Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yohane 11:1-57

11  A ku ri ni wanuna un’wana la vabyaka, Lazaro wa Betaniya, wa le ximutanini lexi Mariya na Marta+ makwavo wa xisati a va tshama eka xona.  Entiyisweni a ku ri Mariya loyi a toteke Hosi hi mafurha+ yo nun’hwela a tlhela a sula milenge ya yona yi oma hi misisi+ yakwe, loyi makwavo Lazaro a a vabya.  Hikokwalaho vamakwavo va xisati va rhumela rito eka yena, va ku: “Hosi, waswivo, loyi u nga ni xinakulobye+ eka yena wa vabya.”  Kambe loko Yesu a swi twa a ku: “Xikongomelo xa vuvabyi a hi rifu kambe i ku vangamisa Xikwembu,+ leswaku N’wana wa Xikwembu a vangamisiwa ha swona.”  Yesu a a rhandza Marta ni makwavo wa xisati na Lazaro.  Hambiswiritano, loko a twa leswaku wa vabya, kunene a tshama masiku mambirhi endhawini leyi a a ri eka yona.  Kutani endzhaku ka sweswo a byela vadyondzisiwa vakwe a ku: “A hi tlheleleni eYudiya.”  Vadyondzisiwa va ku eka yena: “Rabi,+ ku nga ri khale Vayudiya a va lava ku ku khandla hi maribye,+ kambe wa ha tlhelela kona ke?”  Yesu a hlamula a ku: “Ku ni tiawara ta 12 ta ku vonakala ka siku, a hi swona ke? Loko munhu a famba eku vonakaleni ka siku+ a nga tlumbi nchumu, hikuva u vona ku vonakala ka misava leyi. 10  Kambe loko munhu a famba nivusiku,+ u tlumba swilo swo karhi, hikuva ku vonakala a ku kona eka yena.” 11  A vula swilo leswi, kutani endzhaku ka swona a ku eka vona: “Lazaro nakulorhi u ye eku wiseni, kambe ndzi ya kona leswaku ndzi n’wi pfuxa evurhongweni.”+ 12  Hikokwalaho vadyondzisiwa va ku eka yena: “Hosi, loko a ye eku wiseni, u ta hanya.” 13  Hambiswiritano, Yesu a a vulavula hi rifu ra yena. Kambe a va anakanya leswaku u vulavula hi ku wisa evurhongweni. 14  Hikokwalaho, enkarhini wolowo Yesu a va byela hi ku kongoma: “Lazaro u file,+ 15  kambe ndza tsaka hikwalaho ka n’wina hikuva a ndzi nga ri kona, ku endlela leswaku mi kholwa. Kambe a hi yeni eka yena.” 16  Hikokwalaho Tomasi, loyi a a vuriwa Hahla, a byela vadyondzisiwa-kulobye a ku: “Na hina a hi yeni, leswaku hi ta fa na yena.”+ 17  Hikwalaho loko Yesu a fika, u kume leswaku a a ri ni masiku ya mune a ri eka sirha-bako ra xitsundzuxo.+ 18  Kutani muti wa Betaniya a wu ri kusuhi na Yerusalema empfhukeni wa kwalomu ka tikhilomitara tinharhu. 19  Hikwalaho vo tala va Vayuda a va te eka Marta na Mariya ku ta va chavelela+ malunghana ni makwavo. 20  Kutani Marta, loko a twa leswaku Yesu wa ta, a n’wi hlanganisa; kambe Mariya+ a tshama ekaya. 21  Hiloko Marta a ku eka Yesu: “Hosi, loko a wu ri kona laha, makwerhu ingi a nga fanga.+ 22  Kambe sweswi ndza swi tiva leswaku swilo hinkwaswo leswi u swi kombelaka+ eka Xikwembu, Xikwembu xi ta ku nyika swona.” 23  Yesu a ku eka yena: “Makwenu u ta pfuka.”+ 24  Marta a ku eka yena: “Ndza swi tiva leswaku u ta pfuka eku pfuxiweni ka lava feke+ hi siku ro hetelela.” 25  Yesu a ku eka yena: “Hi mina ku pfuka ni vutomi.+ Loyi a kombisaka ripfumelo eka mina, hambiloko a fa, u ta hanya;+ 26  naswona un’wana ni un’wana loyi a hanyaka a tlhela a kombisa ripfumelo eka mina a nge fi nikatsongo.+ Xana wa swi kholwa leswi ke?” 27  A ku eka yena: “Ina, Hosi; ndzi khorwile leswaku u Kreste N’wana wa Xikwembu, Loyi a taka emisaveni.”+ 28  Kuteloko a vule sweswo, a ya vitana Mariya makwavo wa xisati, a n’wi byela exihundleni a ku: “Mudyondzisi+ u fikile, wa ku vitana.” 