Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yobo 38:1-41

38  Yehovha a hlamula Yobo a ri exidzedzeni,+ a ku:   “I mani loyi, la pfilunganyaka xitsundzuxo Hi marito lama nga riki na vutivi?+   Ndzi kombela u tikhama xisuti, ku fana ni munhu la tiyeke emirini, Ndzi ku vutisa, wena u ndzi byela.+   A wu ri kwihi loko ndzi simeka misava?+ Ndzi byele, loko u ri ni ku twisisa.   I mani la vekeke mimpimo ya yona, loko u swi tiva, Kumbe, i mani la tshambuluteke ngoti ya ku pima ehenhla ka yona?   Xana tiphuphu+ ta yona ti dzimiwe eka yini, Kumbe, i mani la vekeke ribye ra yona ra le yinhleni,   Loko tinyeleti ta nimixo+ ti huwelela hi ntsako, Ni vana va Xikwembu+ hinkwavo va huwelela va dzunisa?   I mani la pfaleleke lwandle hi tinyangwa,+ Leri humeke onge hiloko ri huma embelekweni;   Loko ndzi veka papa ri va nguvu ya rona Ni ku dzwihala lokukulu ku va xitsondzelo xa rona, 10  Ndzi sungula ku veka xileriso xa mina ehenhla ka rona Ndzi veka swigogo ni tinyangwa,+ 11  Kutani ndzi ya emahlweni ndzi ku, ‘U fika laha, u nga hundzi;+ Naswona magandlati ya wena lamakulu ma helela laha’?+ 12  Xana u lerise mixo+ ku sukela emasikwini ya wena? Xana u endle leswaku vurhonga byi tiva ndhawu ya byona, 13  Leswaku byi fika emakumu ya misava, Leswaku lavo homboloka va humesiwa eka byona?+ 14  Bya tihundzula ku fana ni vumba+ ehansi ka mfungho, Swilo swi humelela onge hiloko swi ambarile. 15  Ku vonakala ka lavo homboloka ka susiwa eka vona,+ Ni voko leri tlakukeke ra tshoviwa.+ 16  Xana u tshame u fika eswihlobyeni swa lwandle, Kumbe u tshame u famba-famba+ u lavisisa xidziva?+ 17  Xana u tshame u fununguleriwa tinyangwa ta rifu,+ Kumbe, xana u nga ti vona tinyangwa ta ndzhuti lowukulu?+ 18  Xana u tshame u xiyisisa hi vutlharhi tindhawu to anama ta misava?+ Vula, loko u tshame u ti tiva hinkwato. 19  Sweswi yi kwihi ndlela leyi yaka laha ku nga ni ku vonakala?+ Loko ku ri munyama, sweswi yi kwihi ndhawu ya wona, 20  Leswaku u nga wu teka u wu yisa endzilakaneni wa wona Leswaku u ta twisisa tindlela leti yaka endlwini ya wona? 21  Xana u swi tiva hileswi a wu velekiwile hi nkarhi wolowo,+ Ni hikwalaho ka leswi masiku ya wena ma nga tala? 22  Xana u tshame u nghena evuhlayiselweni bya gamboko,+ Kumbe, xana wa byi vona ni vuhlayiselo bya xihangu,+ 23  Leswi ndzi swi hlayiseleke nkarhi wa maxangu, Siku ra ku lwa ni ra nyimpi?+ 24  Kutani yi kwihi ndlela leyi ku vonakala ku tiavanyisaka ha yona, Ni mheho+ ya le vuxeni yi hungaka hinkwako-nkwako emisaveni? 25  I mani la avanyiseke mugerho wa ndhambi Ni ndlela ya papa ra ku dzindza,+ 26  La nisaka mpfula endhawini leyi nga riki na munhu, Emananga laha ku nga riki na munhu,+ 27  Ku enerisa tindhawu leti hlaseriweke hi xidzedze ni tindhawu leti nga marhumbi Ni ku mirisa byanyi leswaku byi kula?+ 28  Xana u kona tatana wa mpfula,+ Kumbe i mani la velekeke mberha?+ 29  Entiyisweni ayisi yi huma ekhwirini ra mani, Loko ku ri gwitsi+ ra tilo, i mani loyi entiyisweni a ri velekaka? 30  Mati ma tifihla onge hiloko ma fihliwe hi ribye, Ni vuandlalo bya xidziva xa mati byi ma vunga ndhawu yin’we.+ 31  Xana u nga ti tsimba ti tiya timpecana ta nhlengeleto wa tinyeleti wa Kima, Kumbe, xana u nga ntshunxa tintambhu ta nhlengeleto wa tinyeleti wa Kesili?+ 32  Xana u nga humesa nhlengeleto wa tinyeleti wa Mazaroti hi nkarhi wa wona lowu vekiweke? Loko ku ri nhlengeleto wa tinyeleti wa Axi etlhelo ka vana va wo-na, xana u nga wu kongomisa? 33  Xana wa yi tiva milawu ya matilo,+ Kumbe, xana u nga veka vulawuri bya yona emisaveni? 34  Xana u nga tlakusa rito ra wena ri fika ni le papeni, Lerova mati yo tala ngopfu ma ku funengeta?+ 35  Xana u nga rhuma tindlati leswaku ti famba Kutani ti ku eka wena, ‘Hi hina lava!’? 36  I mani la vekeke vutlhari+ emapapeni, Kumbe, i mani la nyikeke xiendlakalo xa le xibakabakeni ku twisisa?+ 37  I mani loyi hi vutlhari a nga hlayaka mapapa hilaha ku pakanisaka, Kumbe makhuwana ya mati ya tilo—i mani la nga ma voyamisaka a ma chulula,+ 38  Loko ntshuri wu hlengeletana wu hundzuka vumba, Ni mabuwu ya misava ma namarhelana? 39  Xana u nga yi hlotela nghala Xana u nga swi xurhisa swinghalana+ loko swi ri ni ndlala, 40  Loko swi etlela endhawini leyi tumbeleke,+ Kumbe swi bvutamile, swi tumbelela? 41  I mani la lunghiselelaka wukuwuku swakudya+ swa rona Loko mavondlo ya rona ma rilela Xikwembu ma lava mpfuno, Loko ma tsendzeleka hikuva ku nga ri na swakudya?

Tinhlamuselo ta le hansi