Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Mimoya Ya Vafi—Xana Yi Nga Ku Pfuna Kumbe Yi Nga Ku Vavisa? Xana Yi Kona Hakunene?

Xana Mimoya Yo Biha Leyi Nga Kona Laha Misaveni I Ya Vanhu Lava Feke?

Xana Mimoya Yo Biha Leyi Nga Kona Laha Misaveni I Ya Vanhu Lava Feke?

Mimoya yi kona! Eka xivandla lexi nga vonakiki xa mimoya, ku ni mimoya leyinene ni mimoya leyo biha. Xana i mimoya ya vanhu lava feke?

E-e, a hi ya vona. Loko munhu a fa, a nga hundzeli exivandleni xa mimoya, hi laha vanhu vo tala va ehleketaka ha kona. Xana leswi hi swi tivisa ku yini? Hikwalaho ka leswi Bibele yi swi vulaka. Bibele i buku ya ntiyiso leyi humaka eka Xikwembu xi ri xin’we xa ntiyiso, lexi vito ra xona xi nga Yehovha. Yehovha u vumbe vanhu; u swi tiva kahle leswi humelelaka eka vona loko va fa.​—⁠Pisalema 83:​18; 2 Timotiya 3:⁠16.

Adamu u humesiwe entshurini naswona u tlhelele eka wona

Bibele yi vula leswaku Xikwembu xi vumbe Adamu, munhu wo sungula, “hi ntshuri wa misava.” (Genesa 2:⁠7) Xikwembu xi n’wi veke eParadeyisini, ntanga wa Edeni. Loko Adamu a a wu yingisile nawu wa Yehovha, a a ta va a nga fanga; namuntlha a a ta va a ha hanya. Kambe loko Adamu a tlule nawu wa Xikwembu hi vomu, Xikwembu xi te eka yena: “U [ta] tlhelela misaveni, hikuva u humesiwile ka yona. Hikuva u ntshuri, u ta tlhelela entshurini.”​—⁠Genesa 3:⁠19.

Xana leswi swi vula yini? Kahle-kahle, Adamu a a ri kwihi loko Yehovha a nga si n’wi vumba hi ntshuri? A a nga ri helo. A a nga ri etilweni. A a nga ri kona. Kutani loko Yehovha a vule leswaku Adamu a a ta “tlhelela emisaveni,” a a vula leswaku Adamu a a ta fa. A nga hundzelanga exivandleni xa moya. Loko a fa, Adamu nakambe u ve loyi a nga hanyiki, a  nga ha vi kona. Rifu i rito fularha ra vutomi.

Kambe ku vuriwa yini hi van’wana lava feke? Xana na vona a va hanyi? Bibele ya hlamula:

  • “Hinkwaswo [vanhu ni swiharhi] swi ya exivandleni xin’we. Hinkwaswo swi huma ntshurini, kutani hinkwaswo swi tlhelela ntshurini.”​—⁠Eklesiasta 3:⁠20.

  • “Vafi a va tivi nchumu.”​—⁠Eklesiasta 9:⁠5.

  • “Rirhandzu ra vona, ni ku venga ka vona, ni mona wa vona swi [herile].”​—⁠Eklesiasta 9:⁠6.

  • “[E]xivandleni xa vafi [esirheni] laha u yaka kona, a ka ha ri na ntirho, hambi makungu, ni ku tiva, hambi vutlhari.”​—⁠Eklesiasta 9:⁠10.

  • “[Munhu u] tlhelela entshurini [wa yena]; kutani hi siku rolero makungu ya [yena] ma . . . hela.”​—⁠Pisalema 146:⁠4.

I vanhu lava hanyaka ntsena lava nga kotaka ku endla swilo leswi

Xana swa ku tikela ku tshemba matsalwa lawa? Loko swi ri tano, anakanya hi leswi:  Emindyangwini yo tala, wanuna u hola mali leswaku a wundla ndyangu wa yena. Loko wanuna loyi a lova, hakanyingi ndyangu wa yena wu sala wu xaniseka. Mikarhi yin’wana nsati wa yena ni vana va pfumala hambi ku ri mali yo xava swakudya. Kumbexana valala va wanuna loyi va sala va karhata ndyangu wakwe. Sweswi tivutise: ‘Loko wanuna yoloye a hanya exivandleni xa mimoya, hikwalaho ka yini a nga hambeti a wundla ndyangu wa yena? Ha yini a nga sirheleri ndyangu wa yena eka vanhu lavo biha?’ Hikwalaho ka leswi matsalwa ma vulaka ntiyiso. Wanuna yoloye u file, a nga koti ku endla nchumu.​—⁠Pisalema 115:⁠17.

Vafi a va nge swi koti ku pfuna lava nga riki na swakudya kumbe ku sirhelela lava va xanisiwaka

Xana leswi swi vula leswaku vafi a va nge he tlheli va hanya? E-⁠e, a swi vuli swona. Endzhaku hi ta dyondza hi ku pfuxiwa ka vafi. Kambe swi vula leswaku vanhu lava feke a va swi tivi leswi u swi endlaka. A va nge swi koti ku ku vona, ku ku twa, kumbe ku ku vulavurisa. U nga va chavi. A va nge swi koti ku ku pfuna, naswona a va nge ku vavisi.​—⁠Eklesiasta 9:⁠4; Esaya 26:⁠14.