Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yobo 42:1-17

42  Yobo a ya emahlweni a hlamula Yehovha a ku:   “Se ndza swi tiva leswaku wa swi kota ku endla swilo hinkwaswo,+ Naswona a yi kona mianakanyo leyi u nga yi fikeleriki.+   ‘I mani loyi, la pfilunganyaka xitsundzuxo a nga ri na vutivi?’+ Hikokwalaho a ndzi vulavula, ndzi nga ri na ku twisisa Swilo leswi ndzi hlamarisaka, leswi ndzi nga swi tiviki.+   ‘Ndzi kombela u ndzi yingisa, ndzi ta vulavula. Ndzi ta ku vutisa, wena u ndzi byela.’+   Ndzi twe ha wena hi mahungundlela, Kambe sweswi tihlo ra mina ra ku vona.   Hikokwalaho ndzi tlhentlhela endzhaku, Ndza hundzuka+ entshurini ni le nkumeni.”  Kutani endzhaku ka loko Yehovha a vule marito lawa eka Yobo, Yehovha a ku eka Elifazi lowa Mutemani: “Vukarhi bya mina byi pfurhele wena ni vanakuloni vambirhi,+ hikuva n’wina a mi vulavulanga ntiyiso+ ha mina hilaha nandza wa mina Yobo a endleke hakona.  Sweswi titekeleni tinkunzi ta nkombo ni makhuna+ ya nkombo mi ya eka nandza wa mina Yobo,+ mi fanele mi tihumesela xitlhavelo xo hisiwa; kutani Yobo nandza wa mina u ta mi khongelela.+ Ndzi ta amukela xikandza xakwe ntsena leswaku ndzi nga mi endli vuphukuphuku lebyi nyumisaka, hikuva a mi vulavulanga ntiyiso ha mina, ku hambana ni nandza wa mina Yobo.”+  Kutani Elifazi lowa Mutemani na Bilidadi lowa Muxuha na Sofara lowa Munamani va famba va ya endla hilaha Yehovha a va byeleke hakona; hiloko Yehovha a amukela xikandza xa Yobo. 10  Kutani Yehovha a herisa vukhumbi bya Yobo+ loko a khongelela vanakulobye,+ Yehovha a nyika Yobo hinkwaswo leswi a swi ri swa yena hilaha ku engetelekeke, swi andzisiwe kambirhi.+ 11  Kutani va hambeta va ta eka yena, vamakwavo hinkwavo ni vamakwavo va xisati hinkwavo ni hinkwavo lava a va n’wi tiva eku sunguleni,+ va dya xinkwa na yena+ endlwini yakwe ni ku n’wi tshandzisa ni ku n’wi chavelela eka makhombo hinkwawo lawa Yehovha a ma pfumeleleke leswaku ma n’wi wela; un’wana ni un’wana wa vona a n’wi nyika mali ni xingwavila xa nsuku. 12  Kutani Yehovha a katekisa+ makumu ya Yobo ku tlula masungulo yakwe,+ lerova a va ni tinyimpfu ta 14 000, ni tikamela ta 6 000 ni swipani swa tihomu swa 1 000 ni swipani swa timbhongolo ta mantswele swa 1 000. 13  A tlhela a va ni vana va majaha va nkombo ni va vanhwanyana vanharhu.+ 14  Kutani a thya lowo sungula vito ra Yemima ni vito ra lowa vumbirhi a ku i Kesiya ni vito ra lowa vunharhu a ku i Kereni-hapuku. 15  Naswona a va kona vavasati lava kumekeke va saseke ku fana ni vana va Yobo va vanhwanyana etikweni hinkwaro, tata wa vona a va nyika ndzhaka swin’we ni vamakwavo va xinuna.+ 16  Yobo a hambeta a hanya malembe+ ya 140 endzhaku ka leswi, a vona vana vakwe va majaha ni vatukulu vakwe va xinuna+—switukulwana swa mune. 17  Hakatsongo-tsongo Yobo a fa, a dyuhele naswona a enerisekile hi masiku.+

Tinhlamuselo ta le hansi