29  Yena, loko a twa sweswo, a pfuka hi ku hatlisa a ya eka yena. 30  Entiyisweni, Yesu a a nga si fika eximutanini xexo, kambe a a ha ri endhawini leyi Marta a n’wi hlanganiseke eka yona. 31  Hikokwalaho Vayuda lava a va ri na yena endlwini+ ni lava a va n’wi chavelela, loko va vona Mariya a pfuka hi ku hatlisa a huma, va n’wi landzela, va ehleketa leswaku a a ya eka sirha-bako ra xitsundzuxo+ a ya rila kona. 32  Kutani loko Mariya a fika laha Yesu a a ri kona, a n’wi vona, a wela emilengeni yakwe, a ku eka yena: “Hosi, loko a wu ri kona laha, makwerhu ingi a nga fanga.”+ 33  Hikokwalaho, loko Yesu a n’wi vona a rila ni Vayuda lava teke na yena va rila, a konya emoyeni, a karhateka;+ 34  hiloko a ku: “Mi n’wi veke kwihi?” Va ku eka yena: “Hosi, tana u ta vona.” 35  Yesu a humesa mihloti.+ 36  Hikokwalaho Vayuda va ku: “Vonani, xinakulobye xonghasi lexi a a ri na xona eka yena!”+ 37  Kambe van’wana va vona va ku: “Xana munhu loyi a pfuleke mahlo+ ya loyi a feke mahlo a nga swi kotanga ku n’wi sivela leswaku a nga fi?” 38  Hikwalaho Yesu, endzhaku ko konya nakambe endzeni, a ta eka sirha-bako ra xitsundzuxo.+ Entiyisweni a ku ri bako, naswona a ri pfariwe hi ribye.+ 39  Yesu a ku: “Susani ribye.”+ Marta, makwavo wa mufi, a ku eka yena: “Hosi, u fanele se a nun’hwa hikuva swi endla mune wa masiku.” 40  Yesu a ku eka yena: “Xana a ndzi ku byelanga leswaku loko u kholwa u ta vona ku vangama ka Xikwembu?”+ 41  Hiloko va susa ribye. Kutani Yesu a tlakusela mahlo yakwe etilweni+ a ku: “Tatana, ndza nkhensa hikuva u ndzi twile.+ 42  I ntiyiso, a ndzi swi tiva leswaku wa ndzi twa nkarhi hinkwawo; kambe ndzi vulavurile hikwalaho ka ntshungu+ lowu yimeke laha, leswaku wu kholwa leswaku u ndzi rhumile.”+ 43  Kuteloko a vule swilo leswi, a huwelela hi rito lerikulu a ku: “Lazaro, huma!”+ 44  Munhu loyi a a file a huma, milenge yakwe ni mavoko swi boheleriwe hi swo tsondzela,+ naswona nghohe yakwe a yi tsondzeriwe hi lapi. Yesu a ku eka vona: “N’wi ntshunxeni, mi n’wi tshika a famba.” 45  Hikokwalaho vo tala va Vayuda lava a va te eka Mariya ni lava voneke leswi a nga swi endla va pfumela eka yena;+ 46  kambe van’wana va vona va ya eka Vafarisi kutani va va byela swilo leswi Yesu a swi endleke.+ 47  Hikwalaho vaprista lavakulu ni Vafarisi va hlengeleta Sanedri+ va ku: “Xana hi ta endla yini, hikuva munhu loyi u endla masingita+ yo tala? 48  Loko hi n’wi tshika hi ndlela leyi, hinkwavo va ta pfumela eka yena,+ kutani Varhoma+ va ta fika va teka ndhawu+ ya hina ni tiko ra hina.” 49  Kambe un’wana wa vona, Kayafasi, loyi a a ri muprista lonkulu lembe+ rero, a ku eka vona: “A mi tivi nchumu nikatsongo, 50  naswona a mi anakanyi leswaku swi pfuna n’wina loko munhu un’we a fela+ vanhu, ematshan’weni ya leswaku tiko hinkwaro ri lovisiwa.”+ 51  Hambiswiritano, sweswo a nga swi vulanga hi ku tisungulela; kambe hikwalaho ka leswi a a ri muprista lonkulu lembe rero, u profete leswaku Yesu u ta fela tiko, 52  naswona ku nga ri tiko ntsena, kambe leswaku vana va Xikwembu lava hangalakeke+ a va hlengeleta va va un’we.+ 53  Hikokwalaho ku sukela siku rero va boha makungu ya ku n’wi dlaya.+ 54  Hikwalaho Yesu a nga ha tlhelanga a famba-famba erivaleni+ exikarhi ka Vayuda,+ kambe u suke kwalaho a ya etikweni ra le kusuhi ni mananga, emutini lowu vuriwaka Efrayimi,+ a tshama kona ni vadyondzisiwa. 55  Paseka+ ya Vayuda a yi ri kusuhi, naswona vanhu vo tala va huma etikweni rero va ya eYerusalema emahlweni ka paseka leswaku va tibasisa hi mukhuva+ wa kona. 56  Hiloko va lava Yesu naswona va byelana va ri karhi va yime etempeleni va ku: “Mi swi vonisa ku yini? Xana mi vona onge a nge ti enkhubyeni nikatsongo?” 57  Hilaha a swi ri hakona, vaprista lavakulu ni Vafarisi a va humese swileriso swa leswaku loko o va kona la tivaka lomu a nga kona, u fanele ku swi paluxa, leswaku va n’wi khoma.

Tinhlamuselo ta le hansi