Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yonasi 1:1-17

1  Kutani rito ra Yehovha ri fika eka Yonasi+ n’wana wa Amitayi, ri ku:  “Suka u yima, u ya emutini lowukulu wa Ninivha,+ u huwelela, u wu byela leswaku vubihi bya wona byi fikile emahlweni ka mina.”+  Yonasi a pfuka, a baleka emahlweni ka Yehovha+ a ya eTaraxixi;+ eku heteleleni a rhelela a ya eYopa+ kutani a kuma xikepe lexi xi yaka eTaraxixi. Hiloko a hakela ntsengo wa kona, a nghena eka xona, leswaku a ya na vona eTaraxixi a suka emahlweni ka Yehovha.  Kutani Yehovha a rhumela mheho leyikulu elwandle,+ ku va ni xidzedze lexikulu elwandle;+ loko ku ri xikepe, a xi ri kusuhi ni ku tshoveka.  Vatluti va sungula ku chava hiloko va kombela mpfuno, un’wana ni un’wana eka xikwembu xakwe.+ Kutani swilo leswi a swi ri exikepeni va swi lahlela elwandle, leswaku swi nga xi tikeli.+ Kambe Yonasi a a rhelele a ya eswiphen’wini swa le ndzeni-ndzeni ka xikepe, hiloko a etlela, a khomiwa hi vurhongo lebyikulu.+  Endzhaku ka nkarhi mulawuri wa xikepe a n’wi tshinelela, a ku eka yena: “Swo yini, muetleri ndzi wena? Pfuka, u huwelela xikwembu xa wena!+ Kumbexana Xikwembu xa ntiyiso xi ta khatala ha hina, kutani a hi nge fi.”+  Va byelana va ku: “Tanani, a hi hoxeni vuhlolotwana,+ hi ta tiva loyi a hi vangelaka khombo leri.”+ Hiloko va ya emahlweni va hoxa vuhlolotwana, eku heteleleni vuhlolotwana byi komba Yonasi.+  Kutani va ku eka yena: “Hi kombela u hi byela, xana i mani loyi a hi vangelaka khombo leri?+ Ntirho wa wena hi wihi, naswona u huma kwihi? Hi rihi tiko ra rikwenu, ni varikwenu hi vahi?”  Kutani a va byela a ku: “Ndzi Muheveru,+ naswona ndzi chava+ Yehovha Xikwembu xa le matilweni,+ Loyi a endleke lwandle ni misava leyi omeke.”+ 10  Vanhu va sungula ku chava ngopfu, va ku eka yena: “I yini leswi u swi endleke?”+ Vavanuna lava va swi tivile leswaku a a baleka emahlweni ka Yehovha, hikuva u va byerile. 11  Eku heteleleni va ku eka yena: “Xana hi fanele hi ku endla yini,+ leswaku lwandle ri miyela?” Hikuva lwandle a ri ya ri kariha ngopfu. 12  Kutani a ku eka vona: “Ndzi tlakuleni mi ndzi lahlela elwandle, lwandle ri ta miyela; hikuva ndza swi lemuka leswaku hi mina loyi a vangaka leswaku xidzedze lexi lexikulu xi va ehenhla ka n’wina.”+ 13  Vavanuna lava va ringeta ku huma leswaku va tlherisela xikepe eribuweni; kambe va tsandzeka, hikuva lwandle a ri ya emahlweni ri va karihela ngopfu swinene.+ 14  Va ya emahlweni va huwelela eka Yehovha va ku:+ “Oho Yehovha, hi nga tshuki hi lova hikwalaho ka moya-xiviri wa munhu loyi! Naswona u nga veki ngati leyi nga riki na nandzu eka hina,+ tanihi leswi wena, Wena Yehovha, u endleke hi ku ya hi leswi u swi tsakeleke!”+ 15  Hiloko va tlakula Yonasi va n’wi lahlela elwandle; lwandle ri tshika ku kariha ka rona.+ 16  Kutani vavanuna lava va sungula ku chava Yehovha swinene,+ va endlela Yehovha xitlhavelo,+ va endla switshembiso leswi hlambanyiweke.+ 17  Yehovha a lerisa nhlampfi leyikulu leswaku yi mita Yonasi, kutani Yonasi+ a tshama eswirhweni swa le ndzeni swa nhlampfi leyi, masiku manharhu ni vusiku byinharhu.+

Tinhlamuselo ta le hansi