Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yohane 20:1-31

20  Hi siku+ ro sungula ra vhiki Mariya Magadala a ta eka sirha-bako ra xitsundzuxo nimpundzu, ka ha ri ni munyama, kutani a vona ribye ri susiwile eka sirha-bako+ ra xitsundzuxo.  Hikokwalaho a tsutsuma kutani a fika eka Simoni Petro ni mudyondzisiwa+ loyi un’wana, loyi Yesu a a ri ni xinakulobye eka yena, kutani a ku eka vona: “Hosi va yi susile eka sirha-bako ra xitsundzuxo,+ naswona a hi swi tivi leswaku va yi veke kwihi.”  Kutani Petro+ ni mudyondzisiwa loyi un’wana va huma va ya eka sirha-bako ra xitsundzuxo.  Ina, havambirhi va sungula ku tsutsuma; kambe mudyondzisiwa loyi un’wana u tsutsume a rhangela Petro hi rivilo lerikulu kutani a fika ku sungula eka sirha-bako ra xitsundzuxo.  Kutani loko a korhama, a vona tinguvu ti ri ehansi,+ kambe a nga nghenanga.  Kutani Simoni Petro na yena a ta a n’wi landzela, a nghena eka sirha-bako ra xitsundzuxo. Hiloko a vona tinguvu ti ri ehansi,+  ni lapi leri a ri ri enhlokweni yakwe ri nga ri endhawini yin’we ni tinguvu kambe ri songiwe roxe endhawini yin’wana.  Hikokwalaho, enkarhini wolowo ni mudyondzisiwa loyi un’wana loyi a fikeke ku sungula eka sirha-bako ra xitsundzuxo a nghena, kutani a swi vona, a kholwa.  Hikuva a va nga si ri twisisa tsalwa leri vulaka leswaku u fanele ku pfuka eka lava feke.+ 10  Kutani vadyondzisiwa va vuyela emakaya ya vona. 11  Hambiswiritano, Mariya a yima ehandle ekusuhi ni sirha-bako ra xitsundzuxo, a rila. Kutani loko a ri karhi a rila, a korhama leswaku a languta eka sirha-bako ra xitsundzuxo 12  hiloko a vona tintsumi+ timbirhi ti ambale swo basa, yin’wana yi tshame etinhlokweni kasi yin’wanyana yi tshame hi le milengeni laha ntsumbu wa Yesu a wu latiwe kona. 13  Hiloko ti ku eka yena: “Wansati, u rilela yini?” A ku eka tona: “Va teke Hosi yanga, naswona a ndzi swi tivi leswaku va yi late kwihi.” 14  Endzhaku ko vula swilo leswi a hundzuluka kutani a vona Yesu a yimile, kambe a a nga swi lemuki leswaku a ku ri Yesu.+ 15  Yesu a ku eka yena: “Wansati, u rilela yini? U lava mani?”+ Hi ku anakanya leswaku a ku ri mutirhi wa le ntangeni, a ku eka yena: “Nkulukumba, loko u n’wi tekile, ndzi byele lomu u n’wi lateke kona, ndzi ta ya ndzi ya n’wi teka.” 16  Yesu a ku eka yena: “Mariya!”+ Loko a hundzuluka, wansati a ku eka yena, hi Xiheveru: “Raboni,”+ (leswi vulaka leswaku “Mudyondzisi!”) 17  Yesu a ku eka yena: “Tshika ku ndzi namarhela. Hikuva a ndzi si tlhandlukela eka Tatana. Kambe yana eka vamakwerhu+ u va byela u ku, ‘Ndzi tlhandlukela eka Tatana+ ni Tata wa n’wina ni le ka Xikwembu+ xa mina ni Xikwembu+ xa n’wina.’” 18  Mariya Magadala a fika a byela vadyondzisiwa mahungu a ku: “Ndzi vone Hosi,” ni leswaku u n’wi byele swilo leswi.+ 19  Hikokwalaho, loko nkarhi wu fambile siku rero, ri nga ro sungula evhikini,+ hambileswi tinyangwa a ti lotleriwile laha vadyondzisiwa a va ri kona hi ku chava+ Vayuda, Yesu a nghena+ kutani a yima exikarhi ka vona, a va byela a ku: “Onge mi nga va ni ku rhula.”+ 20  Kuteloko a vule leswi a va komba mavoko yakwe ni tsheve.+ Kutani vadyondzisiwa va tsaka+ loko va vona Hosi. 21  Hikokwalaho, Yesu a tlhela a ku eka vona: “Onge mi nga va ni ku rhula. Leswi Tatana a ndzi rhumeke,+ na mina ndza mi rhuma.”+ 22  Endzhaku ko vula sweswo a va huhutela a ku eka vona: “Amukelani moya lowo kwetsima.+ 23  Loko mi rivalela swidyoho swa vanhu hinkwavo,+ va rivaleriwa; loko mi hlayisa swa vanhu hinkwavo, swi tshama swi hlayisiwile.”+ 24  Kambe Tomasi,+ un’wana wa lava 12, loyi a a vuriwa Hahla, a a nga ri na vona loko Yesu a nghena. 25  Hikwalaho vadyondzisiwa lavan’wana va n’wi byela va ku: “Hi vone Hosi!” Kambe a ku eka vona: “Handle ka loko ndzo vona mimbhovo ya swipikiri emavokweni yakwe, ndzi nghenisa ritiho ra mina emimbhoveni ya swipikiri, ndzi nghenisa ni voko ra mina etsheveni+ rakwe, a ndzi nge kholwi+ nikatsongo.” 26  Kutani, endzhaku ka masiku ya nhungu vadyondzisiwa vakwe a va ri endlwini nakambe, naswona Tomasi a a ri na vona. Yesu a nghena, hambileswi tinyangwa a ti lotleriwile, hiloko a yima exikarhi ka vona a ku: “Onge mi nga va ni ku rhula.”+ 27  Endzhaku ka sweswo a byela Tomasi a ku: “Nghenisa ritiho ra wena laha, u vona mavoko ya mina, u teka voko+ ra wena u ri nghenisa etsheveni ra mina, u tshika ku ka u nga kholwi kambe u kholwa.” 28  Tomasi a n’wi hlamula a ku: “Hosi yanga ni Xikwembu+ xanga!” 29  Yesu a ku eka yena: “Xana u kholwa hikwalaho ka leswi u ndzi voneke? Va tsaka lava kholwaka+ hambiloko va nga voni nchumu.” 30  Hakunene, Yesu u endle ni masingita man’wana yo tala emahlweni ka vadyondzisiwa, leswi nga tsariwangiki eka buku-nsongwa+ leyi. 31  Kambe leswi swi tsaleriwe+ leswaku mi kholwa leswaku Yesu i Kreste N’wana wa Xikwembu, ni leswaku, hikwalaho ka ku kholwa,+ mi kuma vutomi hi vito rakwe.

Tinhlamuselo ta le hansi