Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yohane 6:1-71

6  Endzhaku ka swilo leswi Yesu a tsemakanya lwandle ra Galeliya kumbe Tiberiyo.+  Kambe ntshungu lowukulu wu hambeta wu n’wi landzela, hikuva a wu vona masingita lawa a a ma endla eka lava a va vabya.+  Kutani Yesu a tlhandlukela entshaveni,+ a tshama kona swin’we ni vadyondzisiwa vakwe.  Kutani paseka,+ ku nga nkhuvo wa Vayuda, a yi ri kusuhi.  Hikokwalaho, loko Yesu a tlakusa mahlo yakwe ivi a vona ntshungu lowukulu wu ta eka yena, a ku eka Filipi: “Xana hi nga wu xavela kwihi swinkwa leswaku wu dya?”+  Hambiswiritano, a a vula leswi hi xikongomelo xo n’wi ringa, hikuva a a swi tiva leswi a a lava ku swi endla.  Filipi a n’wi hlamula a ku: “Swinkwa leswi ringanaka tidenari ta 200 a swi nge va ringani, leswaku un’wana ni un’wana a kuma switsongo.”+  Un’wana wa vadyondzisiwa vakwe, Andriya makwavo wa Simoni Petro, a ku eka yena:  “Hi loyi mufana lontsongo la nga ni swinkwa+ swa maxalana swa ntlhanu ni tinhlampfi timbirhi letitsongo. Kambe swi nga endla yini eka vanhu vo tala swonghasi?”+ 10  Yesu a ku: “Lerisani vanhu leswaku va vurhama tanihi loko va ri eku dyeni.”+ Kutani a ku ri ni byanyi byo tala endhawini yoleyo. Hikokwalaho vavanuna va vurhama, va endla nhlayo+ ya kwalomu ka 5 000. 11  Hiloko Yesu a teka swinkwa, kutani loko a nkhensile, a swi avela lava vurhameke, a endla hilaha ku fanaka ni hi tinhlampfi letitsongo, hi mpimo lowu a va lava+ wona. 12  Kambe loko va xurhe,+ a byela vadyondzisiwa vakwe a ku: “Hlengeletani swiphemu leswi saleke, leswaku ku nga tlangiwi hi nchumu.” 13  Hikokwalaho va swi hlengeleta, kutani va tata swirhundzu swa 12 hi swiphemu swa swinkwa swa maxalana swa ntlhanu, leswi siyiweke hi lava dyeke.+ 14  Hikwalaho loko vanhu va vona masingita lawa a ma endleke, va ku: “Hakunene loyi hi yena muprofeta+ loyi a a fanele ku ta emisaveni.” 15  Hikokwalaho, hi ku tiva leswaku a va ri kusuhi ni ku ta va ta n’wi khoma va n’wi endla hosi, Yesu a tlhelela+ entshaveni a ri swakwe. 16  Nimadyambu, vadyondzisiwa vakwe va rhelela elwandle,+ 17  kutani, va khandziya byatso, va tsemakanya lwandle va ya eKapernawume. Ina, enkarhini lowu a ku ri ni munyama naswona Yesu a a nga si ta eka vona. 18  Nakambe, lwandle ri sungula ku dungeka hikwalaho ka leswi a ku hunga+ mheho ya matimba. 19  Hambiswiritano, kuteloko va tlute kwalomu ka ntlhanu wa tikhilomitara, va vona Yesu a famba ehenhla ka lwandle a tshinela ebyatsweni; hiloko va khomiwa hi ku chava.+ 20  Kambe a ku eka vona: “Hi mina; mi nga chavi!”+ 21  Hikokwalaho va titwa va ntshunxekile ku n’wi amukela ebyatsweni, kutani ku nga ri khale byatso a byi fikile eribuweni leri a va lava ku ya+ eka rona. 22  Hi siku leri tlhandlamaka ntshungu lowu a wu yime etlhelweni lerin’wana ra lwandle wu vona leswaku a ku ri hava byatso byin’wana kwalaho handle ka lebyitsongo, ni leswaku Yesu a a nga nghenanga ebyatsweni ni vadyondzisiwa vakwe kambe i vadyondzisiwa vakwe ntsena lava fambeke; 23  kambe mabyatso lama humaka eTiberiyo ma fika ekusuhi ni ndhawu leyi va dyeleke eka yona xinkwa endzhaku ka loko Hosi yi nkhensile. 