Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yoxuwa 9:1-27

9  Kuteloko tihosi+ hinkwato leti a ti ri etlhelo ka Yordani endhawini ya tintshava ni le Xefela ni le vugima-lwandle bya Lwandle+ Lerikulu ni le mahlweni ka Lebanoni,+ Vaheti+ ni Vaamori, Vakanana,+ Vaperezi,+ Vahivhi ni Vayebusi,+ ti twa hi mhaka leyi,  ti hlengeletana hinkwato leswaku ti lwa na Yoxuwa na Israyele hi vun’we.+  Kutani vaaki va Gibiyoni+ va twa leswi Yoxuwa a swi endleke eYeriko+ ni le Ayi.+  Hiloko vona, hi ku rhandza ka vona, va endla hi vutlhari,+ va famba va rhwala timbuva, va tekela timbhongolo ta vona masaka yo hlakala, magula ya dzovo ya vhinyo lama hlakaleke, lama boxekeke, va ma tsimbelela,+  va ambala maphaxani yo hlakala ni lama rhungeleriweke, ni tinguvu leti hlakaleke, xinkwa hinkwaxo lexi nga timbuva ta vona a xi omile, xi hlanhleka.  Hiloko va ya eka Yoxuwa enxaxeni le Giligala,+ va ku eka yena ni le ka vanhu va Israyele: “Hi huma etikweni ra le kule. Endlani ntwanano+ na hina sweswi.”  Kutani vanhu va Israyele va ku eka Vahivhi:+ “Kumbexana mi tshama ekusuhi na hina. Xana hi nga wu endla njhani ntwanano na n’wina?”+  Hiloko va ku eka Yoxuwa: “Hi malandza ya n’wina.”+ Kutani Yoxuwa a ku eka vona: “N’wina mi va mani, naswona mi huma kwihi?”  Hiloko va ku eka yena: “Malandza ya wena ma huma etikweni+ ra le kule ngopfu hikwalaho ka vito+ ra Yehovha Xikwembu xa wena, hikuva hi yi twile ndhuma yakwe ni hinkwaswo leswi a swi endleke aEgipta,+ 10  ni hinkwaswo leswi a swi endleke eka tihosi timbirhi ta Vaamori leti a ti ri entsungeni wa Yordani, ku nga Sihoni+ hosi ya Hexiboni na Ogo+ hosi ya Baxani, leyi a yi ri eAxitaroti.+ 11  Hikwalaho vakulukumba va hina ni vaaki hinkwavo va tiko ra hina va hi byerile va ku,+ ‘Tekani timbuva mi ya hlangana na vona, mi ku eka vona: “Hi malandza ya n’wina.+ Endlani ntwanano na hina sweswi.”’+ 12  Xinkwa lexi xa hina, a xi hisa loko hi xi teka etindlwini ta hina leswaku xi va timbuva ta hina, hi huma hi ta eka n’wina, sweswi maswivo, xi omile naswona xa hlanhleka.+ 13  Lawa i magula ya vhinyo ya dzovo lawa hi ma tateke ma ri mantshwa, kambe waswivo, ma boxekile,+ ni tinguvu leti ni maphaxani ya hina, swi hlakarile hikwalaho ka riendzo ro leha swinene.” 14  Hiloko vanhu va teka timbuva ta vona tin’wana, a va vutisanga enon’wini wa Yehovha.+ 15  Kutani Yoxuwa a endla ku rhula na vona,+ a endla ni ntwanano na vona leswaku va hanya, ni tindhuna+ ta ntshungu ti va hlambanyela.+ 16  Kutani loko ku hele masiku manharhu, endzhaku ka loko va endle ntwanano na vona, hiloko va twa leswaku a va ri ekusuhi na vona naswona a va tshama endhawini leyi nga ekusuhi na vona. 17  Hiloko vana va Israyele va suka va ta emitini ya vona hi siku ra vunharhu, miti ya vona a ku ri Gibiyoni,+ Kefira,+ Beroti+ na Kiriyati-yeyarimi.+ 18  Vana va Israyele a va va hlaselanga, hikuva tindhuna ta ntshungu ti va hlambanyele+ hi Yehovha Xikwembu xa Israyele.+ Kutani ntshungu hinkwawo wu sungula ku gungulela tindhuna.+ 19  Hiloko tindhuna hinkwato ti byela ntshungu ti ku: “Loko ku ri hina, hi va hlambanyele hi Yehovha Xikwembu xa Israyele, hikwalaho, sweswi a hi pfumeleriwanga ku va vavisa.+ 20  Hi ta va tshika va hanya, kambe hi ta va endla leswi landzelaka, leswaku hi nga weriwi hi ku hlundzuka hikwalaho ka xihlambanyo lexi hi xi hlambanyeke eka vona.”+ 21  Hiloko tindhuna ti ku eka vona: “Va tshikeni va hanya, va va varhoteri va tihunyi ni vaki va mati va ntshungu hinkwawo,+ hilaha tindhuna ti va tshembiseke hakona.”+ 22  Kutani Yoxuwa a va vitana, a ku eka vona: “Ha yini mi hi kanganyisile, mi ku, ‘Hi le kule ngopfu na n’wina,’+ kasi mi tshama exikarhi ka hina?+ 23  Sweswi mi vanhu lava rhukaniweke,+ xiyimo xa hlonga,+ ku rhotela tihunyi ni ku ka mati ya yindlu ya Xikwembu xa mina a swi nge susiwi eka n’wina.”+ 24  Hiloko va hlamula Yoxuwa va ku: “Hileswi malandza ya wena ma byeriweke hi ku kongoma leswaku Yehovha Xikwembu xa n’wina u lerise Muxe nandza wakwe ku mi nyika tiko hinkwaro ni ku lovisa vaaki hinkwavo va tiko emahlweni ka n’wina,+ hi yi chavele swinene mimoya-xiviri ya hina hikwalaho ka n’wina.+ Hiloko hi endla nchumu lowu.+ 25  Kutani waswivo, hi hina lava evokweni ra wena. Endla eka hina leswi swi nga swinene ni leswi swi lulameke ematihlweni ya wena.”+ 26  Hiloko a endla tano eka vona ni ku va kutsula evokweni ra vana va Israyele, a va va dlayanga.+ 27  Hikwalaho esikwini rero Yoxuwa a va veka+ va va varhoteri va tihunyi ni vaki va mati va ntshungu+ ni ya alitari ya Yehovha ku fikela esikwini leri, endhawini leyi a yi hlawulaka.+

Tinhlamuselo ta le hansi