi a yi ri hi le khumbini a yi wanga. Rahava ni vandyangu wakwe va ponile hileswi a tshembeke Yehovha.

“Hilaha ku fanaka, xana Rahava . . . a nga vuriwanga leswaku u lulamile hikwalaho ka mitirho yakwe ya ku amukela varhumiwa hi malwandla, ni ku va balekisa hi ndlela yin’wana?”—Yakobo 2:25