24  Hikokwalaho loko ntshungu wu vona leswaku Yesu a a nga ri kona ni vadyondzisiwa vakwe a va nga ri kona, wu khandziya mabyatso ya wona lamatsongo wu ya eKapernawume wu ya lava+ Yesu. 25  Kutani loko wu n’wi kuma entsungeni wa lwandle, wu ku eka yena: “Rabi,+ xana u fike rini laha?” 26  Yesu a wu hlamula a ku: “Ndzi tiyisile ndzi ri eka n’wina, A mi ndzi laveli leswi mi nga vona masingita, kambe hileswi mi dyeke swinkwa mi xurha.+ 27  Mi nga tirheli swakudya leswi helaka,+ kambe tirhelani swakudya leswi tshamaka, leswi nyikaka vutomi lebyi nga heriki,+ leswi N’wana wa munhu a nga ta mi nyika swona; hikuva Tatana, ku nga Xikwembu, u veke eka yena mfungho wakwe wa ku n’wi amukela.”+ 28  Hikokwalaho wu ku eka yena: “Xana hi fanele ku endla yini leswaku hi endla mintirho ya Xikwembu?” 29  Yesu a wu hlamula a ku: “Ntirho wa Xikwembu hi lowu, ku nga leswaku mi kombisa ripfumelo+ eka loyi xi n’wi rhumeke.”+ 30  Hikokwalaho wu ku eka yena: “Kutani, xana u endla singita+ rihi, leswaku hi ri vona ivi hi ku kholwa? Xana u endla ntirho wihi? 31  Vatata wa hina va dye manna+ emananga, hilaha ku tsariweke hakona, ‘U va nyike xinkwa xo huma etilweni leswaku va dya.’”+ 32  Hikwalaho Yesu u va byerile a ku: “Hakunene ndzi tiyisile ndzi ri eka n’wina, Muxe a nga mi nyikanga xinkwa xo huma etilweni, kambe Tata wa mina u mi nyika xinkwa xa ntiyiso xo huma etilweni.+ 33  Hikuva xinkwa xa Xikwembu hi loyi a xikaka hi le tilweni, a tisa vutomi emisaveni.” 34  Hikokwalaho va n’wi byela va ku: “Hosi, hi nyike xinkwa+ lexi nkarhi hinkwawo.” 35  Yesu a ku eka vona: “Hi mina xinkwa xa vutomi. Loyi a taka eka mina a nge khomiwi hi ndlala nikatsongo, naswona loyi a kombisaka ripfumelo eka mina a nge khomiwi hi torha nikatsongo.+ 36  Kambe ndzi mi byerile, Mi tlhele mi ndzi vona kambe a mi kholwi.+ 37  Hinkwaswo leswi Tatana a ndzi nyikaka swona swi ta ta eka mina, naswona loyi a taka eka mina a ndzi nge n’wi hlongoli;+ 38  hikuva ndzi xike hi le tilweni+ ku ta endla ku rhandza ka loyi a ndzi+ rhumeke, kambe ku nga ri ka mina. 39  Ku rhandza ka loyi a ndzi rhumeke hi loku, hileswaku ndzi nga lahlekeriwi hi nchumu eka hinkwaswo leswi a ndzi nyikeke swona kambe leswaku ndzi wu pfuxa+ hi siku ro hetelela. 40  Hikuva loku hi kona ku rhandza ka Tata wa mina, leswaku un’wana ni un’wana loyi a vonaka N’wana ivi a kombisa ripfumelo eka yena u fanele ku va ni vutomi+ lebyi nga heriki, kutani ndzi ta n’wi pfuxa hi siku+ ro hetelela.” 41  Hikokwalaho Vayuda va sungula ku n’wi n’unun’utela hikuva u te: “Hi mina xinkwa lexi xikaka hi le tilweni”;+ 42  hiloko va ku:+ “Xana loyi a hi Yesu n’wana wa Yosefa,+ loyi tata wakwe ni mana wakwe hi va tivaka? Xana u vurisa ku yini sweswi a ku, ‘Ndzi xike hi le tilweni’?” 43  Yesu a va hlamula a ku: “Tshikani ku n’unun’uta. 44  Ku hava munhu loyi a nga taka eka mina handle ka loko Tatana, loyi a ndzi rhumeke, a n’wi koka;+ naswona ndzi ta n’wi pfuxa hi siku+ ro hetelela. 45  Ku tsariwe leswi eka Vaprofeta, ‘Kutani hinkwavo va ta dyondzisiwa hi Yehovha.’+ Un’wana ni un’wana loyi a tweke Tatana a tlhela a dyondza u ta eka mina.