Nghena endzeni

Hundzela eka leswi nga endzeni

Timbhoni Ta Yehovha

Hlawula ririmi Xitsonga

 DYONDZO 83

Yesu A Phamela Mitshungu

Yesu A Phamela Mitshungu

Vaapostola a va huma eku chumayeleni, emahlweni ka Paseka ya lembe ra 32 C.E. A va karhele, kutani Yesu u fambe na vona eBetsayida, leswaku va ya wisa. Kambe loko xikepe xi fika kusuhi ni ribuwa, Yesu u kume vanhu va magidi va va yimerile. Hambileswi Yesu a a lava ku va ni vaapostola vakwe ntsena, u va amukele hi malwandla vanhu volavo. U horise lava vabyaka kutani a sungula ku va dyondzisa. Yesu u va dyondzise hi Mfumo wa Xikwembu siku hinkwaro. Loko dyambu ri pela, vaapostola vakwe va te eka yena va ku: ‘Vanhu lava va fanele va twa ndlala. Va byele va ya kuma swakudya.’

Yesu u te: ‘Va nga fambi. Va nyikeni swakudya.’ Vaapostola va vutise Yesu va ku: ‘U lava leswaku hi ya va xavela xinkwa?’ Filipi, un’wana wa vaapostola u te: ‘Hambiloko a hi ri ni mali yo tala, a hi nga ta swi kota ku xavela ntshungu lowu xinkwa.’

Yesu u te: ‘Hi ni swakudya swo tanihi kwihi?’ Andriya u te: ‘Hi ni swinkwa swa ntlhanu ni tinhlampfi timbirhi letitsongo. A swi nge va ringani.’ Yesu u te: ‘Tisani swinkwa ni tinhlampfi teto.’ U byele vanhu leswaku va tshama ebyanyini hi mintlawa ya 50 ni ya 100. Yesu u teke swinkwa ni tinhlampfi teto kutani a languta etilweni a khongela. Hiloko a nyika vaapostola swakudya leswaku va swi phamela vanhu. Vavanuna va 5 000 ni vavasati ni vana, va dyile va xurha. Endzhaku, vaapostola va hlengelete leswi a swi sele. Swi tate swirhundzu  swa 12! Hakunene leri a ku ri singita ro hlamarisa, a swi tano ke?

Vanhu a va tsake ngopfu lerova va lava ku veka Yesu a va hosi ya vona. Kambe Yesu a a swi tiva leswaku a wu nga si fika nkarhi wa Yehovha wa leswaku a va hosi. Kutani u byele mitshungu leswaku yi hangalaka a tlhela a byela vaapostola vakwe leswaku va ya etlhelo lerin’wana ra Lwandle ra Galeliya. Va fambe hi xikepe kutani Yesu a ya entshaveni a ri yexe. Ha yini? Hikuva a a lava nkarhi wo khongela eka Tata wakwe. Hambileswi Yesu a a tshama a khomekile, mikarhi hinkwayo a tinyika nkarhi wo khongela.

“Mi nga tirheli swakudya leswi helaka, kambe tirhelani swakudya leswi nga heriki, leswi nyikaka vutomi lebyi nga heriki, leswi N’wana wa munhu a nga ta mi nyika swona.”—Yohane 6:27