Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yoxuwa 18:1-28

18  Kutani ntshungu hinkwawo wa vana va Israyele a wu hlengeletane eXilo,+ hiloko wu dzima ntsonga wa nhlangano kwalaho,+ tanihi leswi tiko a ri akiwile emahlweni ka wona.+  Kambe a ka ha sele lava ndzhaka ya vona a yi nga si aviwa exikarhi ka vana va Israyele, ku nga tinyimba ta nkombo.  Hiloko Yoxuwa a ku eka vana va Israyele: “Xana mi ta hlwela ku fikela rini ku ya nghena mi teka tiko+ leri Yehovha Xikwembu xa vatata wa n’wina a mi nyikeke rona?+  Tihlawuleleni vavanuna vanharhu eka nyimba yin’wana ni yin’wana, mi va tisa ndzi va rhuma, leswaku va ya rhendzeleka etikweni kutani va ri pima hi ku ya hi ndzhaka ya vona, ivi va ta eka mina.+  Va fanele va avelana rona hi swiphemu swa nkombo.+ Yuda u ta yima endhawini yakwe edzongeni,+ naswona yindlu ya Yosefa yi ta yima endhawini ya yona en’walungwini.+  Loko ku ri n’wina, mi ta pima tiko hi swiphemu swa nkombo, mi fanele mi swi tisa eka mina, kutani ndzi ta mi hoxela vuhlolotwana+ emahlweni ka Yehovha Xikwembu xa hina.  Valevhi a va na xiavelo exikarhi ka n’wina,+ hikuva vuprista bya Yehovha i ndzhaka ya vona;+ na Gadi na Ruveni+ ni hafu ya nyimba ya Manase+ yi teke ndzhaka ya vona ekusuhi ni Yordani etlhelo ra le vuxeni, leyi Muxe nandza wa Yehovha a va nyikeke yona.”+  Hiloko vavanuna va suka leswaku va famba, kutani Yoxuwa a lerisa+ lava a va ya pima tiko, a ku: “Fambani mi ya rhendzeleka etikweni, mi ri pima, ivi mi vuya eka mina, kutani ndzi ta mi bela vuhlolotwana+ emahlweni ka Yehovha eXilo.”+  Hiloko vavanuna lava va famba va tsemakanya tiko va ri pima+ ri va miti hi swiphemu swa nkombo, ebukwini. Endzhaku ka sweswo va ta eka Yoxuwa enxaxeni lowu nga eXilo, 10  kutani Yoxuwa a va hoxela vuhlolotwana eXilo emahlweni ka Yehovha.+ Hiloko Yoxuwa a ava tiko, a avela vana va Israyele hi swiphemu swa vona.+ 11  Kutani nyimba ya vana va Benjamini+ yi kuma xiavelo hi mindyangu ya vona hi vuhlolotwana, ni ndhawu ya vuhlolotwana+ bya vona yi huma exikarhi ka vana va Yuda+ ni vana va Yosefa.+ 12  Ndzilakana wa vona a wu ri eyinhleni ya le n’walungwini ku suka eYordani, naswona ndzilakana wu tlhandlukela erigiyagiyeni ra le Yeriko+ en’walungwini ni ku tlhandlukela entshaveni hi tlhelo ra le vupela-dyambu, wu helela emananga ya Beta-avheni.+ 13  Kutani ndzilakana wu hundza kwalaho ku ya eLuzi, erigiyagiyeni ra le dzongeni wa Luzi,+ hileswaku, eBethele;+ ndzilakana wu rhelela wu ya eAtaroti-ada,+ ehenhla ka ntshava leyi nga edzongeni wa le Hansi eBeta-horoni.+ 14  Ndzilakana a wu funghiwile naswona wu famba wu rhendzela etlhelo ra vupela-dyambu ku ya edzongeni ku suka entshaveni leyi langutaneke na Beta-horoni edzongeni; a wu helela eKiriyati-bali, hileswaku, eKiriyati-yeyarimi,+ muti wa vana va Yuda. Laha hi le tlhelo ra vupela-dyambu. 15  Tlhelo ra le dzongeni a ri sukela emakumu ka Kiriyati-yeyarimi, ndzilakana wu fambela hala tlhelo ra vupela-dyambu wu humela exihlobyeni xa mati ya Nefitowa.+ 16  Kutani ndzilakana wu ya emakumu ka ntshava leyi langutaneke na Hinomu,+ leyi nga erivaleni ra le hansi ra Refayimi+ ku ya en’walungwini, naswona wu rhelelela eHinomu, erigiyagiyeni ra Vayebusi+ edzongeni, wu ya aEni-rogele.+ 17  Ku tlhele ku funghiwa etlhelo ra le n’walungwini ku ya aEni-xemexi, ku hundzela eGeliloto, leyi nga ehenhla emahlweni ka ntlhandluko wa Adumimi;+ wu rhelela eribyeni+ ra Bohani+ n’wana wa Ruveni. 18  Wu hundzela erigiyagiyeni ra le n’walungwini emahlweni ka Arabha, wu rhelela ku ya eArabha. 19  Ndzilakana wu hundzela erigiyagiyeni ra le n’walungwini wa Beta-hogila,+ naswona (ndzilakana) a wu helela ensongeni wa le n’walungwini eLwandle ra Munyu+ etlhelo ra le dzongeni wa Yordani. Lowu a ku ri ndzilakana wa le dzongeni. 20  Yordani wu va ndzilakana wa kona hi hala tlhelo ra le vuxeni. Leyi a ku ri ndzhaka ya vana va Benjamini hi mindyangu ya vona, hi mindzilakana ya kona matlhelo hinkwawo. 21  Miti ya tinyimba ta vana va Benjamini hi mindyangu ya vona a ku ri Yeriko+ na Beta-hogila na Emeki-kesisi, 22  na Beta-araba+ na Semarayima na Bethele,+ 23  na Avhimi na Para na Ofira,+ 24  na Kefari-amoni na Ofni na Geba;+ miti ya 12 ni swimitana swa yona. 25  Gibiyoni+ na Rhama na Beroti, 26  na Mizpe+ na Kefira+ na Moza, 27  na Rekemu na Iripele na Tarala, 28  na Zhela,+ Ha-elefe na Yebusi, hileswaku, Yerusalema,+ Gibiya+ na Kiriyati; miti ya 14 ni swimitana swa yona. Leyi a ku ri ndzhaka ya vana va Benjamini hi mindyangu ya vona.+

Tinhlamuselo ta le hansi