+ 46  Ku nga ri swona leswaku ku ni munhu la voneke Tatana,+ handle ka loyi a humaka eka Xikwembu; yena u n’wi vonile Tatana.+ 47  Hakunene ndzi tiyisile ndzi ri eka n’wina, Loyi a kholwaka u ni vutomi+ lebyi nga heriki. 48  “Hi mina xinkwa+ xa vutomi. 49  Vatata wa n’wina va dye manna+ emananga kambe va file. 50  Lexi i xinkwa lexi xikaka hi le tilweni, leswaku un’wana ni un’wana a xi dya, a nga fi. 51  Ndzi xinkwa lexi hanyaka lexi xikeke hi le tilweni; loko munhu a dya xinkwa lexi u ta hanya hi masiku; naswona entiyisweni, xinkwa lexi ndzi nga ta xi nyikela i nyama+ ya mina hikwalaho ka vutomi bya misava.”+ 52  Hikokwalaho Vayuda va sungula ku kanetana, va ku: “Xana wanuna loyi a nga hi nyika nyama yakwe hi dya hi ndlela yihi?” 53  Hikwalaho Yesu a ku eka vona: “Hakunene ndzi tiyisile ndzi ri eka n’wina, Loko mi nga dyi nyama+ ya N’wana wa munhu mi tlhela mi nwa ngati yakwe,+ a mi na vutomi.+ 54  Loyi a dyaka nyama ya mina a tlhela a nwa ngati ya mina u ni vutomi lebyi nga heriki, naswona ndzi ta n’wi pfuxa+ hi siku ro hetelela; 55  hikuva nyama ya mina i swakudya swa ntiyiso, ni ngati ya mina i swakunwa swa ntiyiso. 56  Loyi a dyaka nyama ya mina a tlhela a nwa ngati ya mina u tshama a ri ni vun’we na mina, na mina ndzi va ni vun’we na yena.+ 57  Tanihi leswi Tatana la hanyaka+ a ndzi rhumeke ni leswi ndzi hanyaka hikwalaho ka Tatana, ni loyi a ndzi dyaka, u ta hanya hikwalaho ka mina.+ 58  Lexi i xinkwa lexi xikeke hi le tilweni. A swi fani ni le nkarhini lowu vatata wa n’wina va dyeke ha wona, va fa. Loyi a dyaka xinkwa lexi u ta hanya hi masiku.”+ 59  Swilo leswi u swi vule a ri karhi a dyondzisa enhlengeletanweni ya tiko eKapernawume. 60  Hikokwalaho vo tala va vadyondzisiwa vakwe, loko va twa leswi, va ku: “Mhaka leyi yi tsema nhlana; i mani la nga yi yingisaka?”+ 61  Kambe Yesu, hi ku tiva leswaku vadyondzisiwa vakwe a va n’unun’uta hi leswi, a ku eka vona: “Xana leswi swa mi khunguvanyisa?+ 62  Hikokwalaho, ku vuriwa yini loko mo vona N’wana wa munhu a tlhandlukela laha a a ri kona eku sunguleni?+ 63  Moya hi wona lowu nyikaka vutomi;+ nyama a yi tirhi nchumu nikatsongo. Marito lawa ndzi mi byeleke wona i moya+ ni vutomi.+ 64  Kambe ku ni van’wana va n’wina lava nga kholwiki.” Hikuva ku sukela eku sunguleni Yesu a a va tiva lava nga kholwiki ni loyi a a ta n’wi xenga.+ 65  Hiloko a ya emahlweni a ku: “Hi yona mhaka leyi ndzi mi byeleke ndzi ku, A nga kona loyi a nga taka eka mina handle ka loko a pfumeleriwa hi Tatana.”+ 66  Hikwalaho ka sweswo vo tala va vadyondzisiwa vakwe va tlhelela eka swilo swa le ndzhaku+ naswona va nga ha fambi na yena.+ 67  Hikokwalaho Yesu a byela lava 12 a ku: “N’wina a mi swi lavi ku famba, a hi swona ke?” 68  Simoni Petro+ a n’wi hlamula a ku: “Hosi, xana hi ta ya eka mani?+ Hi wena u nga ni marito ya vutomi+ lebyi nga heriki; 69  naswona hi khorwile ni ku tiva leswaku u Mukwetsimi wa Xikwembu.”+ 70  Yesu a va hlamula a ku: “Ndzi hlawule n’wina va 12,+ a hi swona ke? Kambe un’wana wa n’wina i mulumbeti.”+ 71  Entiyisweni, a a vulavula hi Yudasi n’wana wa Simoni Iskariyota; hikuva hi yena loyi a a ta n’wi xenga,+ hambileswi a a ri un’wana wa lava 12.

Tinhlamuselo ta le hansi