Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yoxuwa 7:1-26

7  Kutani vana va Israyele va endla xiendlo xa ku pfumala ku tshembeka malunghana ni xilo lexi nyikeriweke endzovisweni hi ku va Akani+ n’wana wa Karimi, n’wana wa Zabidi, n’wana wa Zara, wa nyimba ya Yuda, a teke xilo lexi nyikeriweke endzovisweni.+ Hiloko ku hlundzuka ka Yehovha ku va kukulu swinene eka vana va Israyele.+  Kutani Yoxuwa a rhuma vavanuna va suka eYeriko va ya eAyi,+ lowu nga ekusuhi na Beta-avheni,+ evuxeni bya Bethele,+ a ku eka vona: “Tlhandlukani mi ya kambela tiko.” Kutani vavanuna va tlhandluka va ya kambela Ayi.+  Endzhaku ka sweswo va vuyela eka Yoxuwa, va ku eka yena: “Ku nga tlhandluki vanhu hinkwavo. A ku tlhandluke vavanuna va 2 000 kumbe va 3 000 va ya hlasela Ayi. U nga karhati vanhu hinkwavo leswaku va ya kona, hikuva a va talanga.”  Hiloko ku tlhandluka vavanuna va kwalomu ka 3 000, kambe va baleka emahlweni ka vavanuna va Ayi.+  Vavanuna va Ayi va dlaya vavanuna va kwalomu ka 36, kutani va va tsutsumisa+ ku sukela enyangweni ku ya fika eXebarimi, va ya emahlweni va va dlayetela endhawini leyi rhelelaka. Hiloko timbilu ta vanhu ti sungula ku n’oka ti fana ni mati.+  Kutani Yoxuwa a handzula minkhancu yakwe, a wa, xikandza+ xakwe xi langute emisaveni emahlweni ka areka ya Yehovha ku fikela nimadyambu, yena ni vakulukumba va Israyele, va hambeta va tichela ritshuri etinhlokweni.+  Hiloko Yoxuwa a ya emahlweni a ku: “Oho, Yehovha, Hosi leyi Lawulaka, ha yini u perise vanhu lava Yordani, leswaku u hi nyiketa evokweni ra Vaamori leswaku va hi lovisa? Onge loko a hi lo tiendlela xiboho xa ku tshama entsungeni wa Yordani!+  Ndzi khomele, Wena Yehovha, kambe ndzi nga ku yini loko Israyele a fularhele valala vakwe?  Kutani Vakanana ni vaaki hinkwavo va tiko va ta swi twa, va hi rhendzela ivi va susa vito ra hina emisaveni;+ xana u ta ri endlela yini vito ra wena lerikulu?”+ 10  Hiloko Yehovha a ku eka Yoxuwa: “Suka u yima! Ha yini u wa hi xikandza? 11  Israyele u dyohile, naswona vanhu va tlule ntwanano+ wa mina lowu ndzi va leriseke wona; va teke ni swilo swin’wana leswi nyikeriweke endzovisweni+ naswona va swi yivile,+ va swi fihla+ naswona va swi veke exikarhi ka swilo swa vona.+ 12  Vana va Israyele a va nge swi koti ku yima emahlweni ka valala va vona.+ Va ta fularhela valala va vona, hikuva va ve xilo lexi nyikeriweke endzovisweni. A ndzi nge he tlheli ndzi va na n’wina, handle ka loko mo lovisa xilo lexi nyikeriweke endzovisweni exikarhi ka n’wina.+ 13  Suka u yima! Hlawulekisa vanhu,+ naswona u fanele u ku, ‘Tihlawulekiseni mundzuku, hikuva Yehovha Xikwembu xa Israyele u te: “Xilo lexi nyikeriweke endzovisweni xi le xikarhi ka n’wina, Wena Israyele.