Endzhaku ka loko Yesu a hlawule vaapostola va 12, u ye eka ntshungu lowukulu lowu a wu hlengeletanile ehansi ka ntshava. Ntshungu lowu a wu huma eGaleliya, Yudiya, Tiri, Sidoni, Siriya ni le tindhawini tin’wana ta le Yordani. Wu tise vanhu lava a va vabya ni lava a va ri ni madimona. Yesu u va horisile hinkwavo. Hiloko a tshama hi le tlhelo lerin’wana ra ntshava a sungula ku vulavula. U hlamusele leswi hi faneleke hi swi endla loko hi lava ku va vanghana va Xikwembu. Hi fanele hi swi xiya leswaku hi lava mpfuno wa Yehovha naswona hi fanele hi dyondza ku n’wi rhandza. Kambe a hi nge swi koti ku rhandza Xikwembu loko hi nga va rhandzi vanhu van’wana. Hi fanele hi va ni musa hi tlhela hi khoma vanhu van’wana kahle hambiloko va ri valala va hina.

Yesu u te: ‘A swi ringananga ku rhandza vanghana va wena ntsena. U fanele u rhandza ni valala va wena u tlhela u rivalela vanhu swi huma embilwini. Loko u khunguvanyise munhu un’wana, yana eka  yena u ya kombela ku rivaleriwa hi xihatla. Khoma van’wana hi ndlela leyi u lavaka va ku khoma ha yona.’

Yesu u tlhele a nyika vanhu xitsundzuxo lexinene hi rifuwo. U te: ‘I swa nkoka ngopfu ku va munghana wa Yehovha ku tlula ku va ni mali yo tala. Khamba ri nga yiva mali ya wena, kambe a nga kona la nga endlaka leswaku u nga ha vi munghana wa Yehovha. Tshika ku vilela hi leswi u nga ta swi dya, ku swi nwa kumbe ku swi ambala. Languta tinyenyana. Mikarhi hinkwayo Xikwembu xi ti nyika swakudya leswi eneleke. Ku vilela a ku nge ku lehiseli vutomi. Tsundzuka, Yehovha wa swi tiva leswi u swi lavaka.’

Ntshungu a wu nga si tshama wu twa munhu a vulavula ku fana na Yesu. Varhangeri va vona va vukhongeri a va nga si tshama va va dyondzisa tidyondzo leti. Ha yini Yesu a a ri mudyondzisi lonene? Hikuva swilo hinkwaswo leswi a a swi dyondzisa a swi huma eka Yehovha.

“Rhwalani joko ra mina mi tlhela mi ndzi tekelela, hikuva ndzi ni musa naswona ndza titsongahata, leswaku mi ta phyuphyisiwa.”—Matewu 11:29