Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yohane 14:1-31

14  “Mi nga pfumeleli timbilu ta n’wina ti karhateka.+ Kombisani ripfumelo eka Xikwembu,+ mi kombisa ripfumelo ni le ka mina.+  Endlwini ya Tatana ku ni vutshamo byo tala.+ Loko a swi nga ri tano, a ndzi ta va ndzi mi byerile, hikuva ndzi ya mi lunghiselela ndhawu.+  Nakambe, loko ndzi ya mi lunghisela ndhawu, ndzi ta tlhela+ ndzi vuya kutani ndzi ta mi amukela ekaya mi va na mina,+ leswaku laha ndzi nga kona na n’wina mi va kona.+  Naswona ma yi tiva ndlela ya laha ndzi yaka kona.”  Tomasi+ a ku eka yena: “Hosi, a hi ku tivi laha u yaka kona.+ Xana hi yi tivisa ku yini ndlela?”  Yesu a ku eka yena: “Hi mina ndlela+ ni ntiyiso+ ni vutomi.+ A nga kona loyi a taka eka Tatana handle ko ta ha mina.+  Loko n’wina a mi ndzi tiva, a mi ta tiva ni Tata wa mina; ku sukela enkarhini lowu ma n’wi tiva naswona mi n’wi vonile.”+  Filipi a ku eka yena: “Hosi, hi kombe Tatana, sweswo swi ringene eka hina.”  Yesu a ku eka yena: “Ndzi ve na n’wina nkarhi wo leha swonghasi, kambe, Filipi, xana a wu si ndzi tiva? Loyi a ndzi voneke u vone na Tatana.+ U vurisa ku yini u ku, ‘Hi kombe Tatana’?+ 10  Xana a wu kholwi leswaku ndzi ni vun’we na Tatana ni leswaku Tatana u ni vun’we na mina?+ Swilo leswi ndzi mi byelaka swona a ndzi swi vuli hi ku tisungulela; kambe Tatana la tshamaka a ri ni vun’we na mina u endla mintirho+ yakwe. 11  Ndzi kholweni leswaku ndzi ni vun’we na Tatana ni leswaku Tatana u ni vun’we na mina; loko swi nga ri tano, kholwani hikwalaho ka mintirho.+ 12  Hakunene ndzi tiyisile ndzi ri eka n’wina, Loyi a kombisaka ripfumelo eka mina, na yena u ta endla mintirho leyi ndzi yi endlaka; naswona u ta endla mintirho leyikulu+ ku tlula leyi, hikuva ndza famba ndzi ya eka Tatana.+ 13  Naswona, xin’wana ni xin’wana lexi mi xi kombelaka hi vito ra mina, ndzi ta xi endla, leswaku Tatana a vangamisiwa mayelana ni N’wana.+ 14  Loko mi kombela xin’wana ni xin’wana hi vito ra mina, ndzi ta xi endla. 15  “Loko mi ndzi rhandza, mi ta hlayisa swileriso+ swa mina; 16  naswona ndzi ta kombela Tatana kutani u ta mi nyika mupfuni un’wana leswaku a va na n’wina hi masiku,+ 17  moya wa ntiyiso,+ lowu misava yi nga ta ka yi nga wu amukeli,+ hikuva a yi wu voni naswona a yi wu tivi. N’wina ma wu tiva hikuva wu tshama na n’wina naswona wu le ka n’wina.+ 18  A ndzi nge mi siyi mi ri swisiwana.+ Ndza ta eka n’wina. 19  Ku sele nkarhinyana kutani misava a yi nge he ndzi voni,+ kambe n’wina mi ta ndzi vona,+ hikuva ndza hanya na n’wina mi ta hanya.+ 20  Hi siku rero mi ta tiva leswaku ndzi ni vun’we na Tatana, na n’wina mi ni vun’we na mina kasi na mina ndzi ni vun’we na n’wina.+ 21  Loyi a nga ni swileriso swa mina a tlhela a swi hlayisa, hi yena loyi a ndzi rhandzaka.+ Hi ku fanana loyi a ndzi rhandzaka u ta rhandziwa hi Tatana, naswona ndzi ta n’wi rhandza, ndzi tikombisa eka yena erivaleni.” 22  Yudasi,+ ku nga ri Iskariyota, a ku eka yena: “Hosi, xana ku endleke yini leswi u lavaka ku tikombisa u va erivaleni eka hina, hayi emisaveni?”+ 23  Yesu a n’wi hlamula a ku: “Loko munhu a ndzi rhandza u ta hlayisa+ rito ra mina, naswona Tatana u ta n’wi rhandza, kutani hi ta ta eka yena, hi tshama na yena.+ 24  Loyi a nga ndzi rhandziki a nga ma hlayisi marito ya mina; naswona rito leri mi ri twaka a hi ra mina, kambe i ra Tatana loyi a ndzi rhumeke.+ 25  “Loko ndza ha ri na n’wina ndzi mi byele swilo leswi. 26  Kambe mupfuni, la nga moya lowo kwetsima, loyi Tatana a nga ta n’wi rhumela hi vito ra mina, u ta mi dyondzisa swilo hinkwaswo ni ku mi tsundzuxa swilo hinkwaswo leswi ndzi mi byeleke swona.+ 27  Ndzi mi siyela ku rhula, ndzi mi nyika ku rhula+ ka mina. A ndzi mi nyiki kona hi ndlela leyi misava yi ku nyikaka ha yona. Mi nga pfumeleli timbilu ta n’wina ti karhateka hambi ku ri ku ti pfumelela ti khwanyana hi ku chava. 28  Mi swi twile leswi ndzi mi byeleke swona leswaku, ndza famba naswona ndza vuya eka n’wina. Loko a mi ndzi rhandza, a mi ta tsaka leswi ndzi yaka eka Tatana, hikuva Tatana u nkulu+ eka mina. 29  Kutani sweswi ndzi mi byele swi nga si humelela,+ leswaku loko swi humelela mi kholwa. 30  A ndzi nge he vulavuli ngopfu na n’wina, hikuva mufumi+ wa misava wa ta. Naswona a nge ndzi endli nchumu,+ 31  kambe, ku endlela leswaku misava yi swi tiva leswaku ndza n’wi rhandza Tatana, ndzi endla hilaha Tatana a ndzi leriseke+ ku endla hakona. Tlakukani, a hi sukeni laha.

Tinhlamuselo ta le hansi