+ A wu nge swi koti ku hlula valala va wena ku fikela loko u suse xilo lexi nyikeriweke endzovisweni exikarhi ka n’wina. 14  Mi fanele mi tinyikela nimixo, nyimba hi nyimba, kutani nyimba leyi Yehovha a nga ta yi hlawula+ yi ta tshinela, ndyangu hi ndyangu, naswona ndyangu lowu Yehovha a nga ta wu hlawula wu ta tshinela, muti hi muti, muti lowu Yehovha a nga ta wu hlawula wu ta tshinela, munhu la tiyeke emirini hi munhu la tiyeke emirini. 15  Kutani loyi a nga ta kumeka a ri ni xilo lexi nyikeriweke endzovisweni u ta hisiwa hi ndzilo,+ yena ni hinkwaswo leswi nga swa yena, hikuva u tlule ntwanano+ wa Yehovha, nileswi a endleke vuphukuphuku lebyi nyumisaka eIsrayele.”’”+ 16  Hiloko Yoxuwa a pfuka nimpundzu swinene ivi a vitana Israyele a tshinela, nyimba hi nyimba ya yena, kutani ku hlawuriwa nyimba ya Yuda. 17  Hiloko a tshineta mindyangu ya Yuda kutani a hlawula ndyangu wa Vazara,+ ivi a tshineta ndyangu wa Vazara, munhu la tiyeke emirini ni munhu la tiyeke emirini, kutani ku hlawuriwa Zabidi. 18  Eku heteleleni a tshineta muti wakwe, munhu la tiyeke emirini ni munhu la tiyeke emirini, kutani Akani n’wana wa Karimi, n’wana wa Zabidi, n’wana wa Zara, wa nyimba ya Yuda, a hlawuriwa.+ 19  Yoxuwa a ku eka Akani: “N’wananga, ndzi kombela u vangamisa Yehovha Xikwembu xa Israyele+ u tiphofula eka yena,+ ndzi kombela u ndzi byela,+ Xana u endle yini? U nga ndzi fihleli.”+ 20  Hiloko Akani a hlamula Yoxuwa a ku: “Entiyisweni mina—ndzi dyohele Yehovha Xikwembu xa Israyele,+ ndzi endle hi ndlela leyi ni ndlela liya. 21  Exikarhi ka leswi phangiweke ndzi vone+ nguvu ya ximfumo ya le Xinara,+ yo saseka, ni tixikele ta silivhere ta 200 ni xiphepherele xin’we xa nsuku, xi ri ni ntikelo wa tixikele ta 50, ndzi swi naverile,+ kutani ndzi swi teka;+ waswivo, ndzi swi fihle emisaveni exikarhi ka ntsonga wa mina ni mali ehansi ka yona.”+ 22  Xikan’we-kan’we Yoxuwa a rhumela varhumiwa, va tsutsuma va ya entsongeni, kutani waswivo, a yi fihliwe entsongeni wakwe ni mali ehansi ka yona. 23  Hiloko va swi teka exikarhi ka ntsonga va swi tisa eka Yoxuwa ni le ka vana hinkwavo va Israyele, kutani va swi chulula emahlweni ka Yehovha. 24  Yoxuwa ni tiko hinkwaro ra Israyele a ri ri na yena, hiloko va teka Akani+ n’wana wa Zara ni silivhere ni nguvu ya ximfumo ni xiphepherele xa nsuku+ ni vana vakwe va majaha ni va vanhwanyana ni nkunzi yakwe ni mbhongolo yakwe ni ntlhambi wakwe ni ntsonga wakwe ni hinkwaswo leswi a swi ri swa yena va swi tisa erivaleni ra le hansi ra Akora.+ 25  Kutani Yoxuwa a ku: “Ha yini u hi tisele khombo?+ Yehovha u ta ku tisela khombo esikwini leri.” Xikan’we-kan’we tiko hinkwaro ra Israyele ri n’wi khandla hi maribye,+ endzhaku ka sweswo va va hisa hi ndzilo.+ Hi ndlela yoleyo va va khandla hi maribye. 26  Hiloko va hlengeleta nhulu leyikulu ya maribye ehenhla kakwe, ku ta fika esikwini leri.+ Kutani Yehovha a vohla eku hlundzukeni kakwe lokukulu.+ Hi yona mhaka leyi vito ra ndhawu yoleyo ri vitaniwaka Rivala ra le Hansi ra Akora+ ku ta fika esikwini leri.

Tinhlamuselo ta